كىشكەنتاي قىز بالا ءۇيىن پرەزيدەنت سارايىنا ايىرباستاعىسى كەلدى
14:45, 10 - قىركۇيەك 2016
استانا. قازاقپارات - ۆانتا قالاسىنىڭ 6 جاسار تۇرعىنى لاۋرا ەسىمدى قىز كورسو اۋدانىنىڭ حانشايىمى بولامىن دەپ شەشكەن. حانشايىم سارايدا ءومىر ءسۇرۋى ءتيىس، ال فينليانديادا ەڭ كەلىستى عيمارات - پرەزيدەنت سارايى، دەپ جازادى yle.fi.
ويلانا كەلە، لاۋرا ەل پرەزيدەنتى ساۋل نيينيستەگە حات جازىپ، ءوز جانۇياسىنىڭ ءۇش بولمەلى پاتەرىن پاتشا سارايىنا ايىرباستاۋ تۋرالى ۇسىنىس جاسادى.
پرەزيدەنتتەن جاۋاپ كەلگەندە، لاۋرا مەن تۋىستارى تاڭدانىسىن جاسىرا المادى.
- قىزىمىزدىڭ پرەزيدەنتتىڭ جەكە وزىنەن جاۋاپ العانى ءبىزدى قۋانتتى. ءبىز سۋرەتتى قۇتتىقتاۋ حاتى عانا كەلەدى دەپ ويلاعانبىز، - دەدى لاۋرانىڭ اكەسى كيممو حونكانيەمي.
ءوز حاتىندا پرەزيدەنت نيينيستە ايتىلعان ۇسىنىستى ىسكە اسىرۋعا قۇزىرەتى جوق ەكەنىن، وعان پرەزيدەنت سارايى مەن ميانتيۋنيەمي رەزيدەنتسياسىنىڭ ۋاقىتشا تۇرۋعا بەرىلگەنىن ايتىپ تۇسىندىرگەن.