پاۆلودارلىقتار ورماندى جەر سەرىگىنىڭ كومەگىمەن قورعاۋدى ۇسىندى
«نۇر وتان» پارتياسى پاۆلودار وبلىستىق فيليالىندا وتكەن پارتيانىڭ وبلىستىق فيليالى پارتيالىق باقىلاۋ كوميسسياسى مەن سىبايلاس جەمقورلىققا قارسى ارەكەت قوعامدىق كەڭەسىنىڭ بىرلەسكەن وتىرىسىندا پاۆلودار وبلىسىنداعى ورمان قورىنىڭ ساقتالۋى ماسەلەسى قارالدى.
2015-جىلدىڭ جەلتوقسان ايىندا پارتيانىڭ وبلىستىق فيليالىنىڭ ق ر اۋىل شارۋاشىلىعى مينيسترلىگىنە جولداعان ۇسىنىسى بويىنشا بيىلعى جىلدىڭ 1- قاڭتارىنان «ەرتىس ورمانى» مەملەكەتتىك ورمان تابيعي رەزەرۆاتىنداعى» اعاش كەسۋدىڭ بارلىق تۇرلەرىنە موراتوري جاريالانعان ەدى.
الايدا موراتوريگە قاراماستان ورمانداعى اعاش كەسۋ فاكتىلەرى ءالى دە ورىن الۋدا. «ەرتىس ورمانى» م و ت ر باس ديرەكتورىنىڭ مىندەتىن اتقارۋشى تىلەك مۇقانوۆتىڭ جەتكىزگەن اقپاراتىنا سايكەس، بيىلعى جىلدىڭ باسىنان بەرى رەزەرۆاتتا ءوز ەركىمەن 26 تەكشە مەتر كولەمىندەگى اعاش كەسۋدىڭ 8 فاكتىسى ورىن العان.
ولاردىڭ التاۋى بويىنشا قىلمىستىق ءىس قوزعالىپ، 32 ادام تارتىپتىك جاۋاپكەرشىلىككە تارتىلدى. پوليتسەيلەردىڭ ايتۋىنشا، ورمان شارۋاشىلىعىندا قۇقىق بۇزۋشىلىقتاردىڭ سانى كۇرت تومەندەۋدە. كوميسسيا مۇشەلەرىمەن وسى باعىتتاعى جۇمىستى ءارى قاراي جەتىلدىرۋ ماقساتىندا ءتۇرلى ۇسىنىستار ايتىلدى.
مىسالى، پاۆلودار وبلىستىق پروكۋراتۋراسى 1-باسقارما باستىعىنىڭ مىندەتىن اتقارۋشىسى باقىتجان ءالياقپاروۆ ورمان قورعاۋ قىزمەتكەرلەرىنە شەتەل تاجىريبەسىن زەرتتەپ، جۇمىستا زاماناۋي تەحنلوگيالار قولدانۋعا شاقىردى. «بىزدەر ءالى ⅩⅩ عاسىردا قالىپ كەلەمىز. ورماندى قورعاۋ سالاسىندا الدەقايدا ءتيىمدى زاماناۋي تەحنولوگيالار بار. ماسەلەن، ۇلان-عايىر تەرريتورياعا يە كانادادا بۇل جۇمىستى جەر سەرىكتەرى اتقارادى. بۇل الدەقايدا ءتيىمدى، ءارى ارزان. شەتەلدىك سپۋتنيكتەرىنىڭ تۇسىرىلىمدەرىنە كەلىسىم-شارت نەگىزىندە تاپسىرىس بەرۋگە بولادى. بۇعان وبلىس قاراجاتىنان 70 ميلليون تەڭگە كەرەك»، - دەپ اتادى باقىتجان ءالياقپاروۆ.