جاڭا اكىم تۇيمەبايەۆ شىمكەنت قالاسىندا العاشقى تاپسىرماسىن بەردى

شىمكەنت. قازاقپارات - بۇگىن قالا اكتيۆىمەن تانىسقان ءوڭىر باسشىسى جانسەيىت تۇيمەبايەۆ شىمكەنتتەگى قۇرىلىسى جۇرگىزىلىپ جاتقان ءبىرقاتار نىسانداردى ارالاپ كوردى.

ەڭ الدىمەن، وبلىس اكىمى تاۋكە حان داڭعىلىنىڭ كۇردەلى جوندەۋ جۇمىستارى مەن قاپال باتىر كوشەسىندەگى كوپىردىڭ قۇرىلىسىمەن تانىستى.

ايتا كەتەيىك، وسىدان ءبىر اي بۇرىن كوپىردىڭ ءبىر جاعى پايدالانۋعا بەرىلگەن بولاتىن. 1 ميلليارد 142 ميلليون تەڭگەگە باعالانعان تەمىرجول وتكەلىنىڭ ءبىر بولىگىندەگى قۇرىلىس جۇمىستارى 95 پايىزعا اياقتالعان.

سونىمەن قاتار، وبلىس اكىمى قالاداعى سالىنىپ جاتقان الەۋمەتتىك تۇرعىن ۇيلەردىڭ قۇرىلىس جۇمىستارىن ارالاپ كورىپ، «Shymkent-City»  جوباسىمەن تانىستى. جۇمىستاردىڭ ساپالى بولۋى قاجەتتىگىنە ايرىقشا كوڭىل بولگەن ايماق باسشىسى نىسانداردىڭ سىرت كەلبەتىندەگى سانىنە دە نازار اۋدارۋ كەرەكتىگىنە توقتالدى.

وبلىس اكىمى شىمكەنت تۋريستىك ايماق بولعاندىقتان قالانىڭ كەلبەتىنە ايرىقشا ءمان بەرىلۋ كەرەكتىگىن اتاپ ءوتىپ، ورناتىلعان جارناما بيلبوردتارىن ءتيىستى قالىپقا كەلتىرۋدى تاپسىردى.

شىمكەنت قالاسىن ارالاۋ بارىسىندا ايماق باسشىسى جاڭادان اشىلعان جايلاۋكول دەمالىس ايماعىندا بولدى. مۇندا ت م د ەلدەرىندە بيىكتىگى جاعىنان ءۇشىنشى ورىندى الاتىن، ال ورتا ازيا بويىنشا ەڭ بيىك اتتراكسيون ورنالاسقان.