اتالعان وقيعاعا قاتىستى ءانشى جانار ايجانوۆا دا ءوز پىكىرىن ءبىلدىرىپ جاتىر.
بۇل تۋرالى Stan.kz حابارلايدى.
«بايدىڭ جورعاسى كورىنبەسە دە، كەدەيدىڭ دورباسى كورىنىپ قويادى دەمەكشى، ەندى تۇڭعىشباي اعامىزدىڭ قالتاسىن ساناپ جاتىرمىز با؟ ۇيات-اي! «قان مەن تەردە» ءتاڭىرجان دەپ باسىمىزعا كوتەردىك. سول بالا كەزىمىزدەن كوش باسىندا كەلە جاتقان، ەل بولىپ قۇرمەتتەگەن اسىلىمىزدى بۇگىن مىناداي دەدىك پە؟ ءوز بەتىن اياماعان كىسى بەتىن شيەدەي قىلادى دەگەن ماسقارا.
ۇيدە وتىرىپ كەشەدەن بەرى سىزدەن ۇيالىپ وتىرمىن، تۇڭعىشباي اعا. ءادىل شەشىم بولىپ، سۇتتەن اق، سۋدان تازا بولىپ شىعۋىڭىزعا تىلەكتەسپىن. شىدامدى بولىڭىز! حالقىڭىز ءسىزدى قولدايدى. سىزگە دەگەن قارىنداستىق جىلى كوزقاراسىم ەشقاشان وزگەرمەيدى. الدىمىزدا جۇرگەن ءبىز ۇلگى تۇتار تۇلعاسىز!» - دەيدى جانار ايجانوۆا.
ءانشىنىڭ بۇل پىكىرىن جەلى قولدانۋشىلارى دا قوشتاي ءتۇستى. ولار ءوز كەزەكتەرىندە اكتەردى جاقتاپ سويلەدى. «قازاق حالقى ءۇشىن ۇيات بولدى! باسقا ۇستايتىن ادام جوقتاي، بەتكەۇستار اعامىزدى قارا بەت قىلعاندارى نەسى؟!»، «ءيا، اعا، سىزگە جالا جاپقاندار وڭبايدى. حالىقتىڭ الدىندا قانشا قارا كۇيە جاقسا دا، قاسىقتاپ جيناعان ابىرويىڭىز ەش بۇزىلماس!»، «جۇرەگىم قان جىلايدى! سەنگىم كەلمەيدى، سەنبەيمىن دە» دەپ جازادى جەلى قولدانۋشىلارى.