ۇزىناعاشتاعى اعايىندىلاردىڭ ءولىمى: سوتتالۋشىلار ەكى باپ بويىنشا ايىپتاۋلارمەن كەلىسپەيدى - فوتو
ءبىرىنشى سوت تىڭداۋىنا مارقۇمداردىڭ 50 دەن اسا تۋىسى وزگە قالالاردان كەلدى. سوتقا ۇزىناعاشتىڭ ەكى تۇرعىنى مۇرات وڭالبايەۆ پەن تالعات سۇلەيمەنوۆ تارتىلىپ وتىر. ولارعا ق ر قىلمىستىق كودەكسىنىڭ 99 ("ادام ءولتىرۋ")، 192 ("قاراقشىلىق") جانە 202-باپتارى ("بوتەننىڭ مۇلكىن قاساقانا جويۋ نەمەسە ءبۇلدىرۋ") بويىنشا ايىپ تاعىلعان.
سونداي-اق، قىلمىستى حابارلامادى دەپ جەرگىلىكتى مالشى باقىت بايقاسىموۆ ايىپتالىپ وتىر. سويتسەك، ول 2000 -جىلى توناۋ جانە قاراقشىلىق باپتارى بويىنشا قاراعاندى وبلىسىندا سوتتادىپ، بەس جىل وتىرىپ شىققان ەكەن.
سوتتالۋشىلار مۇرات وڭالبايەۆ پەن تالعات سۇلەيمانوۆ جانە ولاردىڭ ادۆوكاتى مەركەبەك ماكەنبايەۆ.
«مەن ءوز كىنامدى مويىندايمىن، ءبىراق ءىشىنارا. 192 جانە 202-باپتار بويىنشا تاعىلعان ايىپپەن كەلىسپەيمىن. بۇل الدىن الا كەلىسۋ بولعان جوق، كولىكتى ورتەگەن جوقپىز. ۇقىپسىزدىقتان بولدى»، - دەپ مالىمدەدى سۇلەيمانوۆ.
ال وڭالبايەۆ وزىنە تاعىلعان ەشبىر ايىپپەن كەلىسپەيتىنىن مالىمدەدى. قىلمىستىڭ كۋاگەرى، ياعني جەرگىلىكتى مالشى بايقاسىموۆ تا ايىپپەن كەلىسىپ وتىرعان جوق. ايتۋىنشا، ول قىلمىس جايلى قۇقىق قورعاۋ ورگاندارىنا ءوزىنىڭ جانە جاقىندارىنىڭ ومىرىنە الاڭداعاندىقتان حابارلاماعان.
ءبىرىنشى سوت تىڭداۋىنا 50 شاقتى ادام كەلدى.
وتىرىستا ءبىرىنشى بولىپ مەملەكەتتىك ايىپتاۋشى ءسوز سويلەدى. ول قاندى قىلمىستىڭ حرونولوگياسىن باياندادى. ونىڭ سوزىنە قاراعاندا، سوتتالۋشىلار اعايىندىلاردى تاۋ بوكتەرىندە ءبىر- بىردەن ولتىرگەن. الايدا مارقۇمداردىڭ تۋىسىنىڭ ءبىرى بۇل نۇسقامەن كەلىسپەيتىنىن ايتتى. قازا تاپقان جارقىنبەك دولدان ۇلىنىڭ اعاسىنىڭ ايتۋىنشا، ءۇش ەر ادام وق اتىلعاندا سەزىكتەنۋى ءتيىس ەدى. "مۇندا قىلمىسكەرلەر تاۋ بوكتەرىنە جاقىنداعاندا 16 باس مالدى ءۇش رەيسپەن جەكە-جەكە تاسىعان دەپ جاتىر. باستاپقىدا اعايىندىلاردىڭ بىرىمەن تاسىعان، كەيىن ەكىنشىسىن جانە وسىدان سوڭ ءۇشىنشىسىن اپارىپ ولتىرگەن دەيدى. ءبىراق بۇل جىگىتتەردىڭ مال ساۋداسىمەن اينالىسىپ جۇرگەنىنە تالاي جىل بولدى. ولار مالدى شاتقالعا اپارۋعا كەلىسپەس ەدى. ولاردى زورلاپ اپارعان. بارعان جەرلەرىندە وسى ەكى قىلمىسكەردىڭ بانداسى بولعان، ولاردى دا تۇرمەگە قاماۋ كەرەك»، - دەدى مارقۇمنىڭ اعاسى.
ايتا كەتەيىك، مارقۇمداردىڭ تۋىستارى ءاربىر وتباسىعا 15 ميلليون تەڭگەدەن وتەماقى تالاپ ەتىپ وتىر.
ەسكە سالايىق، كوكسۋ اۋدانىنىڭ ءۇش تۇرعىننىڭ ءولىمى قوعامدا قىزۋ تالقىلانىپ جاتىر. 17 -قىركۇيەكتە ولار شىعىس قازاقستان وبلىسى تارباعاتاي اۋدانىنان 40 باس مالدى الىپ شىققان. ولار مالدى ۇزىناعاشقا اپارىپ ساتقىسى كەلگەن. ءبىراق ۇيىنە ورالماعان. بىرنەشە كۇننەن كەيىن ولاردىڭ زورلىق بەلگىلەرى بار ءمايىتى ۇزىناعاشتان 200 شاقىرىم جەردەن تابىلدى. 26 -قىركۇيەكتە كۇدىكتىلەردىڭ ۇستالعانى بەلگىلى بولدى.