قازاقستاننىڭ التىن قورى قايدا جانە قالاي ساقتالادى
«ءبىز ۇلتتىق بانكتىڭ قۇرىلىمدىق بولىمشەسى سانالامىز. ورتالىقتا بارلىعى 350 مامان جۇمىس ىستەيدى. ورتالىق ءارتۇرلى فۋنكتسيا اتقاراتىن 14 بولىمنەن تۇرادى. 1991 -جىلى جەلتوقساندا ساقتاۋعا 2 العاشقى كۇمىس قۇيماسى مەن 1992 -جىلدىڭ 7 - قاڭتارىندا ەلباسى نۇرسۇلتان نازاربايەۆ 5 التىن قۇيماسىن جەكە ءوزى تابىس ەتكەن بولاتىن. وسى، 7 - قاڭتاردى ءبىز قازاقستاننىڭ التىن قورىنىڭ قۇرىلعان كۇنى دەپ سانايمىز» ، - دەيدى كاسسالىق وپەراتسيالار جانە قۇندىلىقتاردى ساقتاۋ ورتالىعىنىڭ ديرەكتورى قانات سادىقوۆ.
بۇگىندە اتالعان ورتالىقتىڭ نەگىزگى بەس باعىتى انىقتالعان، ولار: قولما قول اقشامەن جۇمىس، تازا (اففيناجدالعان) التىندى ساقتاۋ، قولما قول اقشانى ينكاسساتسيالاۋ جانە مەملەكەتتىك كىرىسپەن (تاركىلەنگەن مۇلىكتەر) جۇمىس جاساۋ، باعالى تاستاردى جەتكىزۋ.
پرەسس- تۋردا ۇلتتىق بانك قىزمەتكەرلەرى قاعاز بانكنوتتار الماتىداعى بانكنوت فابريكاسىندا، ال تيىندار وسكەمەندەگى فابريكادا جاسالاتىنىن ايتتى.
قۇندى مەتالدار جانە باعالى تاستار تۋرالى زاڭعا سايكەس، مەملەكەت ۇلتتىق بانكتىڭ التىن- ۆاليۋتالىق اكتيۆتەرىن ونى ءوندىرۋشى سۋبەكتىلەردەن جانە اففيناجدالعان التىن يەلەرىنەن الۋعا قۇقىلى. بۇگىندە «كازتسينك» ، «تاۋ- كەن التىن» ، «قازاقمىس» ، «ۆوستوكتسۆەتمەت» ، «Altyntau Kokshetau» كومپانيالارى نەگىزگى التىن جەتكىزۋشىلەر بولىپ ەسەپتەلەدى.
ورتالىق باسشىسى قانات سادىقوۆتىڭ ايتۋىنشا، عيمارات 11 بالدىق جەر سىلكىنىسىنە توتەپ بەرە الادى. قاۋىپسىزدىك ماقساتىندا التىن مەن بانكنوت ساقتالاتىن ورىندى سۋرەتكە تۇسىرۋگە قاتاڭ تىيىم سالىنعان.
ايتا كەتۋ كەرەك، قازاقستاننىڭ بۇكىل التىن قورى 70 شارشى مەتر اۋماقتاعى بولمەگە سىيىپ تۇر. بانكنوت پەن التىن ارنايى قۇرعاق ەمەس اۋا تەمپەراتۋراسىندا ساقتالادى. ءار ساقتاۋ ورنىنىڭ ەسىكتەرى 17 توننا.
قويماداعى بانكنوتتار تەك ۇلتتىق ۆاليۋتادا عانا ەمەس، شەتەل ۆاليۋتاسىمەن دە ساقتالعان. التىن قۇيماسىنىڭ بىرەۋىنىڭ سالماعى 11-13 كەلى اراسىندا.
بۇعان دەيىن ۇلتتىق بانكتە حابارلاعانداي، قازاقستاننىڭ 59 پايىز التىن قورى ەلىمىزدە، 41 پايىزى شەت ەلدە ساقتالادى. جالپى 244 توننا التىن قورىمىز بار.