ءبىز رەسەي مەملەكەتىندە ءومىر سۇرگەنىمىزبەن، قازاقتىڭ ەجەلگى مەكەنىندە تۇرامىز - داريا سۇبحانقۇلوۆا

استانا. قازاقپارات- رەسەيلىك قازاق قازاقستانعا كەلگەندە انا ءتىلىن بىلمەي قينالعان سوڭ ونداعى قانداستارىنا قازاق ءتىلىن ۇيرەتۋگە كىرىسكەنىن ايتادى.

رەسەيدىڭ ورىنبور قالاسىندا تۇراتىن 23 جاستاعى ەتنيكالىق قازاق داريا سۇبحانقۇلوۆانىڭ ماماندىعى - جوبالاۋ ديزاينەرى. ورىنبور مەملەكەتتىك ۋنيۆەرسيتەتىنىڭ «قۇرىلىس ارحيتەكتۋراسى» فاكۋلتەتىن 2015 -جىلى بىتىرگەن داريا كەيىن فينلياندياعا، يسپانياعا بارىپ، تاجىريبەدەن وتكەن. قازىر قۇرىلىس كومپانياسىندا ديزاينەر بولىپ جۇمىس ىستەيتىن قازاق جاسى الماتىدا وتكەن ونەر فەستيۆالىنە قاتىستى.

- الماتىعا اكەلگەن تۋىندىڭىز «ورىنبور - قازاق ەلىنىڭ العاشقى استاناسى» دەپ اتالادى ەكەن. نەگە وسى تاقىرىپتى تاڭدادىڭىز؟

- تاريحتان بەلگىلى، ورىنبور قالاسى 1920-1925 -جىلدارى قازاقتىڭ استاناسى بولعانى. ءبىز رەسەي مەملەكەتىندە ءومىر سۇرگەنىمىزبەن، قازاقتىڭ ەجەلگى مەكەنىندە تۇرامىز. قازىر بۇل تاريحتى كوپ جاستار بىلە بەرمەۋى مۇمكىن. سوندىقتان وزگە ەلدەن كەلسەم دە، قازاق جەرىنەن ەكەنىمدى ءبىلدىرۋ ءۇشىن وسى جۇمىستى دايىنداپ اكەلدىم.

 

داريا سۇبحانقۇلوۆانىڭ «ورىنبور - قازاقتىڭ العاشقى استاناسى» دەپ اتالاتىن جۇمىسى (سۋرەت داريانىڭ جەكە قورىنان الىندى).

- مۇسىنشىلىك حوببيىڭىز بە، الدە بۇل ونەردى دە وقىدىڭىز با؟

- مۇسىنشىلىك - ەرمەگىم. كىشكەنتايىمنان كەراميكامەن، بالشىقپەن، پلاستيلينمەن جۇمىس ىستەگەندى جاقسى كوردىم. جالپى، ماعان بۇل ونەر ۇلكەن اتام حابيبۋللادان كەلگەن بولۋ كەرەك. ويتكەنى ول كىسى - زەرگەر، التىن ۇستاعان ادام. اتامنىڭ كوزىن كورگەن كىسىلەر تالانتى مەن تالابىنىڭ ماعان ازداپ بولسا دا جۇققانىن ايتىپ جاتادى.

- ورىنبورداعى ءوزىڭىز قاتارلى جاستاردىڭ انا ءتىلىن مەڭگەرۋى قالاي؟

- وسىدان ءبىراز ۋاقىت بۇرىن قازاق ءتىلىن ۇيرەنۋ پراكتيكالىق تۇرعىدا مۇمكىن ەمەس بولاتىن. سول سەبەپتى بىزدە قازاق ءتىلىن بىلەتىن جاستار وتە از. ءتىپتى جوق دەسەم دە بولادى. ءبىراق قازىر بىزدە قازاق ءتىلى كۋرسى جۇرگىزىلەدى. ءبىر جىل بۇرىن «قازاق ءتىلى» دەيتىن ورتالىق قۇرىلدى. ولار ورىنبورلىق قازاق جاستارىنا ءتىل ۇيرەتۋمەن، ۇلتتىق سالت- داستۇرلەردى ناسيحاتتاۋمەن اينالىسادى. قازىر ورىنبورلىق ستۋدەنتتەر، جاستار ءتىل ۇيرەنىپ جاتىر. ءبىراق كۋرستىڭ ءتىل ۇيرەتۋ كەستەسى ءبىزدىڭ جۇمىس ۋاقىتىمىزبەن تۇسپا- تۇس كەلەتىندىكتەن، قيىنشىلىقتار بار. ءبىراق سوندا دا ىلگەرى باسامىز دەگەن ويدامىز.

- «ۆكونتاكتە» الەۋمەتتىك جەلىسىندەگى پاراقشاڭىزدان ورىنبورلىق جاستاردى ءتىل ۇيرەنۋگە شاقىرعان حابارلاندىرۋىڭىزدى وقىدىم. «قازاق ءتىلى» ورتالىعىنىڭ ۇيىمداستىرۋشىسى ءوزىڭىز بە؟

 

 ورىنبور قالاسىندا تۇراتىن قازاق قىزى داريا سۇبحانقۇلوۆا (سۋرەت داريا سۇبحانقۇلوۆانىڭfacebook پاراقشاسىنان الىندى).

- مەن عانا ەمەس، سول ورىنبور قالاسىندا تۇراتىن قازاق جاستارى. بۇل - بىرىككەن جۇمىس. بۇعان دەيىن دە الماتىعا كەلدىم، استاناعا، بۋرابايعا بارىپ قايتتىم. تاريحي وتانىمىز رەتىندە وسىندا ءجيى كەلۋگە تىرىسامىز. ءبىراق كەي- كەيدە انا ءتىلىمىزدى بىلمەگەنىمىزگە ءسال قينالامىز. سوندىقتان دا ورىنبوردان وسىنداي ورتالىق اشىپ، ستۋدەنت جاستاردى ءوز ۇلتىنىڭ مادەنيەتى مەن ءتىلىن ۇيرەتۋگە تىرىسىپ ءجۇرمىز. قازىر اپتانىڭ ءتورت كۇنىندە قازاق ءتىلىن ۇيرەنۋ كۋرسى جۇرگىزىلەدى. بۇل ساباقتى جۇرگىزەتىن - ءاسيا دارابايەۆا ەسىمدى قازاق قىزى.

- سۇحباتىڭىزعا راحمەت.

نۇرتاي لاحان ۇلى

«ازاتتىق» جاڭالىقتارى