شينجياڭ: التايداعى قازاق مالشىلارى كۇزەۋدەن-كۇزەۋگە كوشۋدە

استانا. قازاقپارات - ءار جىلعى قازان ايى - شينجياڭنىڭ سولتۇستىگىندەگى قازاق مالشىلارىنىڭ كۇزگى كوش- قون مەزگىلى.

التاي ايماعىنىڭ جەمەنەي اۋدانىنداعى قازاق مالشىلارى ەندى كۇزەۋدەن كۇزەۋگە بەت تۇزەدى، دەپ حابارلايدى Baq.kz ءتىلشىسى.

قازان ايى ورتاسىنان اۋدى. جايلاۋدىڭ ءسانى كەتىپ، تارازى جۇلدىزى تۋىپ، تاڭ سۋىدى. قازاق ۇعىمىندا قازان ءسوزىنىڭ بىرنەشە ماعىناسى بار. قازان - اۋىرتپالىق، «قازان ات» - جاۋعا مىنەتىن ات، قازان - اس پىسىرەتىن ىدىس، قازان - ۇزەڭگىنىڭ ءبىر ءتۇرى، قازان - شولاق زەڭبىرەك. ءبىر كەزدەرى بۇل ايدا ۇلكەن قىرعىن سوعىس بولىپ، سودان اي وسىلاي ايتىلىپ كەتۋى مۇمكىن دەيدى حالىق ساناسىندا.

بۇل ايدا كۇز كۇرەڭ قاباقتانىپ، قۇستار جىلى جاققا ۇشىپ كەتە باستايدى، مالشىلار كۇزەككە كوشەدى. بيە اعىتىلىپ، كۇزدىك سويىلادى. كەي جەرلەردە قار ۇشقىنى ءبىلىنىپ، سۋعا مۇز قاتادى، بوزقىراۋ تۇسەدى. ءپىسىپ ۇلگەرمەگەن كوكونىس پەن ەگىن سۋىققا ۇرىنسا، حالىق ونى «قازان ۇردى» دەيدى.

كوش- قونداعى قىز- كەلىنشەكتەر تاڭ اتا «توبىلعى ساپتى قامشى الىپ، ۇمار مويىن ات ءمىنىپ» (دوسپانبەت) قونىس قاراپ، مال ايداپ كەتكەن ەر- ازاماتتاردىڭ سوڭىنان تۇيەلى كوشتى الىپ، قونالقى جەرگە جەتكەندە ءبىر تۇندىك دامىل ءۇشىن قارا قوستارىن تىگەدى.

ءتورت تۇلىك مال ءۇشىن ءشوبى شۇيگىن، سۋى تونىق، وتى مول جەرلەرگە كوشىپ جۇرە بەرەتىن قازاق كوشى ءبىر جىلدىڭ ءتورت مەزگىلىندە دە جالعاسا بەرەدى.

 

فوتو: kazak.ts.cn