ەڭ جەدەل سايتتاردىڭ ءوزى الەۋمەتتىك جەلىلەرگە ىلەسە الماي وتىر - ابايەۆ
دەپ حابارلايدى قازاقپارات.
ءمينيستردىڭ ايتۋىنشا، بۇگىنگى كۇنى ەلىمىزدە 3 مىڭعا جۋىق اقپارات قۇرالدارى تىركەلگەن بولسا، سونىڭ 80 پايىزىن ايماقتىق رەسۋرستار قۇرايدى. وسىنىڭ ءوزى وڭىردەگى ماسس- مەديانىڭ ىقپالى كۇشتى ەكەندىگىن كورسەتەدى. الايدا بۇگىنگى ۋاقىت بۇل سالاعا ايرىقشا كوزقاراستى تالاپ ەتىپ وتىر. ونىڭ بىردەن- ءبىر سەبەبى - جاڭا تەحنولوگيالاردىڭ قارقىندى دامۋى مەن ينتەرنەتتىڭ قانات جايۋى.
«باسقاسىن ايتپاعاندا، الەۋمەتتىك جەلىلەردىڭ ءوزى ءداستۇرلى اقپارات قۇرالدارىن نارىقتان ىعىستىرۋدا. ەڭ جەدەل سايتتاردىڭ ءوزى اقپارات تاراتۋدا مەسسەندجەرلەر مەن الەۋمەتتىك جەلىلەردىڭ جىلدامدىعىنا ىلەسە الماي وتىر. بۇگىندە كەز كەلگەن ادام كەز كەلگەن وقيعانى تەلەفون ارقىلى تىكەلەي ەفيردە تاراتاتىن دارەجەگە جەتتى. وزدەرىڭىز مۇنى جاقسى بىلەسىزدەر»، - دەدى مينيستر.
وسى رەتتە ول وسىنداي جويقىن باسەكەدە ۇتىلماۋ ءۇشىن ايماقتىق مەديانىڭ الدىندا ءبىر عانا جول بار ەكەندىگىن باسا ايتتى.
«ول - زامانعا ساي كۇردەلى وزگەرىستەر جاساۋ. قازىرگى كۇننىڭ تالابى اقپاراتتى جەدەل تاراتۋ عانا ەمەس وقىرمانعا نە قاجەت ەكەندىگىن ءدال تاۋىپ، اۋديتوريامەن تىكەلەي بايلانىس ورناتا ءبىلۋ. سونىمەن قاتار ەلدىڭ مۇددەسىن، حالىقتىڭ مۇڭ- مۇقتاجى مەن باسقا دا وزەكتى ماسەلەلەردى تەرەڭ ساراپتاپ، مەملەكەت ساياساتىن، باعىت- باعدارىن حالىققا ءتيىمدى جەتكىزۋ كەرەك. قورىتا ايتقاندا، قوعامداعى ىقپالىن ساقتاپ قالۋ ءۇشىن، وڭىرلىك مەديانىڭ دەڭگەيى جوعارى، ءسوزى ءوتىمدى بولۋى كەرەك. مىنە، وسىعان قاتىستى الدىمىزدا ۇلكەن ءىس- شارالاردى جۇزەگە اسىرۋ مىندەتى تۇر»، - دەدى ابايەۆ.
ايت كەتەيىك، شاراعا پارلامەنت دەپۋتاتتارى، پرەزيدەنت اكىمشىلىگىنىڭ وكىلدەرى، رەسپۋبليكالىق جانە وڭىرلىك ب ا ق باسشىلارى، جۋرناليستەرى، ورتالىق جانە جەرگىلىكتى اتقارۋشى ورگانداردىڭ وكىلدەرى، رەسەيدىڭ تانىمال تەلەجۋرناليستەرى قاتىسۋدا. ءۇش سەسسيامەن وتەتىن فورۋم بارىسىندا قازاقستاندىق جۋرناليستەر مەن قوعامدى الاڭداتاتىن وزەكتى ماسەلەلەر تالقىلانۋدا.
اۆتور: مارلان جيەمباي