قازاقستاندا تۇماۋمەن كۇرەس باستالدى
ايلىق شەڭبەرىندە العاشقى مەديكو- سانيتارلىق كومەك ۇيىمدارىندا اشىق ەسىك كۇندەرى ۇيىمداستىرىلىپ، ازاماتتار اتالعان اۋرۋلاردىڭ پروفيلاكتيكاسى بويىنشا تەگىن كەڭەس الا الادى.
ايلىقتى وتكىزۋدىڭ باستى ماقساتى - حالىقتى، ونىڭ ىشىندە اۋرۋعا شالدىعۋ قاۋپى جوعارى ادامداردى، جۇمىس بەرۋشىلەر مەن قىزمەتكەرلەردى قوعامدىق جانە جەكە قورعانۋ شارالارى تۋرالى، اۋرۋدىڭ اسقىنۋىن الدىن الۋ ءۇشىن ۋاقىتىلى مەديتسينالىق كومەككە جۇگىنۋدىڭ قاجەتتىلىگى تۋرالى قۇلاقتاندىرۋ.
تۇماۋ - اۋا ارقىلى جىلدام تارالاتىن، ۆيرۋستىق تۇماۋدان تۋىندايتىن ءجىتى ينفەكسيالىق اۋرۋ. اۋرۋدىڭ قاۋىپتى كەزەڭىندە جوعارعى دەنە قىزۋى، باس اۋرۋى، بۇلشىقەت پەن بۋىنداردىڭ اۋرۋى بايقالىپ، ودان كەيىن مۇرىن بىتەلىپ، جوتەل پايدا بولىپ، تاماق اۋىرا باستايدى. دارىگەرگە دەر ۋاقىتىندا قارالماۋ، ونىڭ تاعايىنداعان ەمىن قابىلداماۋ، قوسىمشا سوزىلمالى اۋرۋلاردىڭ بولۋى وكپەنىڭ قابىنۋى، برونحيت، برونحوپنيەۆمونيا سياقتى اۋىر اسقىنۋلارعا اكەلىپ، ولىمگە سەبەپشى بولۋى مۇمكىن.
قورعانىس ماسكاسىن قولدانۋ، قولدى ءجيى جۋىپ تۇرۋ نەمەسە زارارسىزداندىراتىن ەرىتىندىلەرمەن تازالاۋ، عيماراتتاردى جەلدەتىپ تۇرۋ، ونى ىلعالدى تازالاۋ، سىرقاتتانعان اداممەن بايلانىستى شەكتەۋ - جرۆي، تۇماۋ جانە پنيەۆموكوكتى ينفەكسيانى جۇقتىرۋدىڭ الدىن الۋعا كومەكتەسەدى.
ۆاكسينالاۋ - ينفەكتسياى الدىن الۋدىڭ ەڭ ءتيىمدى ءتاسىلى. دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىسى بويىنشا، تۇماۋعا قارسى ەكپەنى جۇكتى ايەلدەرگە، 6 اي مەن 5 جاس ارالىعىنداعى بالالارعا، 65 جاستان جوعارى ەرەسەك ادامدارعا، سوزىلمالى اۋرۋلارى بار ازاماتتارعا جانە دەنساۋلىق ساقتاۋ سالاسىنىڭ قىزمەتكەرلەرىنە جاساۋ كەرەك.
ەستەرىڭىزگە سالا كەتەيىك، حالىقتىڭ وسال توپتارىنىڭ وكىلدەرىنە - وكپە، جۇرەك- قان تامىرلارى اۋرۋلارىنىڭ سوزىلمالى تۇرلەرىمەن، يممۋنيتەت تاپشىلىعى بار، ءجيى اۋىراتىن، جانە دەنساۋلىعى ءالسىز بالالارعا، مەديتسينالىق قىزمەتكەرلەر مەن جۇكتى ايەلدەرگە بيۋدجەت قاراجاتىنىڭ ەسەبىنەن ۆاكسينا جاسالادى. سونىمەن بىرگە، ۆاكسينا جۇمىس بەرۋشىلەردىڭ جانە حالىقتىڭ جەكە قاراجاتى ەسەبىنەن جۇرگىزىلەدى.