قاراعاندى وبلىسىنىڭ اكىمشىلىك ورتالىعىن كوشىرۋ جوسپارلانۋدا

استانا. قازاقپارات - قاراعاندى وبلىسىنىڭ باسشىلىعى اكىمشىلىك ورتالىقتىڭ جاڭا ورىنعا كوشىرىلۋى تۋرالى اقپاراتقا تۇسىنىكتەمە بەردى، دەپ حابارلايدى قازاقپارات.

بۇگىن استانادا ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا قاراعاندى وبلىسى اكىمىنىڭ ورىنباسارى جاندوس ابىشەۆ جاڭا اكىمشىلىك ورتالىق قاراعاندى قالاسىنىڭ وڭتۇستىك- شىعىس شاعىن اۋدانىندا ورنالاساتىندىعىن حابارلادى. ايتا كەتەيىك، قازىر وبلىستىق اكىمدىك بۇقار جىراۋ داڭعىلىندا ورنالاسقان.

«اكىمشىلىك ورتالىققا كەلەتىن بولساق، باس جوسپار بويىنشا كوشىرۋ قاراستىرىلعان. ءبىراق بۇل جاقىن ارادا بولمايدى»، - دەپ اتاپ ءوتتى ابىشەۆ تىلشىلەردىڭ بەرگەن ساۋالىنا.

ەسكە سالساق، وبلىس ورتالىعىنىڭ باس جوسپارى 2007 -جىلى بەكىتىلگەن. ول بويىنشا قاراعاندى قالاسىنىڭ وڭتۇستىك- شىعىس شاعىن اۋدانىندا كوپ پاتەرلى تۇرعىن ۇيلەر، اكىمشىلىك عيماراتتار، كورمە زالدارى بار ءىرى كىتاپحانالار، 5 مىڭ ادامعا ارنالعان كينوتەاتر سالىنادى. سونىمەن قاتار مۇندا قارجى داڭعىلى سالىنادى. ونىڭ بويىندا بانك كەڭسەلەرى ورنالاسادى دەپ بولجانۋدا. تاعى ءبىر كوشە مەيرامحانالاردىڭ قۇرىلىسىنا بولىنبەك. جەكەلەگەن اۋدانداردا قازىر كوتتەدجدەر سالىنىپ جاتىر.

بۇنىڭ الدىندا جاندوس ابىشەۆ جالعان لاڭكەستىك ءۇشىن 2 جىلعا سوتتالعان فيزيكا مۇعالىمى يۋري پاكتى قولداۋعا ارنالعان سپورتتىق شارانى وتكىزۋگە قاتىستى ماسەلەگە تۇسىنىك بەرگەن بولاتىن.

بۇعان دەيىن ب ا ق بەتتەرىندە، قاراعاندىدا جالعان لاڭكەستىك ءۇشىن سوتتالعان فيزيكا ءپانىنىڭ مۇعالىمى يۋري پاكتى قولداۋ ماقساتىندا 9 -قازان كۇنى بۇقارالىق جۇگىرىس ۇيىمداستىرۋ جوسپارلانعانى حابارلاندى. اتالعان شارانى وتكىزۋدى دوستارى، وقۋشىلارى جانە اتا- انالارى باستاما ەتىپ كوتەرگەن. اكسيا ۇيىمداستىرۋشىلارى وسىلايشا يۋري پاكتىڭ كىناسىزدىگىن ءبىلدىرۋدى ويلاستىرعان.