ەۋروپا ليگاسىنىڭ ماتچىندا «استانا» «وليمپياكوسپەن» تەڭ ءتۇستى

استانا. قازاقپارات - «استانا» مەن «وليمپياكوس» ەۋروپا ليگاسىنىڭ ماتچىندا تەڭ ءتۇستى.

B توبىنىڭ ءتورتىنشى تۋرى «استانا ارەنا» ستاديونىندا ءوتتى، دەپ حابارلايدى قازاقپارات. كەزدەسۋ سوڭىندا ەسەپ تەڭ - 1:1. العاشقى دوپ ويىننىڭ نەبارى 8-مينۋتىندا سالىنعان بولاتىن. «استانا» كومانداسىنىڭ سەربيالىق شابۋىلشىسى دجوردجە دەسپوتوۆيچ گانالىق لەگيونەر پاتريك تۆۋماسيدىڭ وڭ قاپتالدان بەرگەن پاسىن ءساتتى تۇيىقتاي ءبىلدى.

«وليمپياكوس» فۋتبولشىلارى ەسەپتى ويىننىڭ 29-مينۋتىندا تەڭەستىردى. برازيليالىق قورعاۋشى سەبا وڭ تۇستان كوتەرىلگەن پاستى ناتيجەلى گولعا اينالدىردى. ەكىنشى تايمدا «استانا» تاجىريبەلى ەۋروپالىق كلۋبتىڭ مىسىنان سەسكەنبەستەن، باتىل شابۋىلدارعا شىعىپ وتىردى.

الايدا قارىمتا شابۋىلدارعا يەك ارتقان استانالىقتار ءۇستى-ۇستىنە ۇيىمداستىرىلعان قاۋىپتى شابۋىلداردان ناتيجە جاساي المادى.

ايتا كەتەيىك، وسىدان ەكى اپتا بۇرىن كوماندالاردىڭ گرەكيادا وتكەن العاشقى ماتچىندا «وليمپياكوس» پەن «استانا» كەزدەسۋى 4:1 ەسەبىمەن اياقتالىپ، قازاقستاندىقتاردىڭ جەڭىلىسى تىركەلگەن ەدى. وسى كەزدەسۋدەن سوڭ، «استانا» ەكىنشى ۇپايىنا قول جەتكىزىپ، ءوز توبىندا سوڭعى ورىندا كەلەدى.

اۆتور: جاسۇلان جولدىبايەۆ