استانانىڭ تاپقىرلار تەاترى اۋكسيون ارقىلى ساتىلادى
«سۋ پولوسى كلۋبىنىڭ باستاپقى باعاسى 39 ميلليون 851 مىڭ تەڭگەنى قۇراپ وتىر. ال «اقمولا ديىرمەن» كاسىپورنى 76 ميلليون 045 مىڭ تەڭگەمەن اۋكسيونعا شىعارىلادى. سونداي-اق ءبىزدىڭ تەاترىمىز - استانا قالاسىنىڭ تاپقىرلار تەاترى - 8 ميلليون 275 مىڭ تەڭگەگە ساتىلادى. اتالعان اۋكسيوندار بويىنشا كەپىلدىك جارنانىڭ سوماسى 15 پايىزدى قۇرايدى»، - دەدى ا. لۋكين بۇگىنگى باسپا ءسوز ءماسليحاتىندا.
ايتا كەتەيىك، اكىمنىڭ ورىنباسارى بۇعان دەيىن اۋكسيون ارقىلى 200 مىڭ تەڭگەگە ساتىلىپ كەتكەن «استانا» كوكپار كلۋبى بويىنشا تۇسىنىكتەمە بەردى. اتالعان كلۋبپەن بىرگە اۋكسيون ارقىلى «قايسار» سپورت كلۋبى، وماروۆ اتىنداعى شاحمات كلۋبى مەن «استانا باتىرى» جەكپە- جەكتەر كلۋبى ساتىلعان بولاتىن. سەبەبى جىل سايىن اتالعان نىساندارعا قالالىق بيۋدجەتتەن 500 ميلليون تەڭگەدەن استام قارجى جۇمسالىپ كەلدى. ول اقشانىڭ باسىم بولىگى كلۋبتارعا قاجەتتى ينفراقۇرىلىمدى جالعا الۋعا، سونداي-اق قىزمەتكەرلەر شتاتىن ۇستاۋعا كەتكەن.
«ودان دا ءبىز ول قىرۋار قاراجاتتى الەۋمەتتىك ماسەلەلەردى شەشۋگە جۇمسايىق. ماسەلەن، 1-4 سىنىپ وقۋشىلارىن تاماقتاندىرۋ شارالارىنا جىبەرۋگە بولادى»، - دەيدى ا. لۋكين.
ارمان اسقاروۆ