قازاقستان جولدارىندا ون جىلدىڭ ىشىندە ءبىر قالانىڭ حالقى قايتىس بولدى

استانا. قازاقپارات - پارلامەنت ماجىلىسىندە «جول ءجۇرىسى تۋرالى» ق ر زاڭىنا وزگەرىستەر ەنگىزۋ تۋرالى» زاڭ جوباسىن تالقىلاۋ بارىسىندا  ق ر باس پروكۋروردىڭ ورىنباسارى اندرەي كراۆچەنكو ون جىلدىڭ ىشىندە جول- كولىك اپاتتارىندا قازاعا ۇشىرايتىن قازاقستاندىقتاردىڭ جالپى سانىن جاريالادى.

ول ستاتيستيكا ءبىر قالا حالقىنىڭ سانىمەن بىردەي بولىپ تۇر.

«بىزدە جول سالاسىنداعى جاعداي وتە كۇردەلى بولىپ تۇر. جولدا كوپ جاعدايدا ەر ادامدار قازا بولىپ جاتادى. ايەلدەرمەن سالىستىرعاندا ول كورسەتكىش 2,5 ەسەگە ارتىق. مىسال رەتىندە ستاتيستيكالىق دەرەك كەلتىرەيىن، ون جىلدىڭ ىشىندە جول-كولىك اپاتتارى سالدارىنان 34 مىڭ ادام و دۇنيەلىك بولىپ كەتتى. قازا بولعان ادامداردىڭ سانى شاحتينسك، ارال سياقتى قالالاردا تۇراتىن حالىقتىڭ سانىمەن بىردەي. ول اۋعان سوعىسى كەزىندە ون جىلدىڭ ىشىندە وققا ۇشقان كەڭەس اسكەرىنىڭ سانىنان 3,5 ەسەگە ارتىق. سوندىقتان، بۇگىندە جول ءجۇرۋ ەرەجەلەرىن بۇزۋدى بارىنشا ازايتۋ شارالارىن كۇشەيتكەن دۇرىس»، - دەيدى ا. كراۆچەنكو.

ونىڭ ايتۋىنشا، بۇگىندە زاڭ جۇزىندە ۇيالى تەلەفونعا، ىشىمدىك ءىشىپ، كولىكتى جۇرگىزۋگە تىيىم سالىنسا دا، وسى ساناتتاعى قۇقىق بۇزۋشىلىقتاردىڭ سانى از ەمەس. ا. كراۆچەنكونىڭ ويىنشا، جول سالاسىنداعى جاعدايدى راسىمدەلگەن حاتتامالاردىڭ سانىمەن كورسەتۋ دۇرىس ەمەس. بۇگىندە جول قاتىناسى سالاسىنداعى جالپى ءتارتىپتى ساقتاۋ جۇمىسىنا باسىمدىق بەرگەن ءجون.

ايتا كەتەيىك، بۇگىنگى جيىن بارىسىندا ماجىلىسمەندەر جۇرگىزۋشىلەر ءۇشىن ايىپپۇل كولەمىن ازايتۋدى ۇسىندى. بەلگىلى زاڭگەر سەرگەي ۋتكيننىڭ ويىنشا، ايىپپۇلدىڭ كولەمى قازىرگى پارانىڭ دەڭگەيىندە بولسا، جول- پاترۋلدىك پوليتسيا قىزمەتكەرلەرىنە اقشا بەرۋدىڭ ءوزى ءتيىمسىز بولىپ قالادى. ال دەپۋتات ومارحان وكسىكبايەۆ كولىكتى جۇرگىزۋ كەزىندە تەمەكى شەگۋگە تىيىم سالۋدى ۇسىندى. بۇل باستاما دەپۋتاتتار اراسىندا ۇلكەن پىكىرتالاس تۋعىزدى. بۇدان بولەك، و. وكسىكبايەۆ كوشە قيىلىسىندا ستوپ- سىزىقتى باسىپ وتكەنى ءۇشىن ايىپپۇل سالۋ ماسەلەسىن قايتا قاراۋ قاجەت دەپ سانايدى.

 

دەرەككوز: baq.kz