اتاپ ايتقاندا، «كونگرەسس- حولل» جانە «حان شاتىر» الدىنداعى الاڭداردا قالا تۇرعىندارى قاراعاندى مەن شىعىس قازاقستان وبلىستارىنان جەتكىزىلگەن ونىمدەر نارىقتىق باعادان 15-20 پايىزعا ارزانعا ساۋدالانۋدا. بەلگىلى بولعانداي، قالالىقتار كارتوپ، پياز، ەت، ۇن، قانت جانە شۇجىق ونىمدەرىن بەلسەندى ساتىپ الىپ جاتىر.
جارمەڭكەدە ءىرى قارا مال ەتىنىڭ باعاسى كەلىسىنە 1100 تەڭگە، جىلقى ەتى - 1250 تەڭگە، قوي ەتى - 1050 تەڭگە سوماسىندا وتكىزىلۋدە. ال شۇجىق ونىمدەرى دە نارىقتىق باعادان تومەن دەڭگەيدە ساتىلۋدا. سونىمەن قاتار ساۋدا ورىندارىندا بالقاشتان ارنايى جەتكىزىلگەن بالىق ونىمدەرى دە كوپشىلىككە ۇسىنىلىپ وتىر.
وسى رەتتە جارمەڭكە بارىسىندا ونىمدەرگە قويىلعان باعانىڭ نەگىزسىز جوعارىلاپ كەتپەۋى ەرەكشە نازارعا الىنعان.
قاراعاندى وبلىسىنىڭ جارمەڭكەسىندە 840 توننا ءونىم وتكىزىلەدى، 60 ساۋدا ورنى جاساقتالدى. شارا بارىسىندا وبلىستىق شىعارماشىلىق ۇجىمداردىڭ قاتىسۋىمەن مەرەكەلىك كونسەرت جانە «باۋىرساق، قىمىز فەستيۆالى» قايىرىمدىلىق اكسياسى ۇيىمداستىرىلادى.
«ەلورداعا جەتكىزىلگەن ءونىمنىڭ جوعارى ساپاسىنا 100 پايىز كەپىلدىك بەرەمىز. وسىندا تاۋارلار ورتاشا نارىقتىق قۇنىنان 15-20 پايىزعا تومەن بولادى. جارمەڭكە ەكى كۇن وتەدى. سوندىقتان قالا تۇرعىندارىن ساۋدا الاڭدارىنا شاقىرامىز»، - دەدى قاراعاندى وبلىسى اكىمىنىڭ اۋىل شارۋاشىلىق بويىنشا ورىنباسارى شاگۋراشيد مامالينوۆ.
ال «حان شاتىر» ساۋدا ويىن ساۋىق ورتالىعىنىڭ الاڭىندا ءوتىپ جاتقان شىعىس قازاقستان وبلىسىنىڭ اۋىل شارۋاشىلىعى جارمەڭكەسىندە دە ونىمدەر باعاسى قالاداعى ورتاشا قۇنىنان 15-20 پايىزعا ارزانىراق. سونىمەن قاتار وسى وڭىردەن جەتكىزىلگەن بالدىڭ تۇرلەرى ساتىپ الۋشىلار اراسىندا ۇلكەن سۇرانىسقا يە بولىپ وتىر.
جارمەڭكەدە تابيعي تازا بال 900-دەن 1200 تەڭگە سوماسىندا ساتىلۋدا. ەلوردا تۇرعىندارىنىڭ كوپتەپ كەلۋىنە بايلانىستى ساعات 12:00-گە قاراي ساۋدا ورنىنداعى سورەلەر بوساپ قالدى.
«بالدىڭ 70 پايىزى بىزدە ش ق و- دا وندىرىلەدى. وسى رەتتە بۇل تابيعي ءونىم ەرەكشە برەندكە يە. سوندىقتان جارمەڭكە كەزىندە ءبىز وسى ونىمگە ايرىقشا ەكپىن قويىپ وتىرمىز»، - دەد ش ق و اۋىل شارۋاشىلىعى باسقارماسىنىڭ باسشىسى قونىسباي تولەۋبەكوۆ.
جالپى جارمەڭكەگە بۇل وڭىردەن 400 توننادان استام اۋىل شۋراشىلىعى ونىمدەرى جەتكىزىلدى. ونىڭ ىشىندە جىلقى ەتى - 42 توننا، قۇس ەتى -8 توننا، وسىمدىك مايى- 10 توننا، شۇجىق ونىمدەرى - 7 توننا، بال- 30 توننا، كارتوپ- 8 توننا، كوكونىس - 107 توننا كولەمىندە قامتىلدى.
ايتا كەتەيىك، اتالعان ەكى وبلىستىڭ اۋقىمدى جارمەڭكەلەرى مەن مادەني شارالارى قازاقستان تاۋەلسىزدىگىنىڭ 25 جىلدىعىنا ارنالىپ وتىر.
اۆتور: رۋسلان عابباسوۆ