قازاقستاندا ەلەكتروموبيلدەردىڭ بولاشاعى قانداي؟
ماسەلەن، وسىدان ەكى جىل بۇرىن وسكەمەندە «Kia Soul» ماركاسى نەگىزىندە العاشقى قازاقستاندىق ەلەكتروموبيل شىعارىلسا، بيىل قوستانايدا «Jac» ۇلگىسىندە تاعى ءبىر توقپەن جۇرەتىن كولىكتەر سەرياسى تانىستىرىلدى. الايدا، وسى نارىقتى دامىتۋ ءۇشىن حالىقتىڭ قورشاعان ورتاعا دەگەن كوزقاراسىن وزگەرتۋ ازدىق ەتەدى، دەپ حابارلايدى قازاقپارات ءتىلشىسى.
قازاقستاننىڭ اۆتوكولىك سالاسىنداعى كاسىپورىندارى وداعىنىڭ باسشىسى ولەگ الفەروۆتىڭ ايتۋىنشا، شەتەلدە ەلەكتروموبيل ساتىپ العان ازاماتتارعا بيۋدجەت تاراپىنان قىرۋار قارجى بولىنەدى. ونىڭ ءوزىن ءاربىر مەملەكەت كوتەرە المايدى.
«شىنى كەرەك، وسى ساناتتاعى كولىكتەر ءبارىنىڭ قالتاسىنا شاق كەلە بەرمەيدى. ماسەلەن، ءدال قازىر ەلەكتروموبيلدەردى ءجيى مىنەتىن مەملەكەتتەردىڭ كارتاسىن الىپ قارايتىن بولساق، ولاردىڭ سانى 10-15 ەلدەن اسپايدى جانە اتالعان مەملەكەتتەردىڭ بارلىعى - حالىقتىڭ ءال-اۋقاتى جوعارى مەملەكەتتەر. اتاپ ايتقاندا، ا ق ش، كانادا، قىتاي جانە تاعى باسقا مەملەكەتتەر. حالىقتىڭ ءال-اۋقاتى ءوز الدىنا ول ەلدەردىڭ ۇكىمەتتەرى دە ەلەكتروموبيل العان ازاماتتارعا سۋبسيديا، ياعني ۇستىنە قوسىمشا اقشا بەرىپ وتىرادى. سەبەبى توقپەن جۇرەتىن ماشينالار -ەكولوگيالىق تازا كولىكتەر. قىتاي سياقتى ەكولوگياسى ناشار مەملەكەتتەر ونداي كولىكتەردىڭ كوپتەپ جۇرۋىنە مۇددەلى بولۋى ءتيىس. ول جەردە ەلەكتروموبيل ساتىپ العان ءاربىر ادامعا 10 مىڭ دوللاردى قايتارىمسىز بەرسە، ەلەكتر ەنەرگيامەن جۇرەتىن اۆتوبۋس العاندارعا 80 مىڭ دوللار كولەمىندەگى قىرۋار قارجىنى ءبولىپ وتىرادى. بۇل - ۇلكەن قولداۋ، ەلەكتروموبيلدەردى الۋعا يتەرمەلەيتىن مىقتى شارا»، - دەيدى و. الفەروۆ.
ونىڭ ايتۋىنشا، ا ق ش- تا ەلەكتروموبيلدەردى العانى ءۇشىن بەرىلەتىن سۋبسيديانى ازايتۋ ماسەلەسى كوتەرىلگەن بويدا وسى ساناتتاعى كولىكتەرگە دەگەن سۇرانىس تومەدەپ كەتتى. وسىنىڭ ءوزى ەلەكتروموبيل نارىعىن دامىتۋ ءۇشىن مەملەكەتتىڭ قولدۋى قاجەت ەكەنىن كورسەتسە كەرەك.
«ءيا، قازىرگى كەزدە قازاقستاندا ەلەكتروموبيلدەرگە سالىق پەن كەدەن بويىنشا ءبىرقاتار جەڭىلدىكتەر بار. دەگەنمەن، ونداي شارالار بۇل نارىقتى جان-جاقتى دامىتۋعا جەتكىلىكسىز بولىپ وتىر. وعان شەتەلدىڭ تاجىريبەسى دالەل بولسا كەرەك»، - دەيدى وداق باسشىسى.