ەسكى ۇيالى تەلەفوننان التىن الۋعا بولادى

استانا. قازاقپارات - ىستەن شىققان ۇيالى تەلەفونداردى پايدا كوزىنە اينالدىرۋعا بولادى.

قالاي دەيسىزدەر عوي؟ ەندەشە، تومەندەگى مالىمەتتەرگە نازار اۋدارىڭىزدار.

ۇيالى بايلانىس قۇرالدارىن جاساۋ ءۇشىن مىستان باستاپ التىن مەن كۇمىسكە دەيىنگى شيكىزاتتىڭ كوپ قورى قاجەت.

شەتەلدىك مامانداردىڭ ايتۋىنشا، ۇيالى تەلەفونداردىڭ ءبىر تونناسىنان 280 گرامم التىن، 140 گراممنان پلاتينا مەن پاللادي جانە 140 كەلى مىس الۋعا بولادى.

ياعني، ۇيالى تەلەفوندى جاساۋ ءۇشىن مىس كوپ پايدالانىلادى. مىستىڭ ۇيالى تەلەفونداعى ورتاشا مولشەرى - 8,5 گرامم. كەي جاعدايلاردا 15 گرامعا دەيىن جەتەدى.

بۇگىندە الەم بويىنشا 50 ملن توننا ەسكى ەلەكتروندى قالدىقتار جينالعان. ال، قازاقستاندا ەلەكتروندى قالدىقتاردى وڭدەۋمەن اينالىساتىن وننان استام زاۋىت بار. بۇل كاسىپورىندار ۇيالى تەلەفون، ماگنيتولا، كەڭسە تەحنيكاسى سىندى شاعىن قۇرالداردى ۋتيليزاتسيالاپ، كادەگە جاراتۋمەن اينالىسادى. دەمەك، ەلىمىزدە ەسكى تەلەفونداردان التىن جانە باسقا باعالى زاتتاردى الىپ، ولاردى كادەگە جاراتۋعا مۇمكىندىك مول.