بوسانعان انا مەن ءسابيدىڭ تاڭعاجايىپ امان قالۋى: قازاقستاندىق دارىگەرلەر ءبىر ۋاقىتتا ەكى وتا جاساعان

استانا. قازاقپارات - ق ر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ شتاتتان تىس باس حيرۋرگى، «نەيروحيرۋرگيا ۇلتتىق ورتالىعى» ا ق باسقارما ءتوراعاسى سەرىك اقشولاقوۆ بوسانۋ بارىسىندا ءولىم اۋزىندا جاتقان ايەلدىڭ ەرەكشە وقيعاسىن جۋرناليستەرگە باياندادى.

«پەرزەنتحاناعا تۇسكەن جاس كەلىنشەكتىڭ باسىنداعى قان تامىرلار جارىلعان. ول تۋرا بوسانار الدىندا كوماعا ءتۇستى. سول سەبەپتى شۇعىل تۇردە بىزگە جەتكىزگەن ەدى. ءبىز جاس اناعا وتتەگى جەتىسپەيتىنىن اڭعاردىق. ءدال تولعاق باستالعاندا ونىڭ جۇرەگى مەن تىنىس الۋ توقتاپ قالدى. ءبىز جاس انانى بىردەن وتا زالىنا اپاردىق. مەن قاندى ىسىكتى الىپ جاتقان ۋاقىتتا گينەكولوگ تا وتا جاساپ، نارەستەنى ءدىن امان الىپ شىقتى. بۇگىندە ول بالا 7 جاستا، ال اناسى ەكىنشى بالاسىن بوسانعان. ياعني ءبىز ءبىر ۋاقىتتا ەكى وتا جاسادىق. بۇل 2009 -جىلى بولعان ەدى»، - دەيدى سەرىك اقشولاقوۆ.

وعان قوسا سەرىك احمەتوۆ ول كەزدەردە دارىگەرلەر ەم جۇرگىزۋ مەن جان ساقتاۋدىڭ جاڭا ادىستەرىن اشپاعان ەدى، ءجاي عانا «جىلدام ءارى ەش قورقىنىشسىز ارەكەت ەتكەندەرىن» اتاپ ءوتتى.

«ءبىز ۇمىتتەندىك جانە ءبارى دە ءساتتى ءوتتى. شەت ەلدىك ارىپتەستەرىمىزگە دە ايگىلى بولعان ءبىزدىڭ تاجىريبەمىزدەن كەيىن، مۇنداي وتا ماسكەۋدە جاسالدى»، - دەپ قوسادى ول.

نەيروحيرۋرگيا ۇلتتىق ورتالىعى مەملەكەت باسشىسى نۇرسۇلتان نازاربايەۆتىڭ تاپسىرماسى بويىنشا 2008 -جىلى قۇرىلعان. جىل سايىن مۇندا جۇيكە جۇيەسىنىڭ ايتارلىقتاي كۇردەلى پاتولوگياسى بار ناۋقاستارعا 2,3 مىڭ وتا جاسالىپ، بۇل سان جىل سايىن ارتا تۇسۋدە. ورتالىق ماماندارى 8  جىل ىشىندە قازاقستاندىقتارعا 15 مىڭ وتا جاساپ، جاڭادان 60 نەيروحيرۋرگيالىق تەحنولوگيا ەنگىزگەن.

 

Stan.kz