اتاجۇرتتا ەل يگىلىگى ءۇشىن ەڭبەك ەتىپ جاتقانىمدى ماقتان تۇتامىن - قىرعىزستاندىق قانداس
بۇگىندە قازاقستاندا دا ءتول ونەرگە دەگەن كوزقاراس تۇبەگەيلى وزگەرىپ، ادامدار شىنايى دۇنيەلەردى ءوز ءداستۇرى مەن سالتىنان تابا باستادى، - دەيدى قىرعىز ەلىنەن ورالعان قانداسىمىز قولونەرشى قارلىعاش ءىلياسوۆا.
قارلىعاشتىڭ تالايلى تاعدىرى دا قىزىق. ول قىزىلوردا وبلىسى، شيەلى اۋدانىندا دۇنيەگە كەلگەن. كەڭەستەر كەزىنىڭ قالىپتاسقان جۇيەسىنە سايكەس جولدامامەن 1984 -جىلى بۇگىنگى سانكت- پەتەربور، سول كەزدەگى لەنينگراد قالاسىنا قۇرىلىس تەحنيكۋمىنا وقۋعا تۇسەدى. وقۋدى اياقتاعان جىلى قاتار وقىعان باقىت ەسىمدى قىرعىز جىگىتىمەن تاعدىر قوسادى.
پوستكەڭەستىك مەملەكەتتەر تاۋەلسىزدىگىن جاريالاردان ەكى جىل بۇرىن، ياعني 1989 -جىلى قىرعىزستاننىڭ جالالاباد وبلىسى، الابۇقا اۋدانىنا ورالادى. ءسويتىپ قىرعىزستان ازاماتى اتانادى. وسىندا مەكتەپتە سۋرەت، تەحنولوگيا پاندەرىنەن ساباق بەرەدى. جولداسى باقىت العاشىندا اگرونوم، كەيىننەن اسكەري قىزمەت اتقارادى.
«توقسانىنشى جىلدار وتە قيىن بولدى. جەيتىن نانىمىزدى تابا الماعان كەزدەر بولعانىن بۇگىن ايتسام، ادام سەنبەيتىن شىعار. بالا كۇنىمنەن اجەم، كيىز باسۋدان باستاپ، قولونەردىڭ ءبىرازىن ۇيرەتكەن ەدى. قينالعاندا وسى ىسمەرلىگىمنىڭ كومەگى ءتيدى. قىرعىز ەلىندەگى تولقۋلاردىڭ ءبىرقاتارىنا كۋا بولدىق. قىرعىز- قازاق ءبىر تۋعان عوي. دەگەنمەن ءوز ەلىڭدەي بولا ما؟ 2006 -جىلى قىزىلورداعا كوشىپ كەلدىك. ۇلكەن ۇلىم تەمىرلان قىرعىزستاندا پروكۋراتۋرا سالاسىندا قىزمەت ەتەدى.
قىزىم البينا وسىندا كەلگەسىن تۇرمىسقا شىقتى. كەنجەم تابيعات جانىمدا قولونەر ىسىمەن اينالىسادى. ءتىپتى بىزبەن بىرگە قۇراق قۇراپ، ۇلتتىق كيىمدەردى دە تىگە بەرەدى. سونىمەن قاتار زەرگەرلىك بۇيىمدار بىلەزىك، ساقينالار جاسايدى. ەلگە كەلگەن سوڭ توركىنىمدى پانالادىم. قولىمنان كەلگەن ونەرىم ارقاسىندا كورمەلەرگە قاتىسىپ كوزگە ءتۇستىم. وبلىستىق كوشى- قون دەپارتامەنتى جاعدايىمدى ءبىلىپ، تيەسىلى كۆوتا بولىنۋىنە كومەكتەستى. ءبىر بولمەلى العاشقى ءۇيىمىزدى الدىق. قولونەر بۇيىمدارىن جاساۋدى توقتاتقان جوقپىن. مەملەكەت تاراپىنان ءتۇرلى قورلاردان اقشالاي قولداۋ بولدى.
تۇڭعىش پرەزيدەنت قورىنان دا قارجىلاي كومەك الدىم. بۇل كاسىبىن جاڭا باستاعان ادام ءۇشىن زور كومەك قوي. سونىڭ ارقاسىندا «قارلىعاش» شەبەرلەر ورتالىعىن اشتىم. قىرعىز ەلىندە مۇنداي مۇمكىندىكتەر جوق. ورتالىقتا العاشىندا 25 وقۋشى كەيىننەن 12 تالاپكەر كاسىپ ۇيرەندى. قازىردە ءوز قالاۋلارى بويىنشا كەلىپ جۇرگەن جاستار از ەمەس. بىزدە قۇراق كورپەشەلەر، قىزدىڭ جاساۋى، ارنايى تاپسىرىستارمەن ۇلتتىق كيىمدەر تىگىلەدى. سونىمەن قاتار توي تاباق، كادەسىيلار جاسايمىز. استانادان، ورالدان تاپسىرىستار ءجيى تۇسەدى. بۇگىندە كوپشىلىك ۇيلەردە ارنايى قازاقى بولمەلەردى جاساقتايتىن بولدى عوي. سوعان وراي ءبىزدىڭ ونىمدەرىمىزگە سۇرانىستار دا ارتىپ وتىر. ءوزىم قازاقستان قولونەرشىلەر وداعىنىڭ مۇشەسى، ءارى وبلىستاعى وكىلىمىن. تاۋەلسىزدىگىمىزدىڭ 25 جىلدىعىنا وراي جەكە كورمەمدى وتكىزۋ دايىندىعىن جاساپ جاتىرمىن. ايتۋلى مەرەكەگە وسىلايشا تارتۋ جاساۋ ويىمدا بار. مەنىڭ ءبىر بايقاعانىم، تالاپ قىلعان ادامعا قازاقستانىمىزدا مۇمكىندىك كوپ. تەك جالىقپاي ەڭبەك ەتۋ كەرەك. يا، وسىلاي ۇلى كوشتىڭ لەگىندە ءبىز دە اتاجۇرتقا ورالدىق. مەن مەملەكەت باسشىسىن كەمەڭگەر كوشباسشى دەپ ماقتانىشپەن اتار ەدىم. وزگە ەلدە 21 جىل تۇرىپ كەلگەندىكتەن مەن مۇنى جاقسى بىلەمىن. ەلباسى بار مۇمكىندىكتى بەرىپ وتىر، مەملەكەتتىك قولداۋ بار. ەڭبەك ەتۋ كەرەك باستىسى. مەنىڭ بار ارمانىم، ۇلتتىق قۇندىلىقتاردى ناسيحاتتاپ، كەلەر ۇرپاققا تابىس ەتۋ. ءبىزدىڭ ەلدە وعان تولىق مۇمكىندىك جاسالعان. اتاجۇرتقا ورالىپ، ەل يگىلى ءۇشىن ەڭبەك ەتىپ جاتقانىمدى ماقتان تۇتامىن»، - دەيدى قارلىعاش.