قىرعىزستان كونستيتۋتسياسىنىڭ ءتۇپنۇسقاسى تابىلدى
بۇل تۋرالى رەسپۋبليكا پرەزيدەنتى اپپاراتىنىڭ باسشىسى فاريد نيازوۆ مالىمدەدى، دەپ حابارلادى ر ي ا نوۆوستي.
نيازوۆتىڭ سوزىنە قاراعاندا، ەلدە كونستيتۋتسيانىڭ ەكى جوباسى بولعان. العاشقىسىن ۋاقىتشا ۇكىمەت بەكىتكەن. وعان 2010 -جىلى 19 -مامىردا رەفەرەندۋمدا وزگەرىس ەنگىزىلدى جانە ول «ەركين- توو» گازەتىندە جاريالاندى. ەكىنشى قۇجاتتى دا ۋاقىتشا ۇكىمەت بەكىتكەن. ول 2010 -جىلى 26 -مامىردا اتالعان گازەتتە جاريالاندى. رەفەرەندۋمنان كەيىن جاريالانعانى بار، ال ول رەسمي جاريالانعان سوڭ زاڭدى كۇشىنە ەنگەندىكتەن، كونستيتۋتسيانىڭ ءتۇپنۇسقا ءماتىنى «ەركين- توو» گازەتىندە دەپ سانالادى.
پرەزيدەنت اپپاراتىنىڭ باسشىسى اتاپ وتكەندەي، 2010 -جىلى كونستيتۋتسيانىڭ قابىلدانعان ماتىنىنە (ءار بەتىنە) قۇراستىرۋشىلاردىڭ ءبىرى، ۋاقىتشا ۇكىمەت حاتشىلىعىنىڭ وكىلى قول قويۋى ءتيىس ەدى. الايدا قول قويىلماعان.
«سوندىقتان ءتۇپنۇسقا بار، الايدا گازەت تۇرىندە، ەل وسى التى جىل سول قۇجات بويىنشا ءومىر ءسۇرىپ كەلەدى»، - دەدى ول.
ەسكە سالا كەتەيىك، 2016 -جىلى 19 -قازاندا جوگوركۋ كەنەش وتىرىسىندا قىرعىزستان كونستيتۋتسياسىنىڭ ءتۇپنۇسقاسى قايدا ەكەنىن ەشكىم بىلمەيتىنى ءمالىم بولدى.
كەيىن «اتا مەكەن» فراكسياسىنىڭ دەپۋتاتى المامبەت شىكماماتوۆ وسى داۋعا بايلانىستى بيلىكتىڭ بارلىق تارماقتارىنىڭ: پرەزيدەنت، پارلامەنت، ۇكىمەتتىڭ زاڭدىلىعى ماسەلەسىن كوتەردى.