ۇكىمەت مۇشەلەرى «ءداستۇردى» بۇزىپ جۇمىسقا كەشىگىپ كەلدى - اپتالىق شولۋ

استانا. قازاقپارات - وسى اپتا قازاقستاننىڭ سولتۇستىك وڭىرىندە اياق استى ايازبەن باستالدى. ادەتتەگى ۇكىمەت وتىرىسى سەيسەنبىدەن دۇيسەنبىگە اۋىسقانى سول ەدى، ءبىر كۇن بۇرىن تولاسسىز جاۋعان قاردىڭ، قاتتى بوراننىڭ سالدارىنان ۇكىمەت مۇشەلەرى جاڭا اپتانى جۇمىسقا كەشىگۋمەن باستادى، دەپ حابارلايدى قازاقپارات.

اپتا باسىندا مەملەكەت باسشىسى نۇرسۇلتان نازاربايەۆ «استانا» كلۋبىنىڭ ەكىنشى وتىرىسىنا قاتىسا وتىرىپ، ا ق ش- تاعى سايلاۋ ناتيجەسىنە وراي پىكىر ءبىلدىردى. «قازىرگى الەم دامۋىنىڭ قاراما- قايشى ترەندتەرىنە بايلانىستى تۇراقتى ءۇردىستى ۇستاپ تۇرۋ ازىرشە قيىن. جالپى، ا ق ش- تا وتكەن سايلاۋ ناتيجەسى جاعدايدىڭ جاقسارا تۇسۋىنە بەلگىلى ءبىر ءۇمىت ارتۋعا مۇمكىندىك بەرەدى. بۇل رەتتە جەتەكشى دەرجاۆالار اراسىنداعى سۇحباتتىڭ جاڭعىرۋىنا جانە ولاردىڭ اراسىنداعى نەگىزگى قاراما- قايشىلىقتار بويىنشا ىمىراعا قول جەتكىزۋگە تالپىنىسقا مۇمكىنشىلىك ارتاتىندىعىن ايتىپ وتىرمىن»، - دەدى ەلباسى اپتا باسىندا «استانا» كلۋبىنىڭ ەكىنشى وتىرىسىنا قاتىسا وتىرىپ.

سونداي-اق، ەلباسى ن. نازاربايەۆ وسى اپتادا بولگاريا رەسپۋبليكاسىنىڭ پرەزيدەنتى بولىپ سايلانعان رۋمەن راديەۆتى جەدەلحات ارقىلى جاڭا قىزمەتىمەن قۇتتىقتادى. جانە دە ەلباسى وسى اپتادا رەسەي فەدەراتسياسىنىڭ پرەزيدەنتى ۆلاديمير پۋتينمەن تەلەفون ارقىلى سويلەسە وتىرىپ، پۋتينمەن سيرياداعى جاعدايدى تالقىلادى.

سونىمەن قاتار، پرەزيدەنت ن. نازاربايەۆ اپتا سوڭىنا قاراي «استانا ەكسپو-2017» ۇلتتىق كومپانياسى» اق باسقارماسىنىڭ ءتوراعاسى احمەتجان ەسىموۆتى قابىلدادى. كەزدەسۋدە ا. ەسىموۆ ەلباسىنا «ەكسپو-2017» حالىقارالىق كورمەسىنە دايىندىق بارىسىنىڭ سوڭعى كەزەڭى تۋرالى باياندادى. «استانا ەكسپو-2017» ۇلتتىق كومپانياسى» ا ق باسقارماسىنىڭ ءتوراعاسى قۇرىلىس جۇمىستارى كەستەگە سايكەس جۇرگىزىلىپ جاتقانىن حابارلادى.

العاشقى نىساندار تاپسىرىلۋعا دايىن، سونىڭ ىشىندە جالپى كولەمى 285 مىڭ شارشى مەتر بولاتىن حالىقارالىق پاۆيلوندار بار. «فرانتسيا، گەرمانيا، قىتاي، موناكو جانە ۆەنگريا ەلدەرىنىڭ وكىلدەرىنە پاۆيلوندار بەرىلىپ تە قويدى. الدا تاقىرىپتىق پاۆيلوندار قۇرىلىسىن اياقتاۋ مىندەتى تۇر»، - دەدى ا. ەسىموۆ.

ەلباسى ەكسپو-2017 نىساندارىنىڭ ءىس- شارا وتكەننەن كەيىن دە پايدالانىلۋى قاجەتتىگىنە، سونداي- اق قاتىساتىن ەرىكتىلەردى دايىنداۋ، مادەني ءىس- شارالار وتكىزۋ، رەسپۋبليكا وڭىرلەرىنىڭ قاتىسۋى، حالىقارالىق كورمەگە وتاندىق تۋريستەردى تارتۋ ماسەلەلەرىنە نازار اۋداردى. نۇرسۇلتان نازاربايەۆقا جىل سوڭىنا دەيىن قازاقستان پاۆيلونىنىڭ قۇرىلىسىن اياقتاۋ جانە ونى ءتيىستى تاقىرىپقا سايكەس مازمۇندىق تۇرعىدان تولىقتىرۋ باعىتىندا اتقارىلىپ جاتقان جۇمىستار تۋرالى باياندالدى.

سونداي- اق، وسى اپتادا تەڭگەنىڭ «تۋعان كۇنىنە» وراي "قازاقستان تاۋەلسىزدىگىنىڭ 25 -جىلدىعى: ۇلتتىق ۆاليۋتا" تاقىرىبىنداعى كونفەرەنتسيا اياسىندا ق ر ۇلتتىق بانكىنىڭ ءتوراعاسى دانيار اقىشەۆ مەملەكەت باسشىسى نۇرسۇلتان نازاربايەۆ بەينەلەنگەن جاڭا 10000 تەڭگەلىك بانكنوتتى تانىستىردى. جاڭا بانكنوتادا ساقتار داۋىرىنەن بۇگىنگى كۇنگە دەيىنگى تاريح جيناقتالعان. ونداعى گالوگرامما - سيمۆولدىق بەينەلەر ارقىلى كورسەتىلگەن استانانىڭ پانورامالىق بەينەسىندەگى قورعانىش ەلەمەنتتەرى. ال ىنتىماقتاستىق يدەياسى قازاقستاننىڭ كارتاسى كوپۇلتتى حالىقتاردىڭ ورتاق ءۇيى رەتىندە بەينەلەنگەن.

قازاق ەلى مونۋمەنتىندەگى سامۇرىق قۇس كەشەگى مەن بۇگىنگىنىڭ ساباقتاستىعىنىڭ بەلگىسى بولىپ تابىلادى. مەرەيتولىق كۋپيۋرا پرەزيدەنتتىڭ، ۇلت كوشباسشىسىنىڭ ەل دامۋىنا سىڭىرگەن ەرەن ەڭبەگىنىڭ كورىنىسىن بەينەلەۋگە باعىتتالعانى بەلگىلى بولدى. اپتا باسىندا، دۇيسەنبى كۇنى مينيسترلەر كابينەتىنىڭ وتىرىسى كەش باستالدى.

جوعارىدا ايتقانىمىزداي، اۋا رايىنىڭ قولايسىزدىعىنا بايلانىستى، استانادا ۇلكەن كەپتەلىس ورنادى. وسىعان بايلانىستى پرەمەر- مينيستر باقىتجان ساعىنتايەۆ استانا قالاسىنىڭ اكىمى اسەت يسەكەشيەۆتەن قالاداعى جاعداي بويىنشا ەسەپ الدى. مينيسترلەر كابينەتىنىڭ كەشىگىپ باستالعان وسى اپتاداعى وتىرىسىندا ەڭ وزەكتى ماسەلەنىڭ ءبىرى - وتاندىق ۆەتەريناريا سالاسىنىڭ بۇگىنگى تىنىس- تىرشىلىگى تالقىلاندى.

ق ر اۋىل شارۋاشىلىعى ۆيتسە- ءمينيسترى قايرات ايتۋعانوۆ حابارلاعانداي، ءسىبىر جاراسىنا قارسى ۆاكتسينانىڭ سىناعى بويىنشا قىلمىستىق ءىس قوزعالعان. دەگەنمەن، ۇكىمەت باسشىسى باقىتجان ساعىنتايەۆتىڭ ايتۋىنشا، اۋىل شارۋاشىلىعى مينيسترلىگى ۆەتەرينارلىق قاۋىپسىزدىك بويىنشا ەسكەرتۋ كوپ جاساي بەرمەي، ناقتى شارالاردى قولعا الۋى قاجەت. "مىناۋ ۆاكتسينا تۋرالى ايتىپ جاتىرسىزدار. كوپ پروبلەما سودان شىعىپ وتىر عوي. نەگىزىنەن، ونى حالىقارالىق تالاپتارعا ساي كەلتىرۋ كەرەك.

ەگەر ول بولمايتىن بولسا، وندا رەگلامەنت قاجەت شىعار. جاڭا ايتۋعانوۆ (اۋىل شارۋاشىلىعى ۆيتسە- ءمينيسترى - اۆت. ) ايتىپ ءوتتى، مىنە، ەسكەرتۋ جاسايمىز دەپ، نە ول "ەسكەرتەمىز" دەگەن؟ ونىڭ ءبارى - "دەجۋرنىي" سوزدەر. ءسىز ەسكەرتەسىز دە، قوياسىز. ولار بولسا، ءوز ىستەرىن جالعاستىرا بەرەدى. ءسوزدى قايتەسىز، ناقتى جۇمىس كەرەك، اسقار يسابەك ۇلى (اۋىل شارۋاشىلىعى ءمينيسترى - اۆت. ).

ولاردى ءۇيتىپ ساۋساقپەن قورقىتىپ، كەلەسى جولى قۇرتامىز، ۇيتەمىز- بۇيتەمىز دەگەنشە، قاجەتتى قۇجاتتاردىڭ بارلىعىن بولىپ، زاڭدى تۇردە جۇمىس جۇرگىزۋ كەرەك. ءتيىمسىز ۆاكتسينا بولسا، كىم الدى، سونى تارتىپكە شاقىرۋ قاجەت. جاڭا ايتىپ وتىرسىزدار عوي، قاجەتتى قۇزىرلى ورگاندارعا ماتەريال بەرىپ جاتىرمىز دەپ. ارينە، ۇلكەن شارۋا بۇل. قالعان بەس وبلىس بويىنشا ءسىبىر جاراسىنان شىعۋىمىز قاجەت"، - دەپ اتاپ كورسەتتى ب. ساعىنتايەۆ اپتا باسىنداعى ۇكىمەت وتىرىسىندا.

سونىمەن قاتار، ۇكىمەت وتىرىسىنان كەيىن ق ر ينۆەستيتسيالار جانە دامۋ ءمينيسترى جەڭىس قاسىمبەك قاراعاندى وبلىسى سارانسك شاحتاسىنداعى اپاتقا بايلانىستى بريفينگ وتكىزىپ، قازا تاپقان كەنشىلەردىڭ وتباسىلارىنا وتەماقىنىڭ بەرىلەتىنىن جەتكىزدى. ءمينيستردىڭ ايتۋىنشا، بۇگىندە اتالعان توتەنشە جاعداي بويىنشا ارنايى كوميسسيا قۇرىلىپ، وقيعا ورنىندا جۇمىس جۇرگىزىلۋدە. «كۇنى كەشە ءبىز قاراعاندىدا كوميسسيانىڭ كەڭەسىن وتكىزدىك. تەرگەۋ امالدارىنا ون كۇن بەرىلدى.

مەنىڭشە، كەلەسى سەنبىگە دەيىن ءبىز اپاتتىڭ ناقتى سەبەبىن ايتا الامىز. ارينە، الدىن الا بولجام بار. دەگەنمەن، بىزگە ناقتى مالىمەت كەرەك»، - دەدى ج. قاسىمبەك. سونداي- اق، وسى اپتادا قازاقستاننىڭ استاناسىنا سەربيا پرەمەر- ءمينيسترى الەكساندر ۆۋچيچ كەلدى. قۇرمەتتى قوناقپەن كەزدەسكەن ق ر ۇكىمەت باسشىسى باقىتجان ساعىنتايەۆ كەلىسسوزدەر بارىسىندا ەكىجاقتى ىنتىماقتاستىق ماسەلەلەرىنە نازار اۋداردى.

«ءسىزدى جانە بىرگە ەرىپ كەلگەن دەلەگاتسيانى قازاق جەرىندە قابىلداپ وتىرعانىمىزعا قۋانىشتىمىز. كەشە ءبىزدىڭ ەلوردامىزدىڭ كورىنىسىنە ءتانتى بولعانىڭىزدى ايتقان ەدىڭىز. استانا قازىرگى سۋىق پەن قارعا قاراماستان، كەلبەتتى شاھار. ءسىز قازاقتىڭ ءداستۇرلى تاعامدارىنان ءدام تاتتىڭىز جانە ءبىزدىڭ ۇلتتىق تاعامدار مەن ەلىمىز ۇنايتىنىن بايقادىق»، - دەدى ساعىنتايەۆ سەربيا پرەمەر- مينيسترىنە قاراتىپ ايتقان سوزىندە.

ءوز كەزەگىندە سەربيا ۇكىمەتىنىڭ باسشىسى استانادا ەلەكتروتەحنيكا مەن راديوتەحنيكا سالاسىنداعى ونەرتاپقىش، ينجەنەر، فيزيك نيكولا تەسلانىڭ اتىنداعى كوشەنىڭ سالتاناتتى اشىلۋىنا قاتىستى. وسى اپتادا حالىقارالىق سپورت جارىستارىنىڭ جۇلدەگەرلەرىنە بەرىلەتىن سىياقى مولشەرى بەلگىلەندى. وسىلايشا، ۇكىمەت قاۋلىسىنا سايكەس جازعى، قىسقى وليمپيادا ويىندارى مەن پاراليمپيادادا جەتكەن جەتىستىكتەر ءۇشىن بەرىلەتىن سىياقى مولشەرى تەڭەستىرىلدى. مىسالى وليمپيادا جانە پاراليمپيادا چەمپيوندارى 250 مىڭ ا ق ش دوللارىن الاتىن بولسا، كۇمىس جۇلدەگەر 150 مىڭ دوللار، ال قولا جۇلدەگەر 75 مىڭ دوللارعا يە بولادى.

وليمپيادا جانە سۋردليمپيادا ويىندارىندا 6-ورىنعا دەيىنگى ناتيجە كورسەتكەن سپورتشىلار ماراپاتتالادى. سونداي- اق قاۋلىدا ەرەسەكتەر مەن جاستار اراسىنداعى الەم چەمپيوناتى، ازيا ويىندارى مەن ازيا چەمپيوناتتارى، جازعى جانە قىسقى ۋنيۆەرسيادا جۇلدەگەرلەرىنىڭ سىياقى مولشەرى بەلگىلەندى.

اپتا سوڭىندا وتكەن ءوڭىرلىڭ مەديا- فورۋمعا قاتىسا وتىرىپ، ق ر اقپارات جانە كوممۋنيكاتسيالار ءمينيسترى داۋرەن ابايەۆ ايماقتىق ب ا ق- تاردىڭ بۇگىنگى ءرولى مەن وزەكتى ماسەلەلەرىن اتادى. د. ابايەۆ اتاپ وتكەندەي، اقپارات جانە كوممۋنيكاتسيلار مينيسترلىگى مەملەكەت باسشىسىنىڭ تاپسىرماسى بويىنشا وڭىرلىك ماسس- مەديانى جاڭا دەڭگەيگە كوتەرۋ شارالارىن قولعا الماق ەكەن.

اۆتور: كەنجەكەي توقتامۇرات قىزى