باۋىرجان وسپانوۆ: قازاقستانداعى ءىرى كومپانيالار قانات يسلامنىڭ جەكپە-جەگىنە قولداۋ كورسەتتى
- قانات يسلام ءوزىنىڭ ەرەكشە جۇدىرىقتاسۋ مانەرىمەن، ۇلتقا دەگەن شەكسىز سۇيىسپەنشىلىگىمەن، قاراپايىمدىعىمەن جانكۇيەرىن تاپقان بوكسشى. بۇگىندە ءار قازاق قاناتتى ءوز باتىرى سانايدى. ال شەتتە تۋىلعان قانات ءۇشىن حالقىنىڭ قولداۋى مەن ىقىلاسىنان ارتىق ەشتەڭە جوق. ونىڭ بەيجىڭ وليمپياداسىندا قالاي جۇدىرىقتاسقانىن ەل ۇمىتا قويماعان شىعار. وليمپيادانىڭ جۇلدەسىن العان سوڭ اتامەكەنگە كەلۋ ءۇشىن بارىن سالدى. قازاقستان اتىنان ءىرى حالىقارالىق جارىستارعا قاتىسۋدى ارماندادى. الايدا، قۇجاتتارىن دايىنداۋ مەرزىمى ۇزاققا سوزىلىپ، قىتايدا ءبىراز ءجۇرىپ قالعان بولاتىن. سول سەبەپتى، 2012 - جىلعى لوندون دوداسىنا قاتىسا العان جوق. قانات كاسىبي بوكستا اتوي سالۋدى ارماندايمىن دەگەن سوڭ، ونىڭ وسى سالادا ءوز جولىن تابۋىنا كۇش سالا باستادىق. كوپتەگەن پروموۋتەرلەردىڭ ۇسىنىسىن ساراپتاي كەلە، نەلسون لوپەس ەسىمدى باپكەرگە توقتالدىق.
ول كاسىبي بوكسقا بەت بۇرام دەگەنشە وتباسىن قۇردى، كەيىن ونىڭ ءۇي-جايىن رەتتەپ، الاڭسىز جاتتىعۋ جاساۋى ءۇشىن ايانىپ قالعان ەمەسپىز. بۇل ەڭبەگىمىز دە ەش كەتكەن جوق، قانات ءبىزدى جەڭىسىمەن قۋانتىپ جاتىر. بۇيىرسا، 29 - قازان كۇنى الماتى-ارەنا سپورت سارايىندا حالىق ارمانداعان ۇلكەن كەشتى وتكىزەمىز. قالا اكىمى باۋىرجان بايبەك بوكس كەشىنىڭ الماتىدا وتۋىنە ۇلكەن ۇلەس قوسىپ، بار مۇمكىنشىلىكتى جاساپ بەردى. وسى رەتتە، جەكپە-جەكتى وتكىزۋگە ۇلكەن كۇش سالىپ جاتقان باۋىرجان بايبەك مىرزاعا ۇلكەن العىسىمدى ايتقىم كەلەدى.
ەلىمىزدەگى BI Groupe، Sat&Company سىندى ءىرى كومپانيالار دا قاناتقا بىردەن قولداۋ كورسەتتى. BI Groupe باسشىسى ايدىن راحىمباەۆ پەن Sat&Company-دى باسقارىپ وتىرعان كەڭەس راقىشەۆ مىرزالاردىڭ ەڭبەگى اتاپ وتۋگە تۇرارلىق. قاناتتىڭ جەكپە-جەگى ءۇشىن كومەكتەن باس تارتقان جوق.
بۇل كەش ءۇشىن اقش-تان ارنايى سۋديالار، رينگ انونسەرلەر مەن Show Time تەلەارناسىنىڭ ءتۇسىرىلىم توبى كەلەدى. مۇنىڭ ءبارى قانات يسلام، جانقوش تۇراروۆ، جانىبەك ءالىمحان ۇلى سىندى بوكسشىلارعا ەلىكتەگەن قازاق جىگىتتەرى ءۇشىن ۇلكەن ۇلگى بولارى انىق.
راس، ءبىزدىڭ جىگىتتەر اۋەسقوي بوكستان بارلىق بيىكتى باعىندىردى. قازاق بوكسشىلارى وليمپيادادان التىنسىز كەلمەيتىنى سونىڭ دالەلى. قازاقستان بوكس فەدەراتسياسىنىڭ پرەزيدەنتى تيمۋر قۇلىبايەۆ مىرزا ءبىزدىڭ بوكسشىلاردىڭ الاڭسىز جاتتىعۋىنا بار جاعدايدى جاساپ بەرگەنىن ۇمىتپاعان ءجون. تيمۋر مىرزا قانات اتامەكەنگە ورالعان كەزدە دە كومەگىن اياماعان بولاتىن. ەندى ءبىز كاسىبي بوكستىڭ شىڭىنا ۇمتىلۋىمىز كەرەك. وسى ءۇشىن جۇمىس ىستەپ جاتىرمىز.
دەرەككوز: Nur.kz