قازاقستاندا حالىقتىڭ كوڭىلىنەن شىققان شەنەۋنىكتەر كىم؟

استانا. قازاقپارات - بيلىكتىڭ ادامى رەتىندە جالپى جۇرتقا جاعۋ قيىننىڭ قيىنى ەكەنى كوپكە ءمالىم.

الايدا بۇل سىننان سۇرىنبەي كەلە جاتقان شەنەۋنىكتەر بار. حالىق بۇل شەندىلەردى ەرەكشە سىيلايدى. ولار كىمدەر؟

NUR. KZ ەلدىڭ ىقىلاسىنا يە بولعان شەنەۋنىكتەردى نازارلارىڭىزعا ۇسىنادى.

 يمانعالي تاسماعامبەتوۆ - قازاقستان پرەمەر-ءمينيسترىنىڭ ورىنباسارى

ەلىمىزدىڭ ءىرى وبلىس، قالالارىن باسقارىپ، مەملەكەتتىك حاتشى، مينيستر، پرەزيدەنت اكىمشىلىگىنىڭ باسشىسى، ۇكىمەت باسشىسى سىندى جوعارى لاۋازىمدى قىزمەتتەردى اتقارعان يمانعالي تاسماعامبەتوۆ حالىقتىڭ زور ىقىلاسىنا يە. جاقىندا ۆيتسە-پرەمەر بولىپ ۇكىمەتكە قايتا ورالعان شەنەۋنىك جۇرتشىلىقتى قۋانتىپ تاستادى. ونى الەۋمەتتىك جەلىدەگى كوپتەگەن پىكىرلەردەن بايقاۋعا بولادى.

ۆيتسە-پرەمەر الماتى حالقىنا ىسكەر باسشى رەتىندە ەستە قالدى. ول مەگاپوليستىڭ باستى ماسەلەسى ەكولوگياعا، قالا تازالىعىنا باسا نازار اۋداردى.

يمانعالي تاسماعامبەتوۆ تاريح، ارحەولوگيا جانە ەتنوگرافياعا قىزىعۋشىلىق تانىتىپ جۇرەدى. يمانعالي نۇرعالي ۇلىنىڭ اتسالىسۋىمەن يۋنەسكو كولەمىندە قازاق ادەبيەتى، مادەنيەتى مەن عىلىمىنا ەڭبەگى سىڭگەن قايراتكەرلەردىڭ مەرەيتويلارى وتكىزىلدى. جاقىندا عانا ۆيتسە-پرەمەر يۋنەسكو تىزىمىنە ەنگەن ەجەلگى تالحيز قالاسىنىڭ اۋماعىنا اۆتوكولىك جولىن سالۋ تۋرالى جوبانى توقتاتۋدى تالاپ ەتتى. ءسويتىپ ۇكىمەت باسشىسىنىڭ ورىنباسارى قازاقستاننىڭ حالىقارالىق ۇيىممەن اراداعى قاتىناسىن رەتتەۋگە ۇلەس قوسا ءبىلدى.

بەردىبەك ساپاربايەۆ  - اقتوبە وبلىسىنىڭ اكىمى

قىزىلوردا ءوڭىرىنىڭ تۋماسى قازىرگى تاڭدا اقتوبە وبلىسىنىڭ اكىمى قىزمەتىندە. بەردىبەك ساپاربايەۆ تۋرالى جەلى قولدانۋشىلارى وڭ پىكىردە. شىعىس قازاقستان وبلىسىنىڭ اكىمى قىزمەتىن ابىرويمەن اتقارعان ول جۋرناليستەرگە اشىقتىعىمەن ەستە قالىپتى. «تىلشىلەرمەن سۇحبات كەزىندە ول مىسالعا كەلتىرگەن سانداردى ەشبىر قاعازعا قاراماي ايتىپ، ءوڭىردىڭ جاعدايىنا قانىق ەكەنىن بىلدىرگەن»، - دەپ ەسكە الادى جەرگىلىكتى جۋرناليستەر.

ءبىر سوزىندە اكىم: «مەن ءوز قولاستىمداعى قىزمەتكەرلەرگە ماسەلەنىڭ انىق-قانىعىن ءوز كوزىڭمەن بارىپ كورۋ كەرەكتىگىن ايتىپ وتىرامىن. ەسەپ-قيساپتىڭ استىنا جاسىرىنىپ، كرەسلودا شالقايىپ وتىرۋدىڭ قاجەتى جوق. بارىڭدار، حالىقپەن تىلدەسىڭدەر، قانداي ماسەلە بار ەكەنىن كوزبەن كورىپ قايتىڭدار»، - دەگەن ەدى.

اقتوبە جۇرتشىلىعى دا بەردىبەك ساپاربايەۆتى داتتاعاننان جاقتاعاندى قۇپ كورەدى. وبلىس اكىمى بارعان جەرىندە جەرگىلىكتى باسشىلىققا سىن ايتىپ، ەسكەرتۋ جاساپ جۇرەدى. اقتوبە حالقىندا اكىمگە دەگەن سەنىم پايدا بولدى دەپ ايتسا بولادى. باسشىلىق قىزمەتىنە كەلە سالا، اكىم مىرزا ازىق-تۇلىك پەن دارىلەردىڭ باعاسىن رەتتەۋگە كىرىستى.

ونىڭ قازاق ءتىلىن بىلمەيتىن قىتاي ءتىلىنىڭ اۋدارماشىسىنا ايتقان ەسكەرتپەسى قازنەتتە كوپكە دەيىن ايتىلىپ ءجۇردى. سونداي-اق، ساپاربايەۆ 800 تۇرعىنى بار اۋىلعا ەلەكتر توعىن تارتا الماي جۇرگەن اۋدان اكىمىنىڭ ۇيىندەگى ەلەكتر جارىعىن ءسوندىرىپ تاستاعانى تۋرالى حابار جەلىدە قىزۋ تالقىعا تۇسكەن ەدى.

اماندىق باتالوۆ - الماتى وبلىسىنىڭ اكىمى

الماتى وبلىسىن 2014-جىلدان باسقارىپ كەلە جاتقان اكىم جەرگىلىكتى حالىقتىڭ كوڭىلىنەن شىعۋدا. ماماندىعى ينجەنەر بولعاندىقتان، بالكىم، بۇل شەنەۋنىك تىنىش وتىرعاندى ۇناتپايدى. ەكى جىلدىڭ ىشىندە وبلىستاعى ورىن العان وڭ وزگەرىستەرگە وسى كۇزدە جۇمىس ساپارىمەن كەلگەن ەلباسى دا ريزاشىلىعىن ءبىلدىرىپ كەتكەن بولاتىن.

تالدىقورعان اۋەجايى قايتا جاڭعىرتۋدان ءوتىپ، جاڭا دەمالىس ورىندارى پايدالانۋعا بەرىلدى. وڭىردە قانت قىزىلشاسىن ەگۋ قايتا قولعا الىنىپ وتىر. جاقىندا عانا اماندىق عابباس ۇلى «تاۋەلسىز قازاقستاننىڭ ۇزدىك ينجەنەرى» ديپلومى مەن توسبەلگىسىنە يە بولدى. جەتىسۋلىق جۇرت الەۋمەتتىك جەلىدە ءوڭىر باسشىسىن شىن كوڭىلمەن قۇتتىقتاپ، بۇل ماراپاتتىڭ وزىنە لايىقتى ەكەنىن ايتىپ جارىستى.

باۋىرجان بايبەك - الماتى قالاسىنىڭ اكىمى

جاس بولسا دا ەلىمىزدىڭ ەڭ ءىرى قالاسىنا باس بولعان باۋىرجان بايبەكتىڭ اكىمدىك قىزمەتى تۋرالى حالىق وڭ كوزقاراستا. ول پرەزيدەنت اكىمشىلىگىندە ءجۇرىپ ءبىرتالاي تاجىريبە جيناقتاپ ۇلگەردى. الماتى قالاسى اكىمى لاۋازىمىنا تاعايىندالعان بەتتە ول وزىنە قاتىستى مىناداي ماسەلەنىڭ باسىن اشىپ ايتىپ بەردى: «مەنىڭ اكەم ەلباسىمەن ءبىر سىنىپتا وقىعان. ايتا كەتۋ كەرەك، ءبىزدىڭ جانۇيا ەشكىمگە بۇل تۋرالى ادەيى اشىق ايتىپ ماقتانبادى، جانە ونى جاسىرىپ تا قالمادى. ءبىز تەك ىشتەي ماقتان تۇتتىق»، - دەپ ايتقان ەدى.

پرەزيدەنت نۇرسۇلتان نازاربايەۆ باۋىرجان بايبەكتى اكىمدىك قىزمەتكە تاعايىنداپ تۇرىپ وعان زور سەنىم ءبىلدىردى.

«جانىمدا بىرگە جۇمىس ىستەپ ءجۇرىپ، ول مەنىڭ قىزمەتىمدى كوردى، رەسپۋبليكانىڭ تۇكپىر-تۇكىپىرىندە بولىپ قايتتى. سايلاۋالدى كامپانيالارعا قاتىستى. بۇل وعان وڭاي سىناق بولعان جوق. سىزدەرمەن بىرگە ول قالانىڭ ماسەلەلەرىن شەشە الادى دەگەن سەنىمدەمىن»، - دەدى ەلباسى.

باۋىرجان بايبەكتى قالا، رەسپۋبليكا جۇرتشىلىعى قازاق مادەنيەتىنە قولداۋ ءبىلدىرىپ جۇرگەن ازامات رەتىندە تانيدى.

قىرىمبەك كوشەربايەۆ - قىزىلوردا وبلىسىنىڭ اكىمى

قىزىلوردا وبلىسىنىڭ اكىمى قىرىمبەك كوشەربايەۆ ءوڭىردىڭ كوكتەمدەگى جەر ماسەلەسى بويىنشا ءوز پىكىرلەرىمەن بولىسىكىسى كەلگەن ازاماتتىق قوعام وكىلدەرىمەن كەزدەسىپ، حالىقپەن بايلانىسقا ءاردايىم اشىق ەكەنىن كورسەتتى. وبلىس اكىمى سول كەزدە ءسوز بولىپ جاتقان جەر تۋرالى زاڭنىڭ جاي-جاپسارىن تۇسىندىرگەن بولاتىن.

وسىنى ەستىگەن جەلى قولدانۋشىلارى قىرىمبەك ەلەۋ ۇلىن حالىقپەن ءاردايىم اشىق الاڭدا سويلەسىپ، شەشىمىن تابا الاتىن باسشى رەتىندە باعالايتىندارىن جەتكىزدى. ونىڭ «بايقوڭىردى جالعا بەرگەنىمىزبەن حالىق بىزدىكى، ونىڭ بولاشاعىنا، حالىقتىڭ الەۋمەتتىك جاعدايىنا بەي-جاي قاراي المايمىز»، - دەگەن سوزدەرى كوڭىلگە ءۇمىت ۇيالاتقانداي بولدى.