سونداي-اق، جابايى جانۋارلار مەن قۇستاردىڭ اراسىندا قۇتىرما، قۋ بەزگەگى، باتىس ءنىل بەزگەگى، نيۋكاسل اۋرۋى جانە قۇس تۇماۋى قوزدىرعىشتارى تارالىپ وتىر. ال كيىكتەر اراسىندا جاڭا ۆيرۋس تابىلدى، دەپ حابارلايدى قازاقپارات ءتىلشىسى.
«سوڭعى جىلدارى رەسپۋبليكادا فاۋناعا قاۋىپ ءتوندىرىپ وتىرعان جاڭا ەكزوتيكالىق اۋرۋلاردىڭ تارالۋى تىركەلىپ وتىر. ماسەلەن، ەكى جىل بۇرىن جامبىل وبلىسىندا، بىلتىر قىزىلوردا وبلىسىندا ۇساق مالدىڭ اراسىندا وبا اۋرۋى دا تارادى. اتالعان اۋرۋ ۋشىعىپ، قوس تۇياقتى جابايى جانۋارلارعا اۋىسۋى ابدەن مۇمكىن. اعىمداعى جىلى اتىراۋ وبلىسىندا ءىرى قارا مال نودۋليارلى دەرموتيتتەن قىرىلدى. بۇل اۋرۋ مالدان مالعا، سونداي- اق شىبىن- شىركەي ارقىلى تارالادى»، - دەيدى اكادەميك ابىلاي سانسىزباي.
عالىمنىڭ ايتۋىنشا، بيولوگيالىق قاۋىپسىزدىك ماسەلەلەرىن عىلىمي- زەرتتەۋ ينستيتۋتىنىڭ ماماندارى كيىكتەردىڭ اراسىندا جاڭا ۆيرۋستىڭ تارالىپ جاتقانىن انىقتادى. «جاڭا ۆيرۋستىڭ اتاۋى - اكابانە. وسى ۋاقىتقا دەيىن اتالعان ۆيرۋس قازاقستاننىڭ تەرريتورياسىندا بولماعان. عالىمدار كيىكتەردىڭ 12 پايىزىندا اكابانە ۆيرۋسىن تاۋىپ الدى. «بۇل اۋرۋدىڭ ۋشىعىپ كەتۋى كيىكتەر سانىنىڭ كۇرت قىسقارۋىنا اكەلىپ سوقتىرۋى ابدەن مۇمكىن. سوندىقتان قازىردەن باستاپ ءتيىستى شارالاردى قولعا الۋ قاجەت»، - دەيدى اكادەميك سانسىزباي.
ايتا كەتەيىك، اۋىل شارۋاشىلىعى مينيسترلىگىنىڭ مالىمەتىنە سايكەس، بۇعان دەيىن قازاقستانداعى كيىكتەردىڭ سانى 21 مىڭنان 295 مىڭ باسقا دەيىن وسكەن بولاتىن. الايدا وتكەن جىلى اتالعان جابايى جانۋارلارلىڭ جاپپاي قىرىلۋىنان كەيىن ولاردىڭ سانى كۇرت تومەندەپ، 108 مىڭعا دەيىن ازايعان. سول كەزدە عالىمدار كيىكتەر باسىم بولىگى پاستەرەللەزدەن قىرىلدى دەگەن قورىتىندىعا كەلدى.
اۆتور: ارمان اسقاروۆ