قۇراندا نەلىكتەن «ءبىز» دەلىنگەن؟
قۇراندا اللا تاعالانىڭ جالعىز، دارا، ءبىر ەكەندىگىنە بايلانىستى كوپتەگەن ايقىن اياتتار بار.
مىسالى، بارىمىزگە ءمالىم «ىقىلاس» سۇرەسىندە «اللا جالعىز» دەلىنسە، باسقا ءبىر اياتتا: «ءسوزسىز، مەن اللامىن، مەنەن باسقا ەشبىر ءتاڭىرى جوق. سوندىقتان ماعان عانا عيبادات ەت! مەنى ەسكە الۋ ءۇشىن ناماز وقى» دەلىنگەن. ال كەيبىر سۇرەلەردەگى ۇلى جاراتۋشىنىڭ ءوزىن «ءبىز» دەۋىنىڭ استارىندا اراب ءتىلىنىڭ ەرەكشەلىگى جاتىر. مىسالى، ورىس تىلىندە ەكىنشى جاقتىڭ جەكەشە تۇرىنە «تى» دەلىنەدى. الايدا، كەيدە ادامعا دەگەن قۇرمەتتى، ىزەتتىلىكتى، سىپايىلىقتى ءبىلدىرۋ ءۇشىن جالعىز ادامنىڭ وزىنە ەكىنشى جاقتىڭ كوپشە تۇرىنە قولدانىلاتىن «ۆى» ءسوزى قولدانىلادى. سول سەكىلدى اراب تىلىندە دە «ءبىز» دەلىنگەن ۋاقىتتا اللا تاعالانىڭ ۇلىلىعى مەن جاببارلىعىن ءبىلدىرۋ ءۇشىن قولدانىلادى. ارابشا «مۋعجامۋل- ۋاسيت» جانە «ءال- مۋسجامۋل- ارابيل- ءاساسي» سوزدىكتەرىندە بىلاي دەلىنەدى: «ناحنۋ»، ياعني «ءبىز» ءسوزى ەكى جانە ءۇش ادامعا كوپشە تۇرىندە قولدانىلاتىنى سەكىلدى كەيدە ۇلىقتاۋ ماقساتىندا ءبىر ادامعا دا قولدانىلادى.
islam.kz