قازاقستان بلوگەرلەرىنە ب ا ق قۇقىعى بەرىلۋى مۇمكىن
بۇل تۋرالى قر اقپارات جانە كوممۋنيكاتسيالار ۆيتسە-ءمينيسترى الان اجىبايەۆ ءمالىم ەتتى، دەپ حابارلايدى قازاقپارات.
«مينيسترلىك اقپاراتتىق الاڭدا رەسمي ۇسىنىلماعاندارعا قاجەتتى شارتتار جاساۋ قاجەتتىگىن تۇسىنەدى. بۇعان قوسا، بلوگەرلەر ءبىزدىڭ ەلىمىزدە ورىن الىپ جاتقان قانداي دا ءبىر وقيعالاردى بەلسەندى جازىپ كورسەتۋدە. سوندىقتان دا ولار ءۇشىن ەرىكتى تۇردە جەلىلىك باسىلىم رەتىندە تىركەلۋ مۇمكىنشىلىگى قاراستىرىلادى. بۇل زاڭنامالىق نەگىزدە بۇقارالىق اقپارات قۇرالدارى قۇقىعىن الۋعا جاقسى مۇمكىنشىلىك»، - دەدى ول اقپارات جانە كوممۋنيكاتسيالار مينيسترلىگىنىڭ القا وتىرىسىندا.
ونىڭ ايتۋىنشا، شەتەلدىك ب ا ق- قا اقپاراتتىق ماتەريالدار ۇسىناتىن ەل ازاماتتارىن تىركەۋ تۋرالى ۇسىنىس تا ءدال وسى ماقساتتاردى كوزدەيدى.
«ارينە، الدا ءتۇرلى فورماتتا جانە قۇرامدا قۇجاتتى تالقىلاۋ بار. قازىر بۇل نورمالاردى تىكەلەي زەردەلەپ، تالقىلايتىن جۇمىس توبى قۇرىلۋدا. قازىردىڭ وزىندە ايتىلىپ جاتقان ۇسىنىستار مەن ەسكەرتپەلەر ءبىزدىڭ تارابىمىزدان قاپەرگە الىنىپ، زاڭ جوباسىن ازىرلەۋ بارىسىندا ەسكەرىلەتىن بولادى»، - دەدى اجىبايەۆ.
ايتا كەتەيىك، ق ر اقپارات جانە كوممۋنيكاتسيالار ءمينيسترى داۋرەن ابايەۆ زاڭ جوباسىن قوعامدىق تالقىلاۋدان وتكەننەن كەيىن 2017 -جىلدىڭ ناۋرىزىنا دەيىن ۇكىمەتكە جانە 2017 -جىلدىڭ ءبىرىنشى جارتىجىلدىعىندا پارلامەنت ماجىلىسىنە ەنگىزۋ قاجەتتىگىن ايتقان بولاتىن.