قازاقستاندا جاس ءوسپىرىم بالاسى الەۋمەتتىك جەلىگە تىركەلگەن اتا- انا ايىپپۇل تولەيدى
زاڭ جوباسىنا جاۋاپتى اقپارات جانە كوممۋنيكاتسيالار مينيسترلىگى تەك قانا تەحنيكالىق پروبلەمالاردى شەشىپ قانا قويماي، بالاسى الەۋمەتتىك جەلىگە تىركەلگەن اتا-انالارعا دا ايىپپۇل سالۋدى ۇسىنۋدا.
بۇل نورمانى قوعام قايراتكەرى ارۋجان ساين دا قولداپ وتىر. «اتا- انا ءوز بالاسىنا جاۋاپ بەرمەيىنشە ءبىز بۇل پروبلەمانى ەش ۋاقىتتا جەڭە المايمىز. ەگەر الەۋمەتتىك جەلىلەر اكىمشىلەرى بالالاردىڭ تىركەلۋىنە باقىلاۋ جاساي المايتىن بولسا، وندا ۇ ە ۇ- لەر مەن مەكتەپتەرگە جانە ينسپەكتورلارعا باقىلاۋ جاساۋ مۇمكىندىگىن بەرگەن ءجون»، - دەدى ول اتالعان تاقىرىپقا ارنالعان دوڭگەلەك ۇستەل وتىرىسىندا.
ونىڭ پايىمىنشا، ويىن- ساۋىق قۇراتىن ورىنداردىڭ ۇيىمداستىرىلماۋى سەبەپتى بالالار بىرنەشە ساعات الەۋمەتتىك جەلىدە وتىرادى.
«ءبىزدىڭ مادەنيەت جانە سپورت، ءبىلىم جانە عىلىم مينيسترلىكتەرى مەن جەرگىلىكتى اتقارۋشى ورگاندارعا شاعىمىمىز كوپ. ءبىزدىڭ بيۋدجەتىمىز بالالارمەن، جاسوسپىرىمدەرمەن ناقتى جۇمىستارعا ەمەس، قانداي دا ءبىر قالالىق مەرەكەلىك شارالارعا جۇمسالىپ جاتقان كەزدە ءبىز بالالاردى الەۋمەتتىك جەلىدەن شىعارا المايمىز. ءتىپتى، كەلەشەگى جوق، باسەكەگە قابىلەتسىز، قولىنان ءىس كەلمەيتىن جاستار پايدا بولادى»، - دەدى ول.
دەگەنمەن، اتا- اناعا ايىپپۇل سالۋ نورماسىنا ق ر پارلامەنتى ءماجىلىسىنىڭ دەپۋتاتى كەڭەس ابساتيروۆ قارسى شىقتى.
«بارلىعىن ايىپپۇلعا اكەپ تىرەي بەرۋگە بولمايدى. ءبىراز ۋاقىتتان كەيىن ءبىزدىڭ ازاماتتارىمىز تاس جولعا شىققانى ءۇشىن دە ايىپپۇل تولەيتىن بولادى. بارلىعىن بىردەي ايىپپۇلمەن شەكتەۋ جەتكىلىكتى. ودان دا ادامداردى تاربيەلەيىك. تاريحقا قاتىستى وتە جاقسى كىتاپتاردىڭ ەڭ ارزانى ءۇش مىڭ تەڭگە تۇرادى. اتا- انانىڭ ءوز بالاسىن ءبىر ىسپەن اينالىستىرۋى ءۇشىن كىتاپ ساتىپ الۋعا اقشاسى جوق پا؟ وندا بالالار ءۇشىن ادەبيەتتەردى، سونىمەن قاتار بوكس، فۋتبول، حوككەيدەن باسقا دا سپورت سەكتسيالارىن قولجەتىمدى ەتىپ جاسايىق. سوندا بالا الەۋمەتتىك جەلىدەن اجىرايدى»، - دەدى دەپۋتات.
ال ق ر اقپارات جانە كوممۋنيكاتسيالار مينيسترلىگىنىڭ جاۋاپتى حاتشىسى جانات قوجاحمەتوۆا ءوز كەزەگىندە زاڭ جوباسىندا كوزدەلىپ وتىرعان وزگە دە نورمالارعا توقتالدى.
«ءبىز مەكتەپ اكىمشىلىگىن wi-fi دى قوسا العاندا قولجەتىمدى ينتەرنەتپەن قامتاماسىز ەتۋدى مىندەتتەۋدى جوسپارلاۋدامىز. وندا قۇقىققا قايشى كەلەتىن كونتەنتتەر بۇعاتتالاتىن بولادى. بۇل ارنايى باعدارلامالاردىڭ، سونىمەن بىرگە بايلانىس وپەراتورلارمەن كەلىسىم نەگىزىندە جاسالۋى مۇمكىن. مۇنان بولەك، بايلانىس وپەراتورلارى اقىلعا قونىمدى تولەمگە بالالار ينتەرنەتىن قاراستىرۋىن ەنگىزۋ كوزدەلۋدە. ياعني، مەن اتا- انا رەتىندە ۇيالى تەلەفون ساتىپ الىپ، ارنايى بالالارعا قولجەتىمدى، زاڭعا قايشى كەلەتىن سايتتار بۇعاتتالعان باعدارلاما ورناتامىن»، - دەدى ول.