ادۆوكات كۇلەكبايەۆتىڭ ءىسى بويىنشا ايىپتالۋشىنى نەگە قورعاعاندىعىن ءتۇسىندىردى

الماتى. قازاقپارات - الماتىدا تەررورلىق اكت ۇيىمداستىرعان رۋسلان كۇلەكبايەۆتىڭ ىسىنە قاتىستى باستى سوت وتىرىسى الدىندا ايىپتالۋشىلاردىڭ ءبىرى ەربول قۇسايىنوۆتىڭ ادۆوكاتى شاميان جايىلقانوۆ مۇنداي قاندى ىسكە قاتىسۋشىلارعا نەگە قورعاۋشى بولۋعا كەلىسكەنىن ايتىپ، اقتالدى، دەپ حابارلايدى سوت زالىنان قازاقپارات ءتىلشىسى.

«ءبىز دارىگەرلەر سەكىلدى الدىمىزعا كەلگەن ادامنىڭ كىم ەكەنىنە قاراماستان قورعاۋعا مىندەتتىمىز. رۋسلان كۇلەكبايەۆتى قورعاۋدان ادۆوكاتتار باس تارتتى دەگەن اڭگىمە - بەكەر. مەملەكەت ادۆوكاتتى بەكىتەدى، ول ونى قورعاۋعا مىندەتتى. ماعان دا اعايىن- تۋىستارىم، وتباسىمداعى ادامدار تاراپىنان نە ءۇشىن مۇنداي ىستە قورعاۋشى بولۋعا كەلىستىڭ دەگەن تاراپتا سىن ايتىلىپ جاتىر. مەنىڭ قورعاۋىمداعى ايىپتالۋشى قۇسايىنوۆ ەربولدىڭ اتالعان تەراكتىگە ەش قاتىسى جوق. رۋسلان كۇلەكبايەۆتىڭ قىلمىستىق ءىستى ۇيىمداستىرۋداعى جوسپارىنان بەيحابار بولعان. مەنىڭ قورعاۋىمداعى ادامدى ۇرلىق، قارۋلى شابۋىل جاسادى دەپ ايىپتاپ وتىر. جابىرلەنۋشى مەشەريكوۆتى رۋسلان كۇلەكبايەۆپەن بىرگە تونادى دەپ ايىپتاعان. مەشەريكوۆتىڭ ءوزى دە، ونىڭ كورشىلەرى دە جابىرلەنۋشىنى كۇلەكبايەۆتىڭ جالعىز ءوزى توناعانىن ايتىپ، كۋالىك بەردى. كۇلەكبايەۆ ونىڭ سومكەسىن ۇرلاپ كەتكەن، سومكەدە «ايپاد» قانا بولعان»، - دەدى شاميان جايىلقانوۆ.

ايتا كەتەيىك، بۇگىن الماتىداعى تەرگەۋ اباقتىسىندا رۋسلان كۇلەكبايەۆتىڭ ىسىنە قاتىستى باستى سوت وتىرىسى وتەدى.

الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنا ر. كۇلەكبايەۆقا قاتىستى قىلمىستىق ءىستى اتالعان سوت سۋدياسى ەرلان بولاتوۆ جۇرگىزىپ جاتىر. كۇلەكبايەۆ بىرنەشە قانقۇيلى توناۋ جانە قاراقشىلىق ارەكەتتەرگە قاتىستى بولىپ وتىر. بۇعان دەيىن حابارلانعانداي، تەرگەۋ توبى 57 سوت ساراپتاماسى مەن زەرتتەۋلەر جۇرگىزدى جانە بولعان وقيعانىڭ بارلىق جايتتەرىن انىقتاۋ ماقساتىندا 200 دەن استام كۋاگەرلەر مەن وقيعانى كورگەن ادامداردى تەرگەدى. 2016 -جىلدىڭ 12 -قازانىندا 61 تومنان تۇراتىن قىلمىستىق ءىس سوتقا جولداندى. ر. كۇلەكبايەۆقا 8 قۇقىق قورعاۋ جانە ارنايى ورگان قىزمەتكەرلەرىن جانە 2 بەيبىت تۇرعىندى ءولتىردى، تەررورلىق اكت جاسادى دەگەن ايىپ تاعىلدى. سونىمەن قاتار، ول 3 بەيىبىت تۇرعىندى ولتىرمەك بولدى دەپ ايىپتالىپ وتىر.

ناقتىراق ايتقاندا، ايىپتالۋشىعا قاتىستى ق ر قىلمىستىق كودەكسىنىڭ (ق ر ق ك) 255-بابى 4-تارماعى (لاڭكەستىك اكت)، 99-بابى 2-تارماعى (ەكى نەمەسە ودان دا كوپ ادامدى ءولتىرۋ)، 24-بابىنىڭ 3-تارماعى ء(ولتىرۋ ءۇشىن شابۋىل جاساۋ)، 192-باپ 4-تارماق (توپ ادامعا قاراقشىلىق شابۋىل)، 287-باپ 4-تارماق (زاڭسىز قارۋ تاسىمالداۋ)، 288-باپ 2-تارماق (قارۋدى زاڭسىز جاساۋ)، 291-باپ 4-تارماق (قارۋ ۇرلاۋ)، 200-باپ 4-تارماق (كولىك ۇرلاۋ)، 126-باپ 2-تارماق (ادامدى زاڭسىز باس بوستاندىعىنان ايىرۋ) بويىنشا قىلمىستىق ءىس قوزعالعان.

سونداي- اق، ر. كۇلەكبايەۆپەن بىرگە سوتقا اتىس قارۋىن زاڭسىز ساقتاپ، وزىمەن بىرگە الىپ ءجۇرىپ، دايىنداپ، ر. كۇلەكبايەۆپەن بىرگە م. اتتى كاسىپكەردىڭ ۇيىنە قاراقشىلىق شابۋىل ۇيىمداستىرعان ر. ليۋ، ج. ساپاربەكوۆ، د. اسەمبەك ۇلى، ە. قۇسايىنوۆ، ن. ءابدىمومىن دا سوت زالىندا.

ايىپتالۋشى ن. ءابدىمومىنعا رۇقساتسىز قالادان كەتۋىنە تىيىم سالىنعان. ر. ليۋعا قاتىستى ق ر ق ك 188-بابىنىڭ 4-تارماعى، 288-بابىنىڭ 1-تارماعى، 287-بابىنىڭ 4-تارماعىنا قاتىستى قىلمىستىق ءىس قوزعالدى. ج. ساپاربەكوۆتىڭ ۇستىنەن ق ر ق ك 192-بابى 4-تارماعى؛ 287-باپ 4-تارماق بويىنشا قىلمىستىق ءىس قوزعالدى. ە. قۇسايىنوۆقا قاتىستى ق ر ق ك 192-بابىنىڭ 4-تارماعى بويىنشا، د. اسەمبەك ۇلىنا قاتىستى ق ر ق ك 192-بابىنىڭ 4-تارماعى، ن. ءابدىمومىنعا قاتىستى ق ر ق ك 287-بابىنىڭ 4-تارماعى بويىنشا قىلمىستىق ءىس قوزعالدى.