شەتەلدەگى جانە ورالمان قازاق جاستارى ونەر فەستيۆالىنىڭ جەڭىمپازدارى انىقتالدى - فوتو
دەپ حابارلادى قازاقپارات.
قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان فەستيۆالدىڭ جەڭىمپازدارى بۇگىن ماراپاتتالدى.
ونەر دوداسىندا تەرمەشىلەر اراسىنداعى سايىستا باس جۇلدەنى قىتاي حالىق رەسپۋبليكاسىنان كەلگەن ساۋلەجان تاقزيا يەلەنسە، 1-ورىن وزبەكستاننان كەلگەن باۋىرجان ەرمەكبايەۆقا، 2-ورىن قىتايدان كەلگەن التىنشۋاق تولەگەن قىزىنا، 3-ورىن ءسانيا ونەرحانعا بۇيىردى.
16 اقىن قاتىسقان ءمۇشايرادان باس جۇلدەنى ادىلەت احمەت «اتاجۇرت» ولەڭىمەن جەڭىپ السا، 1-ورىن ايجان تاباراك قىزىنىڭ، 2-ورىن قىزىربەك دۇرگىنبايدىڭ، 3-ورىن ەركەبۇلان قولعاناتتىڭ ەنشىسىنە بۇيىردى. ولەڭ بايگەسىنە جاركەن بودەش ۇلى، جۇكەل قاماي ۇلى، ادىلبەك ىبىرايىم ۇلى، قايرات قۇلمۇحامەد، ۇلاربەك نۇرعالىم ۇلى سەكىلدى الاشتىڭ ايتۋلى اقىندارى قازىلىق جاسادى.
ال كوركەم سۋرەت نوميناتسياسىنان ءۇيسىن تۇرسىنبەك باس جۇلدەنى يەلەندى. قىلقالام تۋىندىسىمەن ەرەكشەلەنگەن ارشىن قابىلبەك 1-ورىندى، ەرجان يۋسپۋوۆ 2-ورىندى، جالىن بۋىرحان 3-ورىنعا قول جەتكىزدى.
ايتا كەتەيىك، فەستيۆال اياسىندا زۋقا باتىردىڭ تۋعانىنا 150 جىل تولۋىنا وراي، ونىڭ ۇرپاقتارى تاراپىنان تاعايىندالعان سىيلىقتار ارنايى جاس ونەرپازدارعا تاپسىرىلدى.
فەستيۆال قورىتىندىسىندا «قازاقپارات» تىلشىسىنە سۇحبات بەرگەن دۇنيەءجۇزى قازاقتارى قاۋىمداستىعى ءتوراعاسىنىڭ ءبىرىنشى ورىنباسارى تالعات ماماشيەۆ 20 دان استام ەلدەن 60 تان استام قوناق كەلگەنىن ايتتى.
«فەستيۆالعا ا ق ش، انگليا، ق ح ر، تۇركيا، گەرمانيادان باۋىرلارىمىز كەلدى. بيىلعى فەستيۆالدان شىعارعان قورىتىندىمىز بار. الدا ەندى ءبىز ءداستۇرلى ءان سايىسىن بولەك نوميناتسيا رەتىندە وتكىزۋىمىز كەرەك ەكەن. تەرمەشىلەر اراسىنا ءداستۇرلى ءان دە كىرىپ كەتتى. وسىنى كەلەسى جىلى قولعا الامىز.2017 - جىلى ەكسپو- نىڭ اياسىندا دۇنيەءجۇزى قازاقتارىنىڭ كەزەكتى قۇرىلتايىن وتكىزەمىز دەپ جوسپارلاپ وتىرمىز. ۇكىمەتكە حات جولدادىق، ەلباسىنىڭ وتكىزەتىن ۋاقىتتى بەلگىلەۋىن كۇتەمىز. جىلدىڭ اياعىنا دەيىن ۋاقىتى بەلگىلى بولسا، وسى ونەر فەستيۆالىن دە قۇرىلتاي اياسىندا وتكىزبەك ويدامىز. سپورتتىق شارالاردى ۇيىمداستىرۋ تۋرالى دا ۇسىنىستار ءتۇسىپ جاتىر، ونى ءالى الدا كورە جاتامىز. بۇگىنگى فەستيۆالىمىز ناتيجەلى ءوتتى دەپ ويلايمىن»، - دەدى تالعات ماماشيەۆ.
تەرمەشىلەر سايىسىندا 3-ورىندى يەلەنگەن قىتايدان كەلگەن ءانشى ءسانيا ونەرحان «قازاقپارات» تىلشىسىنە بەرگەن سۇحباتىندا قازاقستاننان كاسىپتى ءبىلىم العىسى كەلەتىنىن ايتتى.
«كاسىپتىك دەڭگەيدە ءبىلىم السام دەپ ويلايمىن. الماتىداعى قۇرمانعازى اتىنداعى قازاق ۇلتتىق كونسەرۆاتورياسىندا ءبىلىم العىم كەلەدى. قازاقستانداعى ونەر يەلەرىمەن اسا بايلانىسىم جوق، بايلانىس ورناتقىمىز كەلەدى. قازاقستانعا ەكىنشى رەت كەلىپ وتىرمىن. 2013 -جىلى وسى فەستيۆالعا شاقىرىلىپ، 1-ورىن العانمىن. بۇل جولى دايىندىعىم ازداۋ بولىپ، 3-ورىن الىپ قالدىم»، - دەدى قىتايدان كەلگەن ونەرپاز.
ايتا كەتەيىك، اتالعان فەستيۆال شەتەلدەگى دارىندى قازاق جاستارىنىڭ بەينەلەۋ، پوەزيا جانە مۋزىكا سالاسىنداعى شىعارماشىلىعىنا قولداۋ كورسەتۋ ماقساتىندا ۇيىمداستىرىلعان.
وعان 35 جاسقا دەيىنگى جاستار بۇرىن ەش جەردە جارىق كورمەگەن تۋىندىلارىن ۇسىندى. سايىستا سۋرەتشىلەر مەن تەرمەشىلەر ەركىن تاقىرىپتا، ال اقىندار ءمۇشايراعا ۇسىنىلاتىن 3 ولەڭىنىڭ ەكەۋىن وتانشىلدىق پەن زۋقا باتىردىڭ 150 جىلدىعىنا ارنادى.
اۆتور: الماس مۇقاش ۇلى