ەلدىڭ بۇكىل وڭىرىنەن جينالعان ۇستازداردى ءبىلىم مينيسترلىگى اعىلشىن ءتىلى كۋرسىنا ارنايى شاقىرتىپ العان ەكەن. الايدا، شاكىرتاقىسىن سول كۇيى بەرمەي قويعان. قالتاسىنداعى سوڭعى تەڭگەسىن پاتەراقىعا جۇمساپ، ەندى تاماق الىپ جەۋگە اقشا تاپپاي قينالعان پەداگوگتار ءبىلىم ورداسىنا جينالىپ شۋ شىعاردى. زاميرا ايتجانوۆا - كاسپي مەملەكەتتىك ۋنيۆەرسيتەتىنىڭ وقىتۋشىسى. بىلدەي كافەدرا دوتسەنتى ەندى ۇيىنە قايتۋعا اقشا تاپپاي ءجۇر. الماتىعا ءتىل ۇيرەنەمىن دەپ كەلگەن ۇستاز ەكى ورتادا تەڭگەسىز قالعان. «كرەديتكە تولەيىن دەپ وتىرعان اقشامىزدى جۇمسادىق جولىمىزعا، پاتەرگە. مەن ەندى ۇيىمە قايتا الماي قالۋىم دا مۇمكىن» - دەيدى زاميرا ايتجانوۆا. ۇستازداردى ءبىلىم مينيسترلىگى اعىلشىن ءتىلىن ۇيرەتپەك بولىپ الماتىعا شاقىرتقان ەكەن. ال شاكىرتاقىسىن كەلگەن بويدا تولەيمىز دەگەن. الايدا اقشالارى سول كۇيى تۇسپەي، جۇزدەگەن پەداگوگ جيىرما كۇننەن بەرى تەنتىرەپ ءجۇر. بارىنەن بۇرىن الىس وڭىرلەردەن ات ارىلتىپ كەلگەن ۇستازدار قينالعان. «اعىلشىنشا وقيمىز» دەپ ءجۇرىپ اشتان قالماس ءۇشىن امالسىزدان ۇيلەرىنەن اقشا سۇراتىپتى. دەگەنمەن، مۇعالىمدەردىڭ بارلىعىنىڭ بىردەي مۇنداي مۇمكىندىگى دە جوق ەكەن. كوبى جالاقىلارىنا دەيىن جۇمساپ قويعان. ەندىگى قايتار جولعا اقشا تاپپاعان 500 گە تارتا پەداگوگ جينالىپ شۋ شىعاردى. ولارمەن كەزدەسۋگە ءبىلىم مينيسترلىگىنىڭ وكىلى دە كەلگەن. وزدەرىنە شاڭ جۋىتپاعان شەنەۋنىكتەر بار كىنانى ۇلتتىق ۋنيۆەرسيتەتتەرگە اۋدارا سالدى.
«جوعارعى وقۋ ورىندارى شوتتى كەش اشۋىنا بايلانىستى اقشالارىن العان جوق. قالاي اقشا تۇسەدى، بەرەمىز وقىتۋشىلارعا. وسى اپتادا تۇسەدى قارجى»، - دەپ اتاپ ءوتتى ق ر ءبىلىم جانە عىلىم مينيسترلىگى دەپارتامەنتىنىڭ باس ساراپشىسى ناۋجان ديدياربەكوۆا. مىڭ ادامعا ءبىر ايدا اعىلشىنشا سايراتامىز دەگەن مينيسترلىكتىڭ ارەكەتى، يگەرىلمەي قالاتىن بيۋدجەت اقشاسىن ۇلەستىرۋدىڭ ءبىر جولى عانا بولسا كەرەك. ونىڭ وزىندە، ءتىل ۇيرەتۋگە تەندەر جازدا جاريالانىپتى. سوندا ولاردى الماتىدا 4 بىردەي جوعارى وقۋ ورنى قارسى الادى دەپ ۇيعارىلعان. تەك اقشا سول كۇيى اۋدارىلماي، ۇستازدار جولاقىسىنا دەيىن وزدەرى تولەگەن. ال مۇعالىمدەردى ويلاپ باسىن اۋىرتقىسى كەلمەدى مە، ۇستازدارعا ءمان- جايدى تۇسىندىرۋگە كەلگەن مينيسترلىك وكىلى جينالىستى سول كۇيى باستاماستان كەتىپ قالدى.
دەرەككوز: «ك ت ك» تەلەارناسى.