شاناعىنىڭ استى اتتىڭ باسىنان جاسالعان دومبىرا عالامتوردى كەزىپ ءجۇر

استانا. قازاقپارات - شاناعىنىڭ استى اتتىڭ باسىنان جاسالعان دومبىرا عالامتوردى كەزىپ ءجۇر.     

جىلقىنىڭ باسىنان جاسالعان دومبىرا تۋرالى تەلەباعدارلامادان ءۇزىندى عالامتورعا بىلتىر سالىنعان ەكەن. ءبىراق الەۋمەتتىك جەلىنىڭ قولدانۋشىلارى ونى ءالى كۇنگە دەيىن ءبولىسىپ جاتىر.

بۇل تۋرالى Caravan.kz ءتىلشىسى حابارلادى.

ءسوز ساپتاۋلارىنا قاراعاندا، بۇل قىتايداعى قازاق تەلەۆيزياسىنىڭ باعدارلاماسىنا ۇقسايدى. وندا جۇرگىزۋشى اۋىل اقساقالى ءتۇرلى ماتەريالداردان جاسالعان دومبىرالار مەن باسقا دا مۋزىكالىق اسپاپتاردى تانىستىرادى. ولاردىڭ ىشىندە، ارينە، دومبىرا ەرەكشە. باعدارلامادا شاناعىنىڭ استى جىلقىنىڭ باسىنان جاسالعان دومبىراعا ايرىقشا توقتالىپ وتەدى.

«جاسىم الپىسقا كەلسە دە، وسىنى ۇرپاقتىڭ كادەسىنە جاراسىن دەپ جاسادىم. مۇنداي دومبىرانىڭ قازاقتا بۇرىندارى بولعانىن ەستىدىم. اتا- بابالارىمىز سوعىم سويسا، مالدىڭ باسىن اعاشقا، جارعا، تاسقا ءىلىپ قوياتىن. ال كەيىن ودان ءتۇرلى بۇيىمدار جاساعان» دەيدى اقساقال.

سونداي- اق، ول قولىنداعى اسپاپتىڭ ءارى دومبىرا، ءارى قىلقوبىز ەكەنىن ايتادى. ىشەگى جۋان بولسا قوبىزعا، ال جىڭىشكە بولسا دومبىراعا اينالادى ەكەن. قاريا جۇرتقا جىلقىنىڭ جاۋىرىنىن قولدانىپ جاساعان دومبىرانى دا تانىستىرعان.

https://kaz.caravan.kz