بەلارۋسيا ءمۇفتيى ءابۋ باكىر شابانوۆيچ تۇركيا مەن بەلارۋسيا پرەزيدەنتىنە قۇراندى سىيلاعان كەزدە، ەردوعان كىتاپتى الىپ جاتىپ ونى ءسۇيىپ قۇرمەت بىلدىرگەن. ىزىنشە لۋكاشەنكو دا سونى قايتالادى.
الايدا مۇسىلمان ەمەس ادام رەتىندە ونىڭ قۇرانعا وسىلاي قۇرمەت ءبىلدىرۋى ءدىنشىل مۇسىلمانداردىڭ نارازىلىعىن تۋعىزعان. ماسەلە ءاربىر مۇسىلمان مەملەكەتتەرىندە بۇل جاعدايدىڭ ءارتۇرلى قابىلدانۋىندا: ماسەلەن، بيىك تۇلعالاردىڭ قۇراندى ءسۇيۋى تاتارلاردا قابىلدانبايدى. ولار تەك بۇل كىتاپ ءدىن ادامدارى ءۇشىن دەپ تۇسىنەدى.
«سۆوبودا» راديوسىنىڭ حابارلاۋىنشا، لۋكاشەنكو بۇعان دەيىن ءوزىنىڭ بەلارۋسيا مۇسىلماندارىنىڭ دا پرەزيدەنتى ەكەنىن ايتقان. ال مۇسىلمانداردىڭ سەنىمى مەن شاريعات بويىنشا قۇراندى سۇيگەن ادام مۇسىلمان رەتىندە قابىلدانا قويمايدى. ول ءۇشىن بارلىعىنا بەلگىلى جاعدايات بويىنشا ءتىلىن كاليماعا كەلتىرىپ، اللادان باسقا ءتاڭىر جوق ەكەنىن مويىنداۋى ءتيىس.
ءوز ارەكەتىنە قاتىستى پىكىر بىلدىرگەن لۋكاشەنكو وسى ءىسى ارقىلى بارلىق دىنگە دە قۇرمەتپەن قارايتىنىن كورسەتكىسى كەلگەنىن ايتىپتى.
«قۇراندى سۇيگەنىم ءۇشىن مەنى سىناپ جاتىر. ءبىز ەردوعان ەكەۋمىز مەشىتتىڭ اشىلۋىندا بولدىق. وعان قۇران سىيلادى - ول قاسيەتتى كىتاپتى ءسۇيدى. ماعان دا سونداي قۇران بەردى، ال مەن نە ىستەۋىم كەرەك ەدى؟ مەندە سونى قايتالادىم»، - دەدى لۋكاشەنكو.
ول وسىعان دەيىنگى پۋتينمەن كەزدەسۋ قارساڭىنداعى باسپا ءسوز ءماسليحاتىندا ەلدە مۇسىلماندارعا قاتىستى ەشقانداي تۇيتكىلدى ماسەلە جوق دەگەن ەدى.
«ەلىمىزدە مىڭداعان مۇسىلماندار ءومىر ءسۇرىپ جاتىر. مەن ولار ءۇشىن دە پرەزيدەنتپىن. ولار ەشقاشان بىزگە پروبلەما تۋدىرعان ەمەس. ءبىز ولارمەن كەرەمەت قارىم- قاتىناستامىز. مەن بارلىعىنىڭ پرەزيدەنتىمىن»، - دەدى ول.