پروديۋسەر كۇيەۋىمەن 22 جىل بويى ۇلكەن ماحابباتتا ءومىر سۇرگەنىن تىلگە تيەك ەتتى. ول العاش رەت كۇيەۋىن رەنجىتكەنىن مويىندادى.
ەسەنتايەۆانىڭ سوزىنشە، كۇيەۋىن كەشىرۋ ءۇشىن وعان 4 اي قاجەت بولعان.
«ءۇش اي بويى مەن ەشتەڭەگە قابىلەتسىز حالدە بولدىم. اۋر كۇيزەلىستى باستان كەشىردىم، دەپرەسسياعا قارسى دارىلەر ءىشتىم، پسيحولوگتارعا بارىپ ەمدەلدىم، ءوزىم بارىپ ۇلگەرگەن مەملەكەتتەردە ەمدەلدىم. قىتاي، فرانسيا - تەكسەرىستەن ءوتتىم، ينەمەن ەمدەلدىم... ىستەمەگەن نارسەم قالمادى، - دەپ اتاپ ءوتتى تانىمال پروديۋسەر.
بايان ەسەنتايەۆا كۇيەۋىن رەنجىتكەنى ءۇشىن جازالانعانىن مويىندادى.
«اركەز قۇدايعا سەندىم. ويتكەنى ومىرىمدە ەشقانداي جامان ىسكە بارعان ەمەسپىن. بۇعان دەيىن دە تالاي ايتقانمىن، بەتىنە تىكە قاراي المايتىنداي ادامىم جوق. جۇمىستا دا، قارىم- قاتىناستا دا ادال بولدىم. تۇرمىستا بولعان 22 جىلدا ادال بولدىم. ونى رەنجىتكەنگە دەيىن. مەن ونى رەنجىتتىم - سول ءۇشىن جازامدى الدىم»، - دەدى ول.
بايان ەسەنتايەۆا ەشقاشان تۇرمىستىق ماسەلەلەرگە باس قاتىرىپ كورمەگەنىن ايتتى. اتىشۋلى وقيعاعا دەيىن وتباسىنداعى بارلىق ۇيىمداستىرۋشىلىق ماسەلەلەرمەن بۇرىنعى كۇيەۋىنىڭ اينالىسقانىن تىلگە تيەك ەتتى.
«جالعىز قالدىم دەگەن كەزدە تۇرمىستىق پروبلەمالارعا قاتىستى ايتتىم. ول مەن 10 -ماۋسىمعا دەيىن ەشقاشان اينالىسىپ كورمەگەن دۇنيەلەرىم. مەن ءۇي قىزمەتشىسىنە قانشا اقشا تولەنەتىنىن، ەتتىڭ قانشا تۇراتىنىن بىلمەيتىنمىن. ءوز كولىگىمە جانارماي قۇيعان ەمەسپىن، ءتىپتى، ۇيالى تەلەفونىما اقشا سالىپ كورمەگەم. ەشقاشان. كولىكتىڭ باگى قاي بەتتە ەكەنىن دە بىلمەدىم. تۇرمىستىق مىندەتتەردىڭ ىشىندە ۇيىمداستىرۋشىلىق، اكىمشىلىك جۇمىستاردىڭ ءبارى دە سونىڭ موينىندا بولاتىن. مەن تەك بايان ەسەنتايەۆا بولا الاتىنمىن. ءسان سالوندارىنا بارىپ، سۇيىكتى جوبالارىممەن اينالىساتىنمىن. بالانىڭ مەكتەبىنە قانشا اقشا جۇمسالاتىنىن دا بىلگەن ەمەسپىن. ول ۇنەمى: «باياشا، سەن جۇمىسىڭدى ىستە، قالعانىن مەن تىندىرامىن» ، - دەپ ايتاتىن. قازىر ونىڭ بارىنەن ايىرىلىپ قالدىم. انام جۇرگىزۋىشى مەن كۇزەتشىگە ايلىق تولەۋ كەرەك ەكەنىن ايتادى، مەكتەپتەن حابارلاسادى... مەن ابدىراپ قالدىم. ونىڭ بارلىعى قانشا تۇرادى؟ ءوزىم كۇيزەلىستە بولا تۇرا بۇرىن- سوڭدى كەزىكپەگەن دۇنيەلەرمەن اينالىسۋدامىن. جالعىز قالدىم دەگەندە وسىنى مەڭزەدىم. جۇمىسىما كەلسەم دە سول، بارلىعى ارنادان شىعىپ كەتكەن. بايىپپەن عانا: «قىزدار كەزەك- كەزەك اينالىسايىق - ءبىرىنشى، ەكىنشى، ءۇشىنشى، ت. ب. قازىر ەڭ ماڭىزدىسى نە؟ سونىمەن اينالىسايىق» - دەدىم. اقىرىنداپ قالىپقا ءتۇسىپ كەلە جاتىرمىز»، - دەپ جالعادى ءسوزىن ەسەنتايەۆا.
پروديۋسەر بولعان وقيعادان كەيىن بەت- الپەتىنىڭ وزگەرگەنىنە بايلانىستى ەل الدىنا شىعۋدان ءالى دە قىمسىناتىنىن ايتىپ بەردى. ودان بولەك، جان- جاقتان كومەك قولىن سوزعان جانداردىڭ كوپ بولعانىن تىلگە تيەك ەتتى.
« مەن ءومىر بويى ادەمى ايەل بولدىم. ادامدار ماعان اركەز پروبلەماسى جوق ايەل رەتىندە تامسانا قارايتىن. ال ەندى سەنىڭ بەتىڭ قيسىق، كوزىڭ جۇمىلمايدى، فيزيكالىق تۇرعىدان ءتانىڭ اۋىرادى، ال كەيبىر ادامدار ولاردى اۋرۋحانادا قابىلداماي قويعانىڭ ءۇشىن رەنجيدى. اقشا ۇسىندى، ەمحانالارىن، جەكە ۇشاقتارىن... كوبىنەسە ادامدار وزدەرىن وسىنداي قىرىنان تانىتتى. «نۇر وتاننان» ، مينيسترلىكتەردەن باستاپ بارلىق جەردەن حابارلاستى، بارلىعى اۋرۋحاناعا كەلدى. ۇلكەن العىسىمدى بىلدىرەمىن»، - دەدى تانىمال پروديۋسەر.