شەتەلدە تۇراتىن بۇركىتشى قازاق قىز تۋرالى فيلم «وسكارعا» ۇسىنىلماق - كەسكىن

استانا. قازاقپارات - ءبارى بۇركىتشىلىككە ءتانتى اتاقتى امەريكالىق رەجيسسەر وتتو بەللدىڭ يزرايلدىك فوتوگراف اشەر سۆيدەنسكي تۇسىرگەن ايشولپاننىڭ سۋرەتىن كورگەن كەزدەن باستالىپتى.

سول ساتتە وعان ايشولپان تۋرالى فيلمنىڭ يدەياسى كەلەدى. ەكى جىلعا سوزىلعان جۇمىس اياقتالىپ، وتتو بەلل «بۇركىتشى قىز» (The Eagle Huntress) دەرەكتى فيلمىن قازان ايىندا كوپشىلىكتىڭ نازارىنا ۇسىندى.

فيلم نيۋ-يورك پەن لوس-اندجەلەس كينوتەاترلارىندا 28- قازاننان كورسەتىلە باستادى. ءبىر جارىم ساعاتتىق تۋىندى اعىلشىنشا جانە كەيىپكەرلەردىڭ ءسوزى سۋبتيترلەرمەن بەرىلگەن. بۇركىتپەن اڭ اۋلاۋ ەر ادامنىڭ ءىسى سانالاتىنى جايلى ەستىگەن فيلم اۆتورلارى اۋىل اقساقالدارىنا بارىپ، بۇل جايدىڭ ءمانىن سۇراعان.

سونىمەن قاتار، وتتو بەلل ءداستۇردى بىلمەيتىن كورەرمەن دۇرىس تۇسىنبەي قالۋى مۇمكىن دەگەن ويمەن اڭشىلىقتىڭ كەي كورىنىستەرىن قىسقارتقانىن ايتقان. فيلمنىڭ پروديۋسەرى ءارى دىبىستاۋشىسى «جۇلدىزدى سوعىس» («زۆەزدنىە ۆوينى») اكتريساسى دەيزي ريدلي بولدى. وتتو بەلل Business Insider پورتالىنا بەرگەن سۇحباتىندا ريدليدىڭ ايشولپاننىڭ وقيعاسىنا ەرەكشە تولقىعانىن ايتقان.

Deadline باسىلىمىنا بەرگەن سۇحباتتا دەيزي ءوزى دە: «ايشولپاننىڭ وقيعاسى ماعان ەرەكشە اسەر ەتتى. سوندىقتان وسى فيلمنىڭ ءبىر قاتىسۋشىسى بولعىم كەلدى. جوباعا قاتىسقانىمدى ماقتان ەتەمىن»، - دەدى. فيلمدى لاتىن امەريكاسى، جاڭا زەلانديا، گەرمانيا، اۋستراليا مەن ازيادا كورسەتۋ قۇقىعى Sony كومپانياسىنا تيەسىلى. 20th Century Fox Animation كارتيناعا رەمەيك ءتۇسىرۋ تۋرالى كەلىسوزدەر جۇرگىزىپ جاتىر.

ءبىراق بۇل يدەيانى جۇزەگە اسىرۋ ءۇشىن Sony Pictures كومپانياسىنىڭ كەلىسىمى كەرەك. ەكەۋى باسەكەلەس بولعاندىقتان، ازىرگە بولاشاعى بەلگىسىز. دەرەكتى فيلم نەگىزىندە انيماتسيالىق فيلم جاساۋ قۇقىعى 2 ميلليون دوللارعا باعالانىپ وتىر.

بۇل قۇقىق اياسىنا، سونداي-اق، الەمنىڭ ءبىرقاتار ەلدەرىنە تاراتۋ مۇمكىندىگى دە كىرەدى. ايشولپان قازىر بايان- ولگەي قالاسىنداعى موڭعول-تۇرىك كوللەدجىندە 10-سىنىپتا وقيدى. 1- قاراشا كۇنى «قازاقستاندىق بۇركىتشى قىز» دەپ ماقالا جاريالاعان «New York Times» ەكى كۇننەن كەيىن قاتەلەسكەندەرىن جازىپ، موڭعوليادا تۇراتىن قازاق قىزى ەكەنىن ايتىپ، تۇزەتۋ جاريالادى.

فيلم تۋرالى باسقا دا الەمدىك ب ا ق جازىپ جاتىر. كەيبىرى ايشولپاندى «عاسىرلار ءداستۇرىن بويىنا سىڭىرگەن ارۋ» اتادى. ايشولپاندى ۇياڭ، نازىك ءارى باتىر قىز دەگەن North West Herald امەريكالىق باسىلىمى «بۇل فيلم كورەرمەندى ايشولپاننىڭ الەمىنە اپارادى. ايشولپان وسكەندە دارىگەر بولۋدى ارماندايدى. ءبىراق بۇركىتشىلىكتى تاستاعىسى كەلمەيدى. «بۇركىتشى قىز» جاستارعا شابىت بەرەتىن، اسەرلى پەيزاجىمەن جۇرەكتەرگە جىلۋ بەرەتىن فيلم» دەپ جازدى. Daily News «موڭعوليانىڭ باتىسىنداعى التاي تاۋلارىندا تۇسىرىلگەن فيلم بۇركىتپەن ساياتشىلىق جاساۋ ءداستۇرىن كورسەتەدى. بۇل - كوشپەندى قازاقتاردىڭ ۇرپاقتان ۇرپاققا مۇرا ەتىپ كەلە جاتقان ونەرى. ايشولپان - وسى ءداستۇردى مەڭگەرگەن ەرەكشە قىز» دەپ جازدى. ايتا كەتەيىك، وتتو بەلل «بۇركىتشى قىزدى» «وسكارعا» ۇسىنعالى وتىر، دەپ جازادى «ەگەمەن قازاقستان» باسىلىمى.