ۇيىمداستىرۋشىلار مۇمكىندىگى شەكتەۋلى قىز-كەلىنشەكتەرگە ارنالعان بايقاۋ جونىندە ايتىپ بەردى

الماتى. قازاقپارات - قازاقستاندا «ۇلى دالا حانشايىمى» اتتى مۇمكىندىگى شەكتەۋلى قىز- كەلىنشەكتەرگە ارنالعان بايقاۋ وتەدى.

بۇگىن الماتىدا وتكەن باسپا ءسوز ءماسليحاتىندا «الما-اتا» ايەلدەر كلۋبىنىڭ ءتورايىمى بەنت-انات بەيسەمبايەۆا بايقاۋدى وتكىزۋ يدەياسى قالاي تۋىنداعانىن ايتىپ بەردى. بايقاۋدى ۇيىمداستىرۋ تۋرالى وي رەسەيلىك تەلەباعدارلامادان قوعام قايراتكەرى، ارباعا تاڭىلعان ارۋلار اراسىنداعى «الەم ارۋى-2013» بايقاۋىنىڭ جەڭىمپازى كسەنيا بەزۋگلوۆانى كورگەننەن كەيىن تۋىندادى.

«الما- اتا» ايەلدەر كلۋبىنىڭ باسقارما مۇشەسى داريعا تشەنسوۆسكايانىڭ ايتۋىنشا، ۇيىمداستىرۋشىلار ك. بەزۋگلوۆامەن حابارلاسىپ، بايقاۋ تۋرالى ويلارىن ايتقان. «كسەنيا كەلىسىمىن بەردى. جانە بايقاۋ جەڭىمپازىنىڭ «وركەنيەت ارۋى - 2016» بايقاۋىنا جولداما الۋى تۋرالى كەلىسىمىن الدىق. بۇل قازاقستانداعى مۇگەدەك ايەلدەر ءۇشىن ۇلكەن مۇمكىندىك بولماق»، - دەدى ول.

سونىمەن بىرگە، ۇيىمداستىرۋشىلار بايقاۋ جۇلدەلەرى تۋرالى اڭگىمەلەدى: «باس جۇلدەنى قۇپيادا قالدىرامىز. ايتارىم، ول سىيلىق ءاربىر ادام العىسى كەلەتىن زات بولادى»، - دەدى د. تشەنسوۆسكايا.

باسپا ءسوز- كونفەرەنسياسى كەزىندە ەكىنشى ورىن يەگەرىنە اراب امىرلىكتەرىنە - ەكى بيلەت، ءۇشىنشى ورىنعا تەلەديدار بەرىلەتىنى حابارلاندى. «سونداي- اق قاتىسۋشىلاردىڭ بارلىعى باعالى سىيلىقتار الادى»، - دەپ ۋادە ەتتى ۇيىمداستىرۋشىلار.

بۇعان دەيىن حابارلانعانداي، شارانى «الما-اتا» ايەلدەر كلۋبى قوعامدىق ۇيىمى ۇيىمداستىرۋدا. بايقاۋعا 21 جانە 50 جاس ارالىعىنداعى، تاعدىردىڭ تالكەگىمەن مۇگەدەك ارباسىنا تاڭىلعان قىز- كەلىنشەكتەر قاتىسا الادى.

سايىس ءتورت كەزەڭنەن تۇرادى: ءبىرىنشى، 6 -قازانعا دەيىن وتىنىشتەر قابىلدانادى. قاتىسۋشىلاردىڭ سۇراۋى بويىنشا ىرىكتەۋ كەزەڭى 2016 -جىلدىڭ 6 -قازانىنان 11 -قازانعا دەيىن وتەدى. ىرىكتەلگەن قاتىسۋشىلاردى دايىنداۋ كەزەڭى 11 -قازاننان 11 -قاراشاعا دەيىن جۇرەدى.

جارىس فينالى 12 -قاراشادا «الماتى تاۋەرس» عيماراتىنىڭ «Ball room» سالتانات زالىندا وتەدى.

قاتىسۋشىلارمەن جاتتىقتىرۋشىلار، حورەوگرافتار، ستيليستەر، ۆيزاجيستەر جانە پسيحولوگتار جۇمىس جۇرگىزەتىن بولادى.

قورىتىندى كەشكە قازاقستاننىڭ ەستارادا جۇلدىزدارى قاتىسادى.

جارىسقا قاتىسۋ ساۋالناماسىن ww.womensclub.kz «الما- اتا» ايەلدەر كلۋبىنىڭ سايتىنان تابۋعا بولادى.

اۆتور: الماس مۇقاش ۇلى