ەلوردالىق ونكولوگتار كەلەر جىلدان باستاپ قاتەرلى ىسىكتىڭ قيىن ءتۇرىن ەمدەيدى
قازىرگى ۋاقىتتا قازاقستاندا 3 مىڭنان استام ادام كانسەروماتوز دەرتىنە شالدىققان. بۇل وبىر اۋرۋىنىڭ ۋشىققان ءتۇرى. ءتورتىنشى ساتىعا وتكەن ىسىكتى ەمدەۋ ەلىمىزدە وسىعان دەيىن بولماعان.
دارىگەرلەر تەك سيمپتومدىق ەممەن شەكتەلگەن. سالدارىنان ناۋقاستىڭ ءومىر ءسۇرۋ ۇزاقتىعى جارتى جىلدان ءارى اسپايتىن. ال، باتىستىق ءتاسىلدىڭ ارقاسىندا دەرت دەندەگەن جاننىڭ عۇمىرىن 5 جىلعا دەيىن ۇزارتۋعا بولادى. امەريكالىق ماماندار بۇل جولى 4 ادامعا وپەراتسيا جاسادى. نەگىزىنەن، مۇنداي وپەراتسيانىڭ شەتەلدەگى باعاسى 50 مىڭ ا ق ش دوللارىنان باستالادى. ەندى استانالىق ونكولوگتار بۇل تاجىريبەنى وزىمىزدە ءساتتى جۇزەگە اسىرا الامىز دەگەن سەنىمدە.
ادىلبەك مۇقاجانوۆ، ۇلتتىق عىلىمي ونكولوگيا ورتالىعى حيرۋرگيا دەپارتامەنتىنىڭ باسشىسى:
- ول كىسىلەرمەن قارىم- قاتىناستا بولىپ، وپەراتسيانى ۇيرەنىپ جاتىرمىز. كانسەروماتوزعا بۇنىڭ الدىندا بىزدەن ءۇش دارىگەرىمىز «بولاشاق» باعدارلاماسى بويىنشا ءبىر جارىم جىل بارتتلەتتىڭ ۋنيۆەرسيتەتىندە، پيتتسبۋرگتە تاجىريبە ءوتىپ كەلدى. قازىر ءبىزدىڭ ماماندارىمىز دايىن.
دەۆيد بارتتلەت، UPMC پيتتسبۋرگ ۋنيۆەرسيتەتىنىڭ پروفەسسورى:
- ءبىزدىڭ وپەراتسيا ىسىكتىڭ قيىن تۇرىنە شالدىققان ادامداردىڭ ءومىرىن ۇزارتۋعا كومەكتەسە الادى. وسىعان دەيىن استانادا 2 رەت بولدىق. قازاقستاندىق دارىگەرلەر بىزدە 1 جىلداي بولىپ، بىلىكتىلىكتەرىن ارتتىردى. ەندى ولاردىڭ وزدىگىمەن بۇل وپەراتسيا ءتۇرىن جاساي بەرۋىنە مۇمكىندەرى جەتەدى دەپ سەنەمىن.
www.24.kz