جەتپىس ءۇش جاستاعى قاريا الماتىدان استاناعا دەيىن ۆەلوسيپەدپەن جەتتى
بۇل ەستافەتانى ۇ ق ك ارداگەرى ەل تاۋەلسىزدىگىنىڭ 25 جىلدىعىنا ارنادى. ەسكەرە كەتەتىن ءبىر جايت، زەينەتكەر 1200 شاقىرىم جەردى ۆەلوسيپەدپەن ەڭسەرۋ بارىسىندا وزىنە دارىگەرلەر تاعايىنداعان بىردە ءبىر دارىلىك پرەپاراتتى قابىلداماعان.
«جول بويى قۇرت پەن ىرىمشىكتى ازىق ەتتىم. ولاردى جولعا ارنايى الىپ شىقتىم. بۇل قازاق حالقىنىڭ سالتى. قۇرت كۇش بەرەدى، شولدەتپەيدى. دارىگەرلەر ماعان ءدارى قوبديشاسىن دا ازىرلەپ بەرگەن، الايدا مەن ءۇشىن ونىڭ قاجەتى بولمادى. ناعىز كالتسي - قۇرتتا»، - دەدى اقساقال.
ەلورداعا ءابىلتاي شايحوۆ بۇگىن جەتتى، ال الماتىدان 21 -قىركۇيەك كۇنى شىققان بولاتىن. ايتۋىنشا، ەلىمىزدىڭ ءاربىر قالاسىندا وتانداستارى ونى قۇشاق جايا قارسى العان. ال استانا الاڭىندا، جاڭبىرعا قاراماستان، جۇزگە جۋىق ادام جينالعان، دەپ حابارلادى «حابار» تەلەارناسى.
«حالىقتىڭ قابىلداۋىنا ريزا بولدىم. جامبىل وبلىسىنا جەتىپ قالعان كەزدە ءارتۇرلى كۇش قۇرىلىمدارىنىڭ بەس وكىلى مەنى ۆەلوسيپەدپەن كۇتىپ الدى. 200 شاقىرىمدى بىرگە ءجۇرىپ وتتىك. ول كەزدە ۆەلوسەپيدتى جاقسى تەبە المايتىنمىن. ءۇش كۇننىڭ ىشىندە ۇيرەندىم. ولار ماعان ۆەلوسەپەدتى دۇرىس تەبۋدى، دۇرىس وتىرۋدى، باستىسى، دەمالۋدى ۇيرەتتى»، - دەيدى اقساقال.