قازاقستاندا كەڭ اۋقىمدى قايىرىمدىلىق اكسيا - تەلەمارافونى باستالدى

استانا. قازاقپارات - قىركۇيەكتىڭ سوڭىنا دەيىن قازاقستاندا «شىن جۇرەكتەن» قايىرىمدىلىق اكسيا - تەلەمارافونى وتەدى.

بۇل تۋرالى بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ءمالىم بولدى.

«بۇگىننەن باستاپ وسى اي بويى قازاقستاندا قايىرىمدىلىق ۇلكەن شارالار قامتىلماق. وزدەرىڭىزگە بەلگىلى، ەلباسى ق ح ا سەسسياسىندا بەرگەن تاپسىرماسىنا وراي، بۇكىل قايىرىمدىلىق شارالار اسسامبلەيانىڭ اينالاسىندا ۇيلەستىرىلىپ جاتىر. ەستەرىڭىزدە بولسا، بيىلعى كوكتەمدە قازاقستان حالقى اسسامبلەياسى «قازاقستان» ر ت ر ك» ا ق- مەن «شىن جۇرەكتەن» كەڭ اۋقىمدى ءۇش كۇندىك تەلەمارافون وتكىزگەن بولاتىن. بۇل جوباعا بايلانىستى ەلىمىزدە وسى كۇنگە دەيىن ىزگى نيەتتەر ايتىلۋدا»، - دەدى قازاقستان حالقى اسسامبلەياسى ءتوراعاسىنىڭ ورىنباسارى، قازاقستان حالقى اسسامبلەياسى حاتشىلىعىنىڭ مەڭگەرۋشىسى ەرالى توعجانوۆ.

وسى رەتتە ول قازاقستاندا قايىرىمدىلىقپەن اينالىساتىندار سانى جىل سايىن ەلەۋلى تۇردە ارتىپ كەلە جاتقانىن اتاپ ءوتتى.

ۇيىمداستىرۋشىلاردىڭ اتاپ وتۋىنشە، قازاقستاندىقتار ءۇشىن «شىن جۇرەكتەن» جوباسىنىڭ ماڭىزدىلىعى مەن قاجەتتىلىگى وتە جوعارى. سەبەبى، وسى كۇنگە دەيىن ۇيىمداستىرۋشىلارعا ەلىمىزدىڭ ازاماتتارى تاراپىنان كوپتەگەن ومىرشەڭ ماسەلەلەردى شەشۋ بويىنشا وتىنىشتەر كەلىپ تۇسۋدە. بۇگىنگى تاڭدا 1200 دەن استام ءوتىنىش كەلىپ تۇسكەندىكتەن «قازاقستان» ر ت ر ك» ا ق مەدياارىپتەسىمەن تۇراقتى تۇردە توقسان سايىن وسى جوبانى وتكىزۋ تۋرالى شەشىم قابىلداندى. «شىن جۇرەكتەن» قايىرىمدىلىق شاراسىنا قازاقستاندىقتاردى جاپپاي تارتۋ ماقساتىمەن 7-29- قىركۇيەك ارالىعىندا قايىرىمدىلىق ايى ءوتىپ، سوڭىندا كەڭ اۋقىمدى تەلەمارافونمەن اياقتاۋ جوسپارلانىپ وتىر.

بۇدان بۇرىن حابارلانعانداي، رەسپۋبليكالىق اكسيا - تەلەمارافونى كومەككە مۇقتاج ازاماتتارعا جاردەم جاساۋعا ارنالعان. بۇل يگى شارانى ق ح ا، «قازاقستان حالقى اسسامبلەياسى» قوعامدىق قورى جانە «قازاقستان» ر ت ر ك» ا ق ۇيىمداستىرىپ وتىر.

اۆتور: رۋسلان عابباسوۆ