مينيستر شەتەلدە تىلشىلەر قوسىندارىن اشۋدى قولدايدى

استانا. قازاقپارات - بۇگىن قازاقستاننىڭ ستراتەگيالىق زەرتتەۋلەر ينستيتۋتىنىڭ ۇيىمداستىرۋىمەن وتكەن ساراپشىلار كەزدەسۋىندە وتاندىق بۇقارالىق اقپارات قۇرالدارىنىڭ شەتەلدەگى تىلشىلەر قوسىندارىن اشۋ ماسەلەسى كوتەرىلدى.

 ق ر اقپارات جانە كوممۋنيكاتسيالار ءمينيسترى اتالعان باستامانى قولدايتىنىن جەتكىزدى، دەپ حابارلايدى قازاقپارات ءتىلشىسى.

 كەزدەسۋدىڭ مودەراتورى، ساياساتتانۋشى ەرلان قارين شەتەلگە بارعاندا «قازاقپارات» حالىقارالىق اقپارات اگەنتتىگى مەن «حابار 24» ارناسىنا تيەسىلى تىلشىلەر قوسىندارىنىڭ جۇمىس ىستەپ تۇرعانىن جەتكىزىپ:

«اتالعان بولىمشەلەر قازاقستاننىڭ عانا ەمەس، جالپى ورتالىق ازيانىڭ جالعىز وكىلدەرى ەكەن. دەمەك، قازاقستاندىق بۇقارالىق اقپارات قۇرالدارى تۇتاس ايماق ءۇشىن جالعىز اقپارات كوزى بولىپ سانالادى»، - دەدى ە. قارين.

مينيستر ابايەۆ ءوز كەزەگىندە تىلشىلەر قوسىندارىن اشۋدى قولدايتىنىن جەتكىزدى.

 «مەنىڭشە، تىلشىلەر قوسىندارى قاجەت. اسىرەسە، رەسەي، قىتاي، ا ق ش سياقتى ەلدەردە، سونداي- اق ورتالىق ازيا مەن ەۋروپاعا كىرەتىن نەگىزگى ارىپتەس مەملەكەتتەردە اشۋ قاجەت. وسى سالاداعى جۇمىس جالعاسا بەرەدى. ارينە، بۇنىڭ بارلىعى اقپارات سالاسىنداعى مەملەكەتتىك تاپسىرىسقا بايلانىستى. ماسەلەن، جەكە مەنشىك تەلەارنالار مەن اقپاراتتىق اگەنتتىكتەر شەتەلدە ءوز تىلشىلەرىن ۇستاي المايدى. سەبەبى وعان دا قىرۋار قارجى قاجەت»، - دەدى مينيستر.

 اۆتور: ارمان اسقاروۆ