باكۋدە تۇرىپ جاتقان قانداستارىمىزبەن كەزدەسۋ ءوتتى - فوتو
بۇل تۋرالى «قازاقپارات» ح ا ا ءتىلشىسى حابارلايدى. «تاۋەلسىزدىكتىڭ 25 جىلدىعىنا ارنالعان جوبانىڭ ماقساتى - شەتەلدە تۇراتىن وتانداس جاستار مەن جاس دارىنداردىڭ شىعارماشىلىعىن دامىتۋعا ىقپال ەتۋ، تالانتتى جاستاردى ىزدەستىرۋ، ولارعا ق ر پرەزيدەنتى نۇرسۇلتان نازاربايەۆتىڭ جولداۋى مەن «100 ناقتى قادام» ۇلت جوسپارىن ءتۇسىندىرۋ»، - دەدى قوعامدىق بىرلەستىگىنىڭ ءتورايىمى انار ءشامشادينوۆا.
شەتەلدەگى قازاق دياسپورامەن كەزدەسۋلەر، ماڭعىستاۋ وبلىستىق ىشكى ساياسات باسقارماسىنىڭ «شەتەلدە تۇراتىن وتانداستارمەن الەۋمەتتىك جانە مادەني بايلانىستاردى دامىتۋ جونىندەگى ءىس- شارالاردى وتكىزۋ» جوباسى اياسىندا وتكىزىلۋدە.
ايتا كەتكەن ءجون، بۇل ەلىمىز بويىنشا العاشقى قولعا الىنىپ جاتقان جوبا، سوندىقتان باستاپقىدا تانىسۋ جانە اقپاراتتاندىرۋ بويىنشا شەتەلدەگى قازاق دياسپورا وكىلدەرى اراسىنان پۋل قۇرىپ، قارىم- قاتىناستى نىعايتۋعا باسا نازار اۋدارىلىپ وتىر. بۇعان دەيىن ماسكەۋدە قازاق دياسپوراسىمەن كەزدەسۋ ۇيىمداستىرىلعان، سونداي-اق رەسەيدە وقيتىن مىڭداعان قازاقستاندىق ستۋدەنتتەرمەن جۇزدەسكەن.
ءتورايىمنىڭ ەرەكشە اتاپ وتكەنى، قانداستارىمىزدىڭ وزگە مەملەكەتتەردە دە ۇلكەن دەڭگەيگە جەتىپ، بىلىمدىلىگى مەن بىلىكتىلىكتەرىنىڭ ارقاسىندا ءوز ورىندارىن ويىپ العاندارى. كەزدەسۋ بارىسىندا ماڭعىستاۋ وبلىسىنىڭ ساياسي- الەۋمەتتىك جەتىستىكتەرى تۋرالى بەينەروليك كورسەتىلدى. زالداعى قاتىسۋشىلاردى ەرەكشە تولقىتقانى، ول - دومبىرانىڭ كۇمبىرلەگەن ءۇنى. ولار «سۇگىردىڭ تەرمەسىن» ورىنداعان «جاڭا ءومىر» گازەتىنىڭ ءتىلشىسى مۇراتبەك قادىربايەۆتىڭ جانە «اتامەكەن» ءانىن شىرقاعان ق ر مادەنيەت سىڭىرگەن قايراتكەرى نۇرياش وسپانوۆانىڭ ونەرلەرىنە ءتانتى بولدى.
بەكباۋ تايمانوۆ