تاپەي قايىسحان ۇلى: قازاق-قىتاي دوستىعى ءىرى ەكونوميكالىق دامۋلارعا بەتالىپ جاتىر
12:31, 26 - قازان 2016
استانا. قازاقپارات - قىتايدا تۇراتىن قانداسىمىز، اقىن، مادەنيەت قايراتكەرى تاپەي قايىسحان ۇلى قازاق ەلى تاۋەلسىزدىگىنىڭ 25 جىلدىعىمەن قۇتتىقتاپ، بەينە-سالەم جولدادى، دەپ حابارلايدى Baq.kz ءتىلشىسى.
«قازاق ەلى تاۋەلسىزدىگىنىڭ 25 جىلدىعى قۇتتى بولسىن! دۇنيە ءجۇزى قازاقتارى بۇل مەرەكەنى قۋانا قۇپتاپ، جۇرەكجاردى سالەمدەرىن جولداپ جاتىر.
قىتاي ەلىندە تۇراتىن جالپى جۇرت تا بۇل مەرەكەگە ۇلكەن قۋانىشپەن تىلەكتەستىك بىلدىرەدى.
قازاق-قىتاي ەكى ەلدىڭ دوستىعى بارعان سايىن قويۋلاسىپ، شىنايى دامۋ جولىنا، ستراتەگيالىق، ەكونوميكالىق دامۋلارعا بەتالىپ جاتىر»، دەيدى اقىن.
قىتايداعى قازاق پوەزياسىنا وزىندىك ورنەگىمەن كەلگەن اقىن، جاڭا عاسىرعا بەتالعان بىرنەشە بۋىن قانداس جاستاردىڭ رۋحاني الەمىنە جولباسشىلار قاتارىندا ەڭبەك ەتىپ، ۇرىمجىدەن شىعاتىن «شۇعىلا» جۋرنالىنىڭ باس رەداكتورى قىزمەتىنەن زەينەتكە شىققان ەكەن.