ورالدا «مەنىڭ ەلىم - ماڭگىلىك ەل» جاستار شاراسى ەستافەتاسى اقتوبەلىكتەرگە تابىستالدى
وندا وبلىس اكىمىنىڭ ورىنباسارى باعدات ازبايەۆ ەلباسىمىزدىڭ «ماڭگىلىك ەل» يدەسى جاستار تاراپىنان قولداۋ تاۋىپ وتىرعانىن، بۇل رەتتە ەل بولاشاعى جاستارعا بايلانىستى ەكەندىگىن، سوندىقتان ولاردىڭ بەلسەندى ەڭبەك ەتىپ، قوعامدىق-ساياسي ومىرگە قۇلشىنا ارالاسۋى قاجەتتىگىن اتاپ كورسەتتى.
شارا «تاۋەلسىز قازاقستان» پويىزىنىڭ ورالعا كەلۋىمەن تۇسپا- تۇس بولعاندىقتان، ونىڭ قۇرامىندا اق جايىق وڭىرىنە قادام باسقان ق ح ا دەپۋتاتتىق كورپۋسىنىڭ ءتوراعاسى، ق ر پارلامەنتى ءماجىلىسى V شاقىرىلىمىنىڭ دەپۋتاتى ەگور كاپپەل تاۋەلسىز قازاق ەلى جاستارىنىڭ ءوز وتانىن قاستەرلەپ، ەڭ اۋەلى مەملەكەتتىك ءتىلدى مەڭگەرە ءبىلۋى كەرەكتىگىن جەتكىزدى.
ونىڭ ايتۋىنشا، قازىرگى تاڭدا جاستاردىڭ 73 پايىزى مەملەكەتتىك تىلدە ەمىن-ەركىن تىلدەسەدى. ەندى بۇل كورسەتكىشتى ودان سايىن جوعارىلاتۋدىڭ ماڭىزى زور. اسىرەسە، وزگە ۇلت وكىلدەرى قازاقستاندى شىن جۇرەگىمەن وتانىم دەپ ءبىلىپ، ءتىلى مەن سالت-ءداستۇرىن، مادەنيەتى مەن تاريحىن تانىپ-بىلسە، بۇدان ءبارى دە ۇتادى.
قازىر ءتىل بىلەمىن دەگەن ادامعا ەشقانداي قيىندىق- كەدەرگى جوق. مەملەكەتتىڭ نەگىزىن قۇرايتىن قازاق ۇلتىنىڭ توڭىرەگىنە توپتاسا ءبىلىپ، ازاتتىق ءۇشىن قانىن دا، جانىن دا اياماعان اتا- بابالارىمىزدى ماقتان ەتە وتىرىپ، سولاردىڭ سالعان سارا جولىمەن العا باسا بەرۋ - بارشاعا ورتاق مىندەت. كۇنى بۇگىن ەلىمىزدە مەملەكەت تاراپىنان ەلباسىمىز سەنگەن جاستارعا ۇلكەن قولداۋ كورسەتىلۋدە.
وسى ورايدا جاستار دا وزدەرىنىڭ وتانسۇيگىشتىگىن كورسەتە ءبىلۋى ءتيىس. «مەنىڭ ەلىم - ماڭگىلىك ەل» سىندى شارالاردىڭ ماقسات - ءمانىسى، مىنە، وسىندا. قازىرگى كەزدە ءماجىلىس دەپۋتاتتارى تالقىلاپ جاتقان «جاستار ساياساتى تۋرالى» زاڭ جوباسىندا جاستاردى ەلجاندىلىققا باۋلۋ باعىتىنداعى كريتەرييلەرگە باسىمدىق بەرىلۋدە.
ەڭ باستىسى، جاستار ەل سەنىمىن اقتاپ، بولاشاققا نىق قادام باسۋى ءتيىس. پاۆلودار وبلىسىنان كەلگەن جاستار جەتەكشىسى ماكسيم سپوتكاي ەگور كاپپەلدىڭ ايتقان پىكىر- پايىمىن دالەلدەپ، شاراعا قاتىسۋشىلارعا ءسوزىن قازاق تىلىندە ارنادى. ول جەتىسۋ جەرىنەن باستالىپ، 1- جەلتوقسان كۇنى استانادا قورىتىندىلاناتىن اتالمىش ءىس-شارانىڭ ەندى اقتوبەدە جالعاساتىنىن جەتكىزدى. «تاۋەلسىز قازاقستان» پويىزى شتابىنىڭ جەتەكشىسى، تاريحشى-عالىم، پروفەسسور ءامىرجان الپەيىسوۆتىڭ اتاپ وتكەنىندەي، ماڭگىلىك ەل بولۋ اتا-بابالارىمىزدىڭ ەجەلگى ارمانى ەدى.
ەلباسىمىزدىڭ ساليقالى ساياساتى مەن قاجىرلى ەڭبەگىنىڭ ارقاسىندا وسى ۇلى مۇراتقا قول جەتىپ كەلەدى. ەندىگى مىندەت - تاۋەلسىزدىگىمىزدى باياندى ەتىپ، تابىستارىمىزدى ەسەلەي ءتۇسۋ. بۇدان جاستاردىڭ دا تىس قالمايتىنى انىق. مەرەكەلىك كونسەرتكە ۇلاسقان شارا بارىسىندا «نۇر وتان» پارتياسى جانىنداعى «جاس وتان» ج ق ب ق و فيليالىنىڭ ءتوراعاسى نۇرعالي جولداسقاليەۆ رەسپۋبليكالىق جاستار اكسياسىنا قاتىسۋشىلاردىڭ ەلباسىعا ارناعان ۇندەۋىن وقىپ، باتىس قازاقستاندىقتار قولتاڭباسىن قالدىرعان «ماڭگىلىك ەل» جاستارىنىڭ جەتىستىكتەرى» كىتابىن اقتوبە وبلىسى جاستارىنىڭ وكىلى ەرحان مىرزاعۇلوۆقا تابىس ەتتى.
اۆتور: ەلجان ەرالى