يماندى كۇشەيتۋ ءۇشىن كۇندەلىكتى قانداي دۇعا وقۋعا بولادى؟

استانا. قازاقپارات - كۇندەلىكتى قوعامداعى تىرشىلىك جان دۇنيەنىڭ ازىعىن ۇمىتتىرىپ جىبەرەدى.

يمانعا دەم بەرەتىن، ءار كۇنى وقىپ جۇرەتىن ءبىر دۇعا بار.

ارينە، كۇندەلىكتى وقىلاتىن ايات جانە دۇعالار وتە كوپ. ولاردى ءبولىپ-جارۋعا بولمايدى. دەگەنمەن، تىلگە جەڭىلىرەك ءھام ماعىناسى اۋقىمدى قىسشا دۇعالاردىڭ ءبىرىن ۇسىنامىز. ءابۋ ھۋرايرا (ر. ا. ) ريۋايات ەتكەن حاديستە: «كىمدە- كىم: «ءلا ءيلاھا ءيللا اللاھۋ، ۋاحداھۋ ءلا شاريكا ءلاھ، ءلاھۋل- مۋلكۋ ءۋا ءلاھۋل- حامدۋ، ءۋا ءھۋا ءالا كۋللي ءشايين قودير»، - دەپ كۇنىنە ءجۇز رەت ايتسا، ون قۇلدى ازات ەتكەنمەن تەڭ بولادى.

جانە دە وعان ءجۇز ساۋاپ جازىلىپ، ءجۇز جاماندىعى وشىرىلەدى. جانە (دۇعاسى) سول كۇنى كەش باتقانشا شايتاننان قورعان بولماق. ەشكىم بۇدان ابزال ءسوز ايتا المايدى. تەك ودان كوبىرەك ايتقان ادام بولماسا[1]»، - دەگەن.

دۇعانىڭ ماعىناسى: «اللادان باسقا ءتاڭىر جوق. ول جالعىز جانە ونىڭ سەرىگى جوق. بارلىق يەلىك ونىكى جانە بارلىق ماقتاۋ وعان ءتان. ءارى ول بارلىق نارسەگە قۇدىرەتتى».

بۇل ەڭ وڭاي ورىندالاتىن سۇننەت. سونىمەن بىرگە، ارداقتى پايعامبارىمىز (س. ع. س. ) بۇل سوزدەردىڭ ەڭ ابزالى دەگەن. ابدۋللا بين امر بين اس (ر. ا. ) ريۋايات ەتكەن حاديستە: «مەن جانە مەنەن الدىڭعى پايعامبارلار ايتقان ەڭ جاقسى ءسوز: «ءلا ءيلاھا ءيللا اللاھۋ، ۋاحداھۋ ءلا شاريكا ءلاھ، ءلاھۋل- مۋلكۋ ءۋا ءلاھۋل- حامدۋ، ءۋا ءھۋا ءالا كۋللي ءشايين قودير[2]»، - دەلىنگەن.

راسىندا دا، بۇل دۇعا وقۋشىنىڭ يمانىن كۇشەيتەدى. ال، ادام يمانىن قۋاتتايتىن ءسوز ەڭ جاقسى ءسوز بولارى انىق.

بۇل، دۇعانى، حاديستە ايتىلعانداي، كۇندەلىكتى 100 رەت ايتۋعا شامامەن 10 مينۋت ۋاقىت قانا جۇمسالادى. بۇل سوزدەردى قوعامدىق كولىكتەن تۇرىپ، كوشەدە ءجۇرىپ بارا جاتىپ-اق، ءتىپتى، شارۋاڭىزبەن اينالىسىپ ءجۇرىپ تە ايتۋعا بولادى.

[1] بۇحاري، مۋسليم

[2] تيرميزي

muslim.kz