نازاربايەۆ حالىقارالىق ساراپشىلارمەن ەۋرازيانىڭ وزەكتى ماسەلەلەرىن تالقىلاۋدا
حالىقارالىق دەڭگەيدەگى شاراعا الەمنىڭ 50 دەن استام ساراپشىسى، ساياسي جانە قوعام قايراتكەرلەرى، 21 ەلدىڭ عالىمدارى، سونىمەن بىرگە جەتەكشى قازاقستاندىق ساراپشىلار قاتىسۋدا.
ايتا كەتەرلىگى، كلۋب وتىرىسى كەشە باستالعان بولاتىن. ول كۇنى ساراپشىلار وڭىردەگى ەلدەردىڭ ۇستانىمى، ەكونوميكالىق دامۋ، ينفراقۇرىلىم، رەسۋرستىق سەكتور پروبلەمالارى، ادام كاپيتالىن دامىتۋ جانە وزگە دە وزەكتى ماسەلەلەردى جان-جاقتى تالقىلاعان-دى. ال بۇگىن حالىقارالىق ساراپشىلار مەملەكەت باسشىسىمەن كەزدەسۋدە.
ەرتەڭ جانە ودان ارعى كۇنى كلۋب وتىرىسىنا قاتىسۋشىلار «ەۋرازيا توعىسىندا: وڭىرلىك پروبەلمالارعا نەگىزگى الەمدىك ويىنشىلاردىڭ كوزقاراسى»، «ەۋرازيا رەسۋرستارى: «التىن عاسىردىڭ» سوڭى ما؟»، «ەۋرازيا ادامدارى: تۇراقسىزدىق كوزى مە الدە بايلىق كوزى مە؟» سىندى سەسسيالاردا ەۋرازيا وڭىرىنە قاتىستى وزەكتى ماسەلەلەردى جان-جاقتى تالقىلاماق.
استانا كلۋبى ق ر تۇڭعىش پرەزيدەنتى - ەلباسى قورىنىڭ جەتەكشى حالىقارالىق عىلىمي ورتالىقتار قىتاي قازىرگى زامانعى حالىقارالىق قاتىناستار اكادەمياسى، گەرمانيا سىرتقى ساياسات كەڭەسى، رەسەي حالىقارالىق ىستەر كەڭەسى جانە حالىقارالىق بەيبىتشىلىك ءۇشىن كارنەگي قورىمەن بىرلەسىپ قۇرعان حالىقارالىق پىكىرتالاس الاڭى سانالادى. استانا كلۋبىنىڭ ءبىرىنشى وتىرىسى 2015-جىلعى قاراشادا الەمنىڭ 15 ەلىنەن كەلگەن 47 ساراپشىنىڭ قاتىسۋىمەن وتكەن ەدى. ونىڭ بارىسىندا ەۋرازيا گەوەكونوميكاسىنىڭ نەگىزگى اسپەكتىلەرى، عالامدىق جانە وڭىرلىك ويىنشىلاردىڭ مۇددەلەرى، ەكونوميكالىق قاۋىپ-قاتەرلەر مەن مۇمكىندىكتەر ماسەلەلەرى تالقىلانعان بولاتىن.