قاراعاندى وبلىسىنىڭ اگرارشىلارى شەتەلگە بيداي، ۇن، زىعىر ەكسپورتتايدى

قاراعاندى. قازاقپارات - قاراعاندى وبلىسى اۋىل شارۋاشىلىعى ونىمدەرىن ەكسپورتتايدى، دەپ حابارلادى «قازاقپارات» ح ا ا ءتىلشىسى.

«قازاقستان جەتەكشى الەمدىك ۇن مەن ءبيداي ەكسپورتشىلارىنىڭ وندىعىنا كىرەدى. بۇل كورسەتكىشكە ءبىزدىڭ وبلىس تا لايىقتى ۇلەسىن قوستى. وتكەن جىلى باسقا وبلىستاردىڭ الدى بولىپ 50 پايىزدان استام ءونىمدى ەكسپورتقا جونەلتتى. بۇل 500 مىڭ تونناعا جۋىق ءونىمدى قۇرادى»، - دەدى اۋىل شارۋاشىلىعى جۇمىسكەرلەرى كۇنىنە ارنالعان سالتاناتتى جيىندا ءسوز سويلەگەن وبلىس اكىمى نۇرمۇحامبەت ابدىبەكوۆ.

ا ش ب مالىمەتىنشە، استىق پەن ۇن نەگىزىنەن ورتا ازيا ەلدەرىنە جەتكىزىلەدى. بۇدان باسقا، وبلىس زىعىر ەكسپورتتايدى. بيىلعى جىلدان باستاپ ب ا ءا- گە قوي ەكسپورتتاۋ جولعا قويىلدى. الداعى ۋاقىتتا بۇرشاق تۇقىمدى داقىلدى شەتەلگە جەتكىزەتىن بولادى.

«بيىل ديقانشىلار رەكوردتىق كورسەتكىشكە قول جەتكىزدى. 1 ميلليون توننادان استام استىق باستىرىلدى. ورتاشا ونىمدىلىك گەكتارىنا 14 تسەنتنەردى قۇرادى. بۇل وبلىس تاريحىندا رەكوردتىق كورسەتكىش، - دەدى ءوڭىر باسشىسى.

- اباي اۋدانى شارۋاشىلىعىن گەكتارىنا 20 تسەنتنەر ونىمىمەن، وساكاروۆ، نۇرا اۋداندارىنىڭ شارۋاشىلىعىن گەكتارىنا 14 تسەنتنەردەن استام ونىمىمەن قۇتتىقتايمىز» . كارتوپ ونىمدىلىگى دە جوعارى بولدى. «سالانىڭ دامۋىنا مەملەكەت قولداۋ كورسەتتى. بيىل وبلىس اگرارشىلارى سۋبسيديا تۇرىندە 9,5 ميلليارد تەڭگە الدى، ونىڭ ىشىندە 1,5 ميلليارد تەڭگە سالىنعان ينۆەستيتسيا شىعىنىن جابۋ تۇرىندە شارۋاشىلىققا تولەندى»، - دەپ اتاپ ءوتتى ابلىبەكوۆ.

«قاز اگرو» حولدينگىن دامىتۋ ينستيتۋتتارى اۋىل شارۋاشىلىعى ماماندارىنا سوماسى 6,1 ميلليارد تەڭگە جەڭىلدىكپەن كرەديت بەردى. اۋىلدا جۇمىسپەن قامتۋ جانە بيزنەستى دامىتۋ ءۇشىن «اۋىل شارۋاشىلىعىن قارجىلاي قولداۋ قورى» ارقىلى مەملەكەتتىك باعدارلامالار اياسىندا 1 ميلليارد 850 ميلليون تەڭگە جىبەرىلدى». سالتاناتتى جيىندا وبلىس اكىمىنىڭ گراموتالارى، ۆەدومستۆولىق ناگرادالار - «ەڭبەك ارداگەرى» مەدالى، «اۋىل شارۋاشىلىعى سالاسىنىڭ ۇزدىگى»، «ەڭبەك داڭقى» ءتوس بەلگىسى، ق ر ا ش م ءمينيسترىنىڭ گراموتالارى تابىس ەتىلدى.