تالدىقورعاندا «المارافون» جارىسى ءوتتى - فوتو

تالدىقورعان. قازاقپارات - سالاۋاتتى ءومىر سالتىن ناسيحاتتاپ، ۇلت دەنساۋلىعىن قالىپتاستىرۋ ماقساتىندا تالدىقورعاندا «المارافون» جارىسى ءوتتى.

شاراعا 2000 نان اسا ادام قاتىستى. جاۋىنعا قاراماستان قيمىل قوزعالىسى شەكتەلگەن، قولارباعا تاڭىلعان ازاماتتار بەلسەندىلىك تانىتتى. المارافون جەڭىمپازى - تالدىقورعان پوليتەحنيكالىق كوللەدجىنىڭ ستۋدەنتى سەرگەي روگوۆەنكو. ونىڭ ايتۋىنشا، ول سپورتتىڭ بۇل تۇرىمەن بۇرىننان اينالىسادى. تانىمال جەڭىل اتلەت - بيەباي تىلەمىسوۆتى ءوزىنىڭ ۇستازى سانايدى. «جەڭىسىمدى سۇيىكتى قالام - تالدىقورعاننىڭ تۋعان كۇنىنە ارنايمىن» دەيدى جەڭىمپاز.

جارىسقا ەلىمىزدى الەمگە تانىتىپ جۇرگەن تانىمال سپورتشىلار دا قاتىستى. ولاردىڭ قاتارىندا ارداگەرلەر اراسىندا الەم چەمپيونى بيەباي تىلەمىسوۆ، يۋريي پاشەنكو، 2008 -جىلعى بەيجىڭ وليمپياداسىنىڭ قولا جۇلدەگەرى نۇرباحىت تەڭىزبايەۆ، 2012 -جىلعى لوندون وليمپياداسىنىڭ قاتىسۋشىسى شولپان قوجاحمەتوۆا، 2016 -جىلعى ريو- دە- جانەيرو وليمپياداسىنىڭ قاتىسۋشىسى سۇلتان دۇزەلبايەۆ تا بار. مارافون قاشىقتىعى 2,6 شاقىرىم. بارلىق جەڭىمپازداردى تالدىقورعان قالاسىنىڭ اكىمى باعدات قاراسايەۆ قۇتتىقتاپ، ديپلوم، كۋبوك، مەدال جانە باعالى سىيلىقتارمەن ماراپاتتادى جانە بارلىق قاتىسۋشىلارعا الما ۇلەستىرىلدى.

 

ال جارىستىڭ «المارافون» دەپ اتالۋى تەگىن ەمەس. قازىر «تالدىقورعان باق قالا» اتاۋىمەن جوبا ازىرلەنىپ، تالدىقورعاندى باق قالا رەتىندە تانىمال ەتۋ ماقساتىندا يگى ىستەر اتقارىلۋدا. بۇگىندە عالىمدار المانىڭ وتانى قازاقستاننىڭ الاتاۋ بوكتەرى ەكەنىن دالەلدەپ جاتىر. الەمدەگى الما اتاۋلىسى سيۆەرس الماسىنان تاراعان. قازىر جەر جۇزىندەگى وسى المانىڭ 68 پايىزى الماتى وبلىسىندا. وسىعان بايلانىستى «تالدىقورعان - باق قالا» جوباسىنىڭ ماقساتى - وسى سيۆەرس الماسىن كوبەيتۋگە ۇلەس قوسۋ.

 سامال قابىشەۆا