20 شاقتى ەرەۋىلشىگە سول جەردە مەديتسينالىق كومەك كورسەتىلگەن، دەپ حابارلايدى 24.kz.
كورەيا باسشىسى مەملەكەتتى باسقارۋدى ءوزىنىڭ جاقىن قۇربىسى چحۆە سۋن شيل حانىمعا سەنىپ تاپسىردى دەپ ايىپتالۋدا. سەۋلدەگى باستى الاڭ - كۆانحۆامۋنعا تاڭەرتەڭنەن بەرى اعىلعان كىسى قاراسى كوپ. 12- قاراشادا پرەزيدەنتكە قارسى اكسيا وتكىزۋ جوسپارىن كوپتەگەن ۇكىمەتتىك ەمەس ۇيىم الدىن الا جاريالاعان بولاتىن. ال، ۇكىمەت ەل ازاماتتارىنا قوعامدىق ءتارتىپتى بۇزباۋلارىن سۇراعان ەدى.
قازىر الاڭعا شىققان كوپشىلىكتى 260 مىڭ پوليسەي قاداعالاپ، ەل استاناسىنداعى ورتالىق كوشەلەر تولىعىمەن جابىلدى. سەۋل اكىمشىلىگى ورنالاسقان الاڭعا 12 - قاراشا كۇنى مىڭداعان ادام جينالدى. ولاردىڭ ءبارى دە پرەزيدەنتتىڭ اتىن اتاپ، قولدارىنا تۋ مەن شىراق ۇستاپ، پلاكاتتارمەن شىقتى. وندا «پاك كىن حە، كەت!» دەپ جازىلعان.
ميتينگ الاڭدا ءوتىپ جاتقان كونسەرت سەكىلدى. اندەتىپ، كوڭىل كوتەرگەن كوپشىلىك پرەزيدەنتتىڭ قىزمەتتەن كەتۋىن عانا سۇراپ جار سالۋدا. مۇنشالىقتى كوپ ادامنىڭ شەرۋگە شىققانىنا كوشە ساۋداگەرلەرى ريزا. ال سەۋل مەتروسىندا ينە شانشار ورىن جوق.
پاك كىن حە ءوز قاتەلىگىن مويىنداپ، تانىس ايەلدى باسشىلىق قىزمەتكە اكەلگەنىنە وكىنىشىن ءبىلدىردى. ءتىپتى ەكى مارتە حالىقتان كەشىرىم سۇرادى. الايدا بۇگىنگى جاعدايدان كەيىن حالىقتىڭ پرەزيدەنتتەن كوڭىلى ابدەن قالعان سەكىلدى. ونىڭ ەل الدىنداعى بەدەلى ءتۇسىپ كەتتى.
«مەملەكەت باسشىسىنا تاعىلعان ايىپ وتە اۋىر. پاك كىن حە ماسەلەنىڭ ءبارىن ۇكىمەت ارقىلى ەمەس، ءوز دوسىنىڭ اقىلىمەن شەشىپ وتىرعان. چحۆە سۋن شيل قۇپيا قۇجاتتارعا دا قول جەتكىزگەن. سونىمەن قاتار ول ءىرى كورپوراتسيالاردى ءوز باقىلاۋىنداعى قورعا قارجى اۋدارۋعا ماجبۇرلەگەن دەگەن اقپارات تا بار»، - دەيدى كورەيا رەسپۋبليكاسى ۇلتتىق اسسامبلەياسىنىڭ دەپۋتاتى لي ۆون ۋك.
ادامدار ۇيلەرىنە قايتۋعا اسىعار ەمەس. ولار پرەزيدەنت سارايى چونحۆادەنى قورشاپ الىپ، نارازىلىق اكسياسىن جالعاستىرىپ جاتىر. وڭتۇستىك كورەياداعى بۇل شەرۋ بىرنەشە كۇنگە سوزىلاتىن سەكىلدى.