ءتورت پايىزدىق اۆتو نەسيە باعدارلاماسى جالعاسا ما

استانا. قازاقپارات - قازاقستاننىڭ اۆتوموبيل سالاسىنداعى كاسىپورىندارى وداعىنىڭ باسقارما ءتورعاسى ولەگ الفەروۆتىڭ ايتۋىنشا، وتكەن ايدا جەڭىلدىكپەن اۆتونەسيە الۋعا ارنالعان مەملەكەتتىك باعدارلامانىڭ ەكىنشى ترانشى يگەرىلدى.

 جالپى، اتالعان باستاما اياسىندا ۇلتتىق قوردان 26 ميلليارد تەڭگە ءبولىنىپ، 8 مىڭعا جۋىق قازاقستان ازاماتى 4 پايىزدىق نەسيەمەن جەكە كولىگىن ساتىپ الدى، دەپ حابارلايدى قازاقپارات ءتىلشىسى.

«بۇل باعدارلاما ۇلتتىق ۆاليۋتامەن، ياعني تەڭگەمەن بەرىلەتىن نەسيەنىڭ تاپشىلىعىن، وعان دەگەن قازاقستاندىقتاردىڭ سۇرانىسىن كورسەتتى. اشىعىن ايتۋ كەرەك، وسىنداي باستامالاردىڭ تاپشىلىعى ەل ازاماتتارىنىڭ وتاندىق تاۋارلاردى ساتىپ الۋلارىنا قولبايلاۋ بولىپ وتىر»، - دەيدى و. الفەروۆ.

ونىڭ ايتۋىنشا، مەملەكەت سول 26 ميلليارد تەڭگەنى 4 پايىزدىق مولشەرلەمەمەن بولسە دە، قازىردىڭ وزىندە 1 ميلليارد تەڭگەدەن استام پايدا كورىپ وتىر. ال وسى باعدارلامانى ارى قاراي جالعاستىرىپ، وعان قوسىمشا قارجى ءبولۋدىڭ ارقاسىندا تاعى مىڭداعان قازاقستاندىقتار ءوز كولىكتەرىنە قول جەتكىزە الادى.

«باعدارلاما قولعا الىنعالى بەرى 7732 ادام اۆتوكولىك ءمىندى. سونىڭ ىشىندە تەحنيكا دا بار. ايتا كەتەر ءجايت، ەۋروپا ەلدەرىندە ونداي باعدارلامالار اياسىندا پايىزدىق مولشەرلەمەنى سۋبسيديالايدى، ياعني بيۋدجەتتىڭ اقشاسىنا بانكتىڭ شىعىندارىن جاۋىپ، ادامعا كولىكتى ساتىپ الۋعا كومەكتەسەدى. ءسويتىپ، ۇكىمەت ماشينا جاساۋ ونەركاسىبىنە قولداۋ جاسايدى. بۇل، كوپ جاعدايدا، قايتارىمسىز قارجى. بىزدە بولسا، 4 پايىزدىق اۆتونەسيەگە بولىنگەن مەملەكەت قارجىسى قايتارىلادى. ۇكىمەت قولداۋ شارالارىن جاساپ قانا قويماي، ناقتى پايىزدىق ۇستەمە اقىعا يە بولادى. دەمەك، بۇل - قايتارىمدى اقشا. سوندىقتان بۇل باعدارلاما جالعاسىن تاپسا، قۇبا- قۇپ. ول حالىققا دا، ۇكىمەتكە دە، كولىك شىعارۋشى كومپانيالارعا دا ءتيىمدى بولىپ تۇر»، - دەپ اتاپ كورسەتتى و. الفەروۆ.

ارمان اسقاروۆ