موڭعوليادا بۇركىتشىلەر سايىسى ءوتىپ جاتىر - فوتو
«قازاقستان» تەلەارناسىنىڭ حابارلاۋىنشا، «بۇركىتشىلەر» تويىنىڭ اشىلۋ سالتاناتىندا قازاقستان رەسپۋبليكاسىنان كەلگەن بۇركىت باپتاۋدىڭ باس جاتتىقتىرۋشىسى بازاربەك كۇنتۋعان ۇلى ق ر ۇلتتىق سپورت تۇرلەرى قاۋىمداستىعىنىڭ پرەزيدەنتى، پارلامەنتى ءماجىلىسىنىڭ دەپۋتاتى بەكبولات تىلەۋحاننىڭ قۇتتىقتاۋ حاتىن تابىس ەتتى.
ساياتتوبەدە باستالعان ساياتشىلار بايقاۋىنا الەمنىڭ 10 نان استام ەلدەرىنەن 90 قۇسبەگى قاتىستى. مىڭعا جۋىق شەتەلدىك تۋريست تاماشالاپ جاتقان بۇركىتشىلەر تويى ەكى كۇنگە جالعاسادى. وندا ات جارىسى، تەڭگە ءىلۋ، ساداق اتۋ، قىزقۋار، كوكپار قاتارلى ۇلتتىق ويىندار دا جۇرگىزىلەدى. سونىمەن قاتار ەتنو سپورتتىق بايقاۋدا ءتۇرلى ۇلتتىق قولونەر كادەسىيلارىن ساتىپ الۋعا بولادى.
جارىستىڭ ءبىرىنشى كەزەڭىندە قۇسبەگىلەردىڭ كيىمى، ات ابزەلدەرى باعالانىپ، قاجەت قۇرال- جابدىقتارى تەكسەرىلدى. بۇدان سوڭ سايىس قىراندى قولعا شاقىرۋىمەن جالعاستى.
جارىسقا ەڭ جاس بۇركىتشى رەتىندە كۇللى الەمگە تانىلعان موڭعولياداعى قازاق قىزى ايشولپان نۇرعايىپ قىزى دا قاتىسۋدا.
ەسكە سالا كەتسەك، 20th Century Fox Animation ستۋدياسى رەجيسسەر وتتو بەللدىڭ اتا- بابا ءداستۇرىن جالعاستىرىپ، بۇركىتشىلىك كاسىپكە دەن قويعان قازاق قىزى ايشولپان نۇرعايىپ تۋرالى «The Eagle Huntres» دەرەكتى فيلمىن تۇسىرگەن بولاتىن.