قازاق عالىمدارى عىلىم مەن تەحنيكا سالاسىنداعى حالىقارالىق سىيلىقتىڭ لاۋرەاتتارى اتاندى
قازاقستان رەسپۋبليكاسى تاۋەلسىزدىگىنىڭ 25 جىلدىق مەرەيتويىنا ارنالعان شاراعا قازاقستان مەن ورتالىق ازيا ەلدەرىنىڭ عالىمدارى قاتىستى. بيىل سىيلىقتىڭ لاۋرەاتتارى اتانعاندار: قازاقستاننان - 18 عالىم، قىرعىزستاننان - 2 عالىم: ايبەك ميرراحيموۆ (مەديتسينا)، رۋسلان ۋرۋسوۆ (تومەن تەمپەراتۋرالىق پلازمانى ماتەماتيكالىق مودەلدەۋ)؛ وزبەكستان عالىمدارى: ۋتكير روزيكوۆ (ماتەماتيكا)، بوريس وكسەنگەندلەر (حيميا جانە پوليمەرلەر فيزيكاسى)؛ تاجىكستاننان - 2 عالىم: لۋتفۋللو سوليەۆ (جالپى جانە ورگانيكالىق ەمەس حيميا)، يزاتۋللو گانيەۆ (حيميا، مەتاللۋرگيا).
قازاقستان عالىمدارىنىڭ ىشىنەن Top Springer Author نوميناتسياسىندا اتاپ وتىلگەندەر: راتباي مىرزاقۇلوۆ، ماتەماتيكا، تەوريالىق فيزيكا، بيوفيزيكا، سەرعازى مىڭجاسار ۇلى ادەكەنوۆ - بيوورگانيكالىق حيميا جانە تابيعي قوسپالار حيمياسى، بولات قوڭىر ۇلى قاسەنوۆ - ورگانيكالىق ەمەس حيميا، فيزيكالىق حيميا، حيميالىق تەرموديناميكا، ماتەريالتانۋ، مارات ءابجان ۇلى ءجۇسىپوۆ - تەوريالىق يادرولىق فيزيكا، ەرلان داۋىتبەك ۇلى نۇرسۇلتانوۆ - ماتەماتيكا، ەلەنا تولەۋبەك قىزى ىبىرايەۆا - يادرولىق فيزيكا، جاقسىنتاي قايىربەكوۆ - حيميا، وڭالسىن يمامبەكوۆ - فيزيكا. قازاقستان عالىمدارىنان «Top Springer Author جاس عالىمدار» اتالىمىندا اتاپ وتىلگەندەر: ماكسيم زدوروۆەتس - يادرولىق فيزيكا، نانوتەحنولوگيالار جانە جاڭا ماتەريالدار، نياز توقماعامبەتوۆ - ماتەماتيكا، بولات ورالبەكوۆ - حيميا، ارتەم كوزلوۆسكي - ماگنيتتىك نانوقۇرىلىمدار، رادياتسيالىق ماتەريالتانۋ، ەربولات سايلاۋحان ۇلى - اناليتيكالىق حيميا، قورشاعان ورتانىڭ حيمياسى، اناستاسيا ماشەنتسيەۆا - حيميا، يلونا ماتۆەيەۆا - حيميا، گۇلنۇر يسانوۆا - جەر تۋرالى عىلىمدار.
«بيىل ەۋرازيا ۋنيۆەرسيتەتىنىڭ جانىنان يادرولىق فيزيكا ينستيتۋتى جاساعان اۋىر يونداردى جەدەلدەتكىش جاڭا قۇرىلعىنىڭ ىسكە قوسىلعانىنا 10 جىل تولدى. الەمدە بالاماسى جوق وسى ماشينانىڭ ارقاسىندا ءبىز ءوزىمىزدىڭ عىلىمي ەڭبەكتەرىمىزدى جاريالاپ ءجۇرمىز. عالىمدار ءۇشىن ماڭىزعا يە ەڭ باستى كورسەتكىشتەر - ونىڭ جاريالانىمدىق بەلسەندىلىگى، ساندىق كورسەتكىشتەر. عالىمدار ءۇشىن ماتەريالدارى كوبىرەك جاريالانعان سايىن، ونىڭ ەڭبەكتەرىنىڭ رەيتينگى ءوسىپ، ەسىمىنىڭ تانىمال بولۋى ارتادى.
بۇل - كوپ ەڭبەكتى تالاپ ەتەتىن جۇمىستىڭ ناتيجەسى، جانە جاس عالىمداردى ارى قاراي دامۋعا ىنتالاندىراتىن ۇلكەن مۇمكىندىك. 5 جىلدىڭ ىشىندە مەن 29 ماقالا مەن 70 كە جۋىق دايەكسوز جاريالادىم. ءبىزدىڭ عىلىمي جۇمىسىمىزدىڭ تابىسى - كوماندالىق جۇمىستىڭ ناتيجەسى» ، - دەپ اتاپ كورسەتتى يادرولىق فيزيكا ينستيتۋتىنىڭ استانا فيليالىنىڭ ديرەكتورى ماكسيم زدوروۆەتس. قازاقستان عالىمدارىنىڭ ىشىنەن «Top Springer Author الەۋمەتتىك عىلىمدار» نوميناتسياسىندا اتاپ وتىلگەندەر: التاي ءمۇسىروۆ - ەكونوميكا، ميرا نۇرماحانوۆا - ەكونوميكا. باسپا Top Springer Author سىيلىعىنا قوسىمشا قازاقستاننىڭ ەڭ كوپ جاريالانىم جاساعان ۇزدىك 10 ۇيىمىن ديپلومدارمەن ماراپاتتادى: ءال-فارابي اتىنداعى قازاق ۇلتتىق ۋنيۆەرسيتەتى، ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى، اكادەميك ە. ا. بوكەتوۆ اتىنداعى قاراعاندى مەملەكەتتىك ۋنيۆەرسيتەتى، ورگانيكالىق سينتەز جانە كومىر حيمياسى ينستيتۋتى، فيزيكا- تەحنيكالىق ينستيتۋت، «فيتوحيميا» حالىقارالىق عىلىمي- وندىرىستىك حولدينگى، نازاربايەۆ ۋنيۆەرسيتەت، ءا. ب. بەكتۇروۆ اتىنداعى حيميا عىلىمدارى ينستيتۋتى، ۇلتتىق يادرولىق ورتالىق، ق. ي. ساتپايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتى. Springer Nature - 1842 -جىلى نەگىزى قالانعان الەمدەگى ەڭ ءىرى حالىقارالىق عىلىمي باسپالاردىڭ ءبىرى.
2015 -جىلدىڭ مامىر ايىندا ونىڭ پوزيتسيالارى كۇشەيتىلدى جانە Palgrave Macmillan باسپاسىنا تيەسىلى Nature (Nature and Scientific American) باسپا توبى جانە Springer Science+Business Media باسپا كومپانياسى سياقتى ەكى بەلگىلى كومپانيانى بىرىكتىرۋ ارقىلى Springer Nature كومپانياسى قۇرىلدى. Springer Nature كومپانياسى جانە قازاقستان رەسپۋبليكاسىنىڭ ءبىلىم جانە عىلىم مينيسترلىگى، جانە قازاقستاندىق ۋنيۆەرسيتەتتەرىنىڭ ستراتەگيالىق ارىپتەستىگىنە كوپ ۋاقىت بولدى.
مىسالى، 2006 - 2016 -جىلدار ارالىعىندا قازاقستان عالىمدارى Springer- دىڭ 403 جۋرنالىندا 2133 ماقالا جاريالادى. وسىلايشا، جىل سايىن قازاقستان عالىمدارى باسپانىڭ رەيتينگى جوعارى جۋرنالدارىندا 300-دەن اسا ماقالا جاريالايدى، بۇل شەت ەلدە جاريالاناتىن قازاقستاندىق ماقالالاردىڭ جالپى كولەمىنىڭ شامامەن قۇرايدى. شارا شەڭبەرىندە باسپانىڭ ۆيتسە- پرەزيدەنتى ازداا كوتاني قازاقستاندىق عالىمدار ءۇشىن Springer Nature باسپاسىنىڭ مۇمكىندىكتەرى مەن پەرسپەكتيۆالارى تۋرالى اڭگىمەلەپ بەردى.
سونداي-اق، قاتىسۋشىلارعا باسپانىڭ ونىمدەرى مەن جۋرنالدارى تانىستىرىلدى. Springer Nature سپيكەرلەرى ەلدىك شولۋ مەن ورتالىق ازيا ەلدەرى عالىمدارىنىڭ جاريالانىمدىق بەلسەندىلىگىنە تالداۋ جاساپ، باسپانىڭ ونىمدەرى مەن قىزمەتتەرى تۋرالى اقپارات بەردى. شارا سوڭىندا جاس عالىمدارعا، اۆتورلارعا جانە عىلىمي ۇيىمداردىڭ وكىلدەرىنە جەكە كەڭەستەر بەرىلدى.